دڤان رۆژاندا دووبارە و چەند بارە ھژمارەکا مامۆستایێن ھەرێما کوردستانێ ، ژبووی بەردەمامی و گۆرانکاریان د مۆچێ واندا دەست ب خۆنیشاندانا کریە ، خۆنیشاندانێن ئاشتیانە و دوور ژ توند و تیژیێ و مەرامێن سیاسی و حزبایەتێ بۆ گەھاندنا پەیاما خۆ بۆ دەسھەلاتێ کار و گاڤەکا ڕەوایە و ڕۆیێ گەش و جوانێ دیموکراسیەتێ و ئازادیێ نیشا جیھانێ ددەت ، پێتڤی یە حکومەت ژی ب گیانەکێ دیموکراسیانە و مرۆڤانە پێشوازیێ لڤان ڕەنگە خۆ نیشاندانا بکەت . نەخاسمە خۆ نیشاندانێن چینەکا ڕەوشەنبیر و پەروەردەکارا وەک مامۆستایان .
براستی ھەرێما کوردستانێ دڤان ساڵان دا ژبەر چەندین ئەگەر و رەوشێن سیاسی و ئابووری تۆشی قەیرانەکا دژوار بوویە ، لێ خۆشبەختانە شارەزایی یا سەرەدەریا حکومەتا ھەرێما کوردستانێ نەخاسمە سەرۆکێ حکومەتا ھەرێما کوردستانێ دگەل ڤێ ڕەوشێ سەرەدەریەکا ژیرانە بوو ، و شیا ددەمەکێ کێم دا زۆر پرسان چارەبکەت وەک دوو کرنا سەرھەلدانا شەرێ ناڤخۆیی پشتی خیانەتا ١٦ ئکتۆبەرێ و داگیرکرنا کەرکووک و دەڤەرێن دیتر و خورتکرنەڤا پەیوەندیێن ھەرێمێ و بەغدا و ڤەکرنا دەروازێن سنووری و گەشتێن ئاسمانیێن فرۆکەخانێن ھەرێما کوردستانێ و خەرجکرنا پشکەکا مۆچێ فەرمانبەران ژلایێ حکومەتا ناڤەندی و پرسێن دیتر ژی بەرەڤ چارەسەریێ نە ، ئەگەر خەلکێ کوردستانێ بێنفرەھیا خۆ یان ڤان چەند سالان لسەر ڤان قەیرانان درێژتر بکەت ، لدەمەکێ کێم سەرۆکێ حکومەتا ھەرێما کوردستانێ دێ رەوشا سیاسی و ئابووری باشتر لێ کەت . دەربارەی مۆچیێن فەرمانبەرێن ھەرێمێ سەرۆکێ حکومەتا ھەرێمێ بەری خۆ نیشاندانا دەست ب پرۆسا چاکسایێ کریە ل سیستەمێ پاشکەفتنا مۆچەی و دناڤ رۆژاندا بەرھەمێ ڤێ چاکسازیێ دێ بینین . لێ مخابن وەک خۆنیشاندانێن بەرێ ، ھژمارەکا پەرلەمانتار و کادرێن حزبێن سیاسی ، وەک بانگەشە بۆ حزبا خۆ و موزایدێن سیاسی دچنە ناڤ خۆنیشاندانا دا ، نەخاسمە ئەم بەرەڤ ھەلبژاردنان دچین ، دیارە ئەو لایەنێن سیاسی ڤان خۆ نیشاندانا ب دەلیڤە دزانن پێش وەخت بڤی رەنگی ھەلمەتا پرۆپاکندێن ھەلبژاردنان بکەن و خۆنیشاندانا ببەنە دچارچۆڤەکێ سیاسی دا و پاشان بڤێ چەندێ ژی رانەوستن درۆشمێن نەکوردایەتی و نە نشتیمانی دژی حکومەتا ھەرێما کوردستانێ بلند بکەن و داخازا ھەلوەشاندنێ بکەت . خودێ نەکەت ئەگەر مەرەما وان دڤان کاودانێن نازک دا سەربگرن ، دێ رەوشا سیاسی و ئابووری و جڤاکی ل کوردستانێ بەرڤ ئاقارەکێ ھەرە دژوار بەن کۆ دوور بیت ل ھەر پێشبینیەکێ ، چونکی ئەڤرۆ چاڤێن دۆژمن و نەیارا بڤان سەرکەفتنێن حکومەتا مەر رانابن و ل دەلیڤەکێ دگەرێن زێدەتر دەستێن خۆ بینە دناڤ ھەرێمێ دا ، ژبووی لاوازکرنا قەوارێ سیاسی و ئیداریێ ھەرێما کوردستانێ ، ھەر وەکی مە بەری نھو دیتی ، ئەگەر گەھشتە وی ئاستی ژی ڕەوشا ھەرێمێ ل ڕەوشا نھو یا سووریا باشتر نابیت ، ئەڤەژی کارەساتەکا ھەر مەزنە و ھەمی خەلکێ ھەرێمێ ل ھاولاتی و حکومەت و حزب ڤە دێ تووشی نەھامەتیێن مەزن بن . ئەز د وێ باوەرێ دا نیمە خەلکێ کوردستانێ ھەتا ڤی رادەی یێ نەھۆشیار بیت ، بتایبەت چینا مامۆستایان رێکێ بدەنە وان حزبێن سیاسی بۆ مەرامێن خۆ یێن تایبەت ڤان خۆ نیشاندانا بەرەڤ ڤی ئاقاری ببەن . لێ لدەستپێکا ڤان خۆنیشاندانا بۆ خەلکی دیار بوو کو ھێشتا پیلانێن دۆژمن و داگیرکەرا دژی ھەرێما کوردستانێ دبەردەوام و پشتی کۆ نەشیای راستەوخۆ وان پیلانا دژی ھەرێمێ بجە ب ئینن ، دووبارە دیڤەلانکێن خۆ و نەحەزێن حکومەتا ھەرێما کوردستانێ بکار دئینن و ڤێ ڕەوشێ بدەلیڤە دزانن . دیارە ئەڤ پەرلەمانتار و کادرێن ھندەک حزبێن سیاسی دڤێت ڤان خۆ نیشاندانا بۆ خۆ ببەن .