ل شازدێ ئکتۆبەرا ٢٠١٧ کەرکووکا دلێ کوردستانێ و دەڤەرێن کوردستانی یێن دەرڤەی ئیدارا ھەرێما کوردستانێ ، ب خیانەتا ھندەک سەرکردە و بنەمالێن دناڤ ئێِکەتی نشتیمانی دا یێن ب شیرێ خیانەتێ پەروەردەبووی ژلایێ حەشدا شیعی و عەرەبێن شوفینی یێن عیراقێ ب سپۆنسەریا ئیرانێ ھاتە داگیرکرن . عەفرینا باژێرێ جوانیێ و پێِکڤە ژیانێ ل رۆژئاڤایێ کوردستانێ ، ژلایێ تورکیا یا ڕەگەز پەرست و تالانچیێن سووری ، ژ ئەگەرێ خۆ سەپاندن و سەر رەقیا پەکەکێ و حزبێن دیڤەلانکێن وان ھاتە داگیرکرن .
بێ گۆمان ئەگەر خیانەت و خۆ سەپاندنە ئەگەرێن سەرەکی و رێکخۆشکەر بوون بۆ ڤان داگیرکرنا ، ئەگەر ئەڤ چەندە نەبایە دا ئێک گرتن و ئێک رێزی دناڤ ئالیێن سیاسی یێن کوردستانی درۆست بیت ، ئەگەر ئێک رێزی درۆست ببا پشتەڤانیا نیڤ دەولەتی و ھێزێن ھەڤپەیمان دا بۆ دووزا سیاسی یا کوردستانێ ل باشوور و رۆژ ئاڤا ھەربیت ، ئەگەر پشتەڤانیا وان ھەبا نە حەشدا شیعی یا عیراقێ ب سپونسەرێن خۆڤە د شیا کەرکووکێ و دەڤەرێن دیتر یێن کوردستانی داگیر بکەن ، نەژی تورکیا ب دیڤەلانکێن خۆ یێن سووری د شیا عەفرینێ داگیر بکەن . داگیرکرنا ڤان دەڤەران دربەکا ھەرە مەزن ل بزاڤا سیاسی و ئیداری یا کوردستانێ دا ل باشوور و رۆژ ئاڤا ، پێدڤی یە ئەڤ ھەردوو لایەنێن رێک بۆ خوشکری و دەلیڤا ئێک رێزیێ ھەلوەشاندی ، زووترین دەم ب خودا بچنەڤە و بۆ سیاسەتوکا نەتەوی و نشتیمانی و ئێکدوو قەبۆلکرنێ بزڤرن و کار لسەر وان رێکەفتنا بکەن ئەوێن ب سەرۆکاتیا سەروک مەسعوود بارزانی ھاتیە ھاتینە کرن ، داکۆ ئەڤ ھەردوو بەشێن رزگارکریێن کوردستانێ تووشی کارەساتێن دیتر نەبن و پێکڤە کار لسەر بدەستڤەئینانا دەسکەفتێن دیتر بھێتە کرن . حکومەتا ھەرێما کوردستانێ ب سەرۆکاتیا نێچیرڤان بارزانی درێژەپێدەر وێ سیاسەتا ئێک گۆتاریا ھێز و ئالیێن سیاسی یێن کوردستانی نە لسەر بنەمایێ نەتەوی و نشتیمانی و پرنسیپێن دیمکراسیەتێ کو ژلایێ پارتی دیموکراتی کوردستان بەری چەند سالا ھاتیە دارشتن . نەورۆز ژی ژبلی جەژن و سەر سالا نوو یا کوردی یە ، ھێمایێ ئێک رێزی و ئێک بریاریا خەلکێ کوردستانێ ، چونکی بەری ٢٧١٨ سالا ، ئێک رێزیا خەلکێ کوردستانێ ل نەورۆزێ ب شیانێن کێم و دەلیڤە ھەرە بەتەنگ دا ، شیان بسەر زۆر دارترین رژێما ستەمکارا وی سەردەمی سەربکەڤیت و نەورۆزێ درۆست بکەت . راستە ئەڤرۆ خەلکێ کوردستانێ لسەرانسەرێ جیھانێ رۆندکان بۆ خەلکێ کەرکووکێ و عەفرینێ درێژیت و ھەڤپشکێن خەمێن واینە ، چونکی خەم و خۆشیێن کوردا لھەر جەکی ھەبن ھەر ئێکن ، لێ نەساخکرنەڤا نەورۆزا جەژنا نەتەوی و سەر سالا کوردی برینێن کەرکووک و عەفرینێ سارێژ ناکەت . بەلکی نەگێرانا ئاھەنگێن ڤێ رۆژا پیرۆز دلێ دوژمن و داگیرکار و خیانەتکارا شاد دکەت . برینێن کەرکووک و عەفرینێ و دەڤەرێن دیتر ب ئێکگرتنەکا مینا ئێکگرتنا ل نەورۆزێ دێ سارێژ بن و بلا ھەمی ئالیێن سیاسی و خەلکێ کوردستانێ ئێکگرتنەکا بڤی رەنگی بکەتە کار و پلان و بەرنامێ خۆ یێ رۆژەڤێ و ھەرە بلەز و فەر .