ئازادی رادەربڕین بەرلەوەی بۆ قسەكەر سوودی هەبێت، بۆ دەسەڵات و كۆمەڵگە سوودی هەیە، بە مەرجێك بە تەواو مانا ئازاد بێت و بۆ مەرامی سیاسی و كەسێتی و لە ژێر هیچ گۆشارێكی دەرەكی نەبێت، بەلكوو بۆ بەرژەوەندی گشتی و پێشخستنی نیشتمان و كۆمەڵگە بێت، لێ‌ مخابن زۆر كەس هەیە تەنها قسە دەكات و مانای ئازادی رادەربڕین نازانێت، لە جیاتی چارەسەر ناخی دەیان هاووڵاتیی بریندار دەكات. بۆیە زۆر گرنگە كاتێك كەسێك دەیەوێت بە ئازادی قسە بكات، بزانێت ئازادی چییە و ئەو قسانەی دەكات چ كاردانەوەیەكی لێدەكەوێتەوە. هەرێمی كوردستان زۆرترین ئازادی رادەربڕینی تێدایە، وای لێهاتووە لە قالبی ئازادی دەرچووە و بووەتە بەرەڵایی، بۆیە پێویستە رێگەچارەیەك بۆ ئەم بەرەڵاییە بدۆزرێتەوە. زۆرێك لە لایەنەكان كە ئازادی بیركردنەوەش لە ناویاندا بڤەیە، بەهۆی كەسانێكی كاڵفامەوە هەولی شێواندنی ئازادی لە هەرێمی كوردستان دەدەن و تیڤی و ماڵپەڕەكانیان خستووتە خزمەت بێگانەكان بۆ ناشرین كردنی هەرێمی كوردستان.
هەرێمی كوردستان بە شێوەیەكی گشتی كەوتووتە نێو گێژاوێكی زۆر ئالۆز، هەر كەسێك لە لای خۆی بووەتە سیاسی و پێشبینی زۆر سەیر دەكات، هەیە دونیا دەكاتە شامی شەریف و هەشە شامی شەریف دەكاتە فەلووجە. مامۆستا قوتابخانەی كردووتە بارەگای حیزب و دكتۆر ژوورەكەی كردووتە ژووری بازرگانی و، دووكاندار بووەتە قوڵبڕ، خوێندەوارەكان گۆڕەپانیان چۆڵكردووە بۆ نەخوێندەوارەكان و، زۆرێك لە دزەكان بوونەتە قاسەداری پارە و بەرپرس، مەلاكانیش مزگەوتەكانیان كردووتە شوێنی تەكفیر و هاندانی خەڵك بۆ توندو تیژی و لە مزگەوتەكاندا باسی هەموو شتێك دەكرێ‌ بێجگە لە خوا و رەوشت و ئایین. رێوی بووەتە شوانی مریشكەكانی چەور؛ حكومەت و یاسا و دەسەڵاتیش وەكوو فیلمی هندی لەبەری دانیشتوون و سەیری كوتاییەكەی دەكەن، نازانن لە كوتاییدا خۆیان دەبنە فیلمی راستەقینە..
زۆر گرنگە هەر كەسە و بگەڕێتەوە سەر كار و پسپۆری خۆی و دەست و زمانی دزەكان ببڕدرێن و زمانی درێژ كورت بكرێتەوە جا چ مامۆستایەك بێت لە قوتابخانە و چ مەلایەك بێت لە مزگەوت و چ كەسێك بێت بەناوی رۆشنبیر و نووسەر و رۆژنامەنووس، بەتایبەت مامۆستای ئایینی كە زۆرترین كاریگەری هەیە لەناو كۆمەڵگەدا، پێویستە زمانی هەندێك لە كوڵكە مەلا كورت بكرێتەوە ئەگەر بێجگە لە كاروباری ئایینی لە مزگەوتەكاندا بجوولێت، چونكە مزگەوت جێگەی ئۆمێدبەخشین و هێوكردنەوەی خەڵك و هاندانی خەڵكە بۆ پشتبەستن بە خوا، دەبێت مزگەوت وەكوو هەمیشە روولێكی ئەكتیڤ بگێڕێت بۆ پشوودرێژی خەڵك لەو بارودۆخەدا. هەینی رابردوو نوێژی هەینیم بەجێ‌ هێشت بەهۆی هەڕەشە و گۆڕەشە و نارێكی وتار خوێنی مزگەوتێك لە بەحركە، هەستم كرد لە دەرەوە خۆپیشاندانە و خەڵك كۆ بووتەوە بۆ خۆپیشاندان دژی داگیركردنی كەركووك و عەفرین و هەڕەشەكانی توركیا و بێوەفایی ئەمریكا و قولبڕینی كورد لە لایەن بەغداوە. بێجگە لەمەش بە پێی ئاگاداری من لە زۆربەی مزگەوتەكان ئەوەندەی باسی خۆپێشاندانەكان كرابوو و هانی خەڵكیاندا بوو بۆ دروستكردنی ئالۆزی و خۆپیشاندان، نیوئەوەندە باسی خواپەرستی و ناسینی خوا نەكرابوو. چاوەڕێم دەكرد مامۆستا بۆ نوێژخوێنان خۆپیشاندان شی كردبوایە و پێیانی گوتبا كە خۆپیشاندان توندوتیژی نییە و بە هێمنی نارەزایی دەربڕینە لە هەمبەر مافێكی رەوا. بۆ مامۆستا باسی ئەوە ناكات كە خۆیان بە هۆی ئەم مزگەوتانە بوونەتە خاوەن خانوو و ئاو و كارەبا و چەندین ئیمتیازی دیكە؟. چاوەڕێ دەكرێ‌ مزگەوتەكان ببنە شوێنی ئارامی خەڵك و هێمنی و پشوودرێژی نەك هێنانەوەی توندوتیژی و نائۆمێدی و دڵرەشكردنی خەڵك.
سەرۆكی حكومەتی هەرێمی كوردستان كەسایەتییەكی هێمن و ئارام و گوێگرە و هەمیشە لە خەمی چین و توێژەكانی كۆمەڵگەدا بووە، زۆرترین هەولیداوە بۆ چارەسەر كردنی ئەم قەیرانە داراییە و سەركەوتووش بووە لە هەولەكانی؛ ئەم خۆپیشاندانانەش كە دەكران دەستێكی چەپەلی نێوخۆیی و دەرەكی لە پشت بوو و كەسانێكی سیاسی بۆ مەرامی گلاوی خۆیان مامۆستایانیان بەكار دەهێنا و، هەولێ‌ ناشرینكردنی ئەم ئەزموونەیاندەدا كە هەموو ئاواتی دووژمانی ئێمە هەر ئەو ناشرین كردنەیە. پێویست بوو مامۆستا خەڵك لەوە ئاگادار بكاتەوە كە خۆپیشاندن جێگەی چەقۆ و دەبانجە هەڵگرتن و حنێودان بە رەمز و پیرۆزیەكانی نەتەوەیی نییە، بەلكوو دیاردەیەكی ناشارستانییە و لە پێشكەوتووترین وڵاتی دونیادا دیاردەیەكی قەدەغەكراوە و جێگەی قبوول نییە. پێویست بوو مامۆستایانی ئایینی بە گرنگییەوە باسی ئەو هەوڵە سەركەوتووانەی سەرۆكوەزیرانی هەرێمی كوردستانیان كردبا كە لە وەها بارودۆخێكدا سەركەوتنێكی گەورەی بەدەستهێناوە. سەرۆكوەزیران لە خەمی مامۆستا و فەرمانبەراندا بوو و نەیدەویست ببنە رۆبۆتی دەستی هیچ لایەنێكی سیاسی. ئەوەندەی سەرۆكوەزیرانی هەرێمی كوردستان لە خەمی چارەسەر و خۆشگوزەرانی چینی مامۆستا و فەرمانبەراندا بوو، نیو ئەوەندەش ئەگەر لایەنەكانی دیكەی سیاسیی لە خەمیاندا بوونایە، كێشەكە چارەسەر دەبوو و نەدەگەیشتە ئەم رادەیە. بۆیە ستایشی سەرۆكوەزیران دەكەین و دەبێت هەولە سەركەوتووەكانی لەبەر چاو بگرین.