سەرۆکێ حکومەتا ھەرێما کوردستانێ دا ، د ئەزمۆنەکا دژوار دا بسەرکەفت
March 17, 2018
وتار و بیروڕا
![سەرۆکێ حکومەتا ھەرێما کوردستانێ دا ، د ئەزمۆنەکا دژوار دا بسەرکەفت](https://gulanmedia.com/public/old_images/nusaran/xaiyazz2.jpg )
ھەرچەندە دڤێ رەوشێ دا پشتی رازینەبوونا سەرۆک مەسعەد بارزانی ب درێژکرنا دەمێ سەرۆکاتیێ بارێ سەرۆکێ حکومەتا ھەرێما کوردستانێ رێزدار نێچیرڤان بارزانی گرانتر کر ، لێ سەرۆکێ حکومەتا ھەرێما کوردستانێ ھەر زوو شیا ب سیاسەتەکا ژیر سەرەدەریێ دگەل روودان و پێشھاتا بکەت و تنێ ل پشکەشا خالا ئێکێ یا پیلانا خۆ سەربکەڤن ، ئەوژی پشتی شیاین بالێ قۆرخکەرێن دەسھەلاتا دناڤ ئێکەتیا نشتیمانی دا کو بنەمالا تالەبانی و ھندەک تاگرێن وان دناڤ سەرکردایەتیا وان دا بکەنە پشکەک ل بجە ئینانا پیلانا خۆ و خیانەتەکا نشتیمانی ئەنجام بدەت و کەرکووکا دلێ کوردستانێ و دەڤەرێن کوردستانی یێن دەرڤەی ئیدارا ھەرێما کوردستانێ داگیر بکەن . لێ پێشمەرگەھێن کوردستانێ ھەر زوی پیلانا وان نیڤەروو ھێلا و دربێن مەزن لێ دان . بڤان روودانێن پشتی ١٦ ێ ئکتۆبەرا ٢٠١٧ سەرۆکێ حکومەتا ھەرێما کوردستانێ کەفتە د ئەزمۆنەکا دژوار دا و پشتی چەند ھەیڤەکا ، ئەنجامێن ڤێ ئەزمۆنێ دەرکەفتن و کاک نێچیرڤان بارزانی ب پلا نایاب سەرکەفت .
ڕەنگە خەلکەک بێژیت لسەر چ بنەما پلا نایاب وەرگرت ..! .
د بەرسڤێ دا دێ بێژین دەولەدار نێچیرڤان بارزانی لدەمەکێ ھەرە کورت و پڕ ئاڵوزی دا ، ژلایەکێ ئەڤ پیلانا دەولەتا عیراقێ دژی ھەرێما کوردستانێ و ژلایەکی خیانەتا وی بالێ دناڤ ئێکەتیێ دا و ژلایەکێ ژ ترسنووکێ ھژمارەکا حزبێن کوردستانێ یێن دناڤ حکومەتێ دا خۆ ڤەکێشا . شیا کۆنتروولا ڕەوشێ بکەت .
نە وەکر لەشکرکێشیا دەولەتا عیراقێ بۆ سەر ھەرێما کوردستانێ بەردەوام بیت ، نەژی ناکوکیێن دناڤ لایەنێن سیاسی یێن ھەرێما کوردستانێ بەرفرەھتر ببن بگەھنە ئاستێ شەرێ نافخۆیی کو پشکەکا پیلانا داگیرکەرا و خیانەتکارا بوو ، نەژی حکومەتا ھەرێما کوردستانێ ب رەڤینا (گۆڕان و یەکگرتوویێ و کۆمەلێ ) ھەلوەشیا ، نەژی قەوارێ سیاسی یێ ھەرێما کوردستانێ بچوک کر .
گەماروویا سیاسی ژی ھەر زوی ھاتە شکاندن و شیا بەرۆڤاژی پیلانێن داگیرکەرا و خیانەتکارا سەرەدانا چەندین وەلاتێن زل ھێز بکەت و لسەر ئاستێ لوتکەیا دەسھەلاتا وان دەولەتا پێشوازی لێ ھاتە کرن و ئەنجامێن ئەرێنی و دلخۆشکەر ھەر زوی دیار بوون . گەماروویا ئابۆری ژی بەرەڤ چارەسەریێ یە و ژبەر سەرکەفتنا دبلۆماسیەتا سەرۆکێ حکومەتا ھەرێما کوردستانێ دگەل ھژمارەکا وەلاتێن خودان سەنگ و بریار ، ئەڤرۆ حکومەتا عەبادی سەد و ھەشتێ پلە گۆڕی ، نەک وی خۆ گۆڕی . ژلایێ لاواز کرنا رۆلێ کوردا ل بەغدا ، ھەتا نھو حکومتا عیراقێ سەرکەفتن بدەستڤە ئینایە ، لێ ئەوا ب لایەنێن سیاسی یێن کوردستانێ ڤە گرێدایی یە نەک حکومەتا ھەرێما . دەربارەی ڕەھەند ئانکۆ پلانا پێنجێ یا پیلانا حکومەتا عیراقێ بەرامبەر ھەرێما کوردستانێ ، راستڤەکرنا وان ماددە و برگێن دەستوورێ ھەردەمیێ عیراقێ نە یێن گرێدایی ب کوردستانێ ڤە ، ڕەنگە دبەرنامێ کارێ گەرا ھەلبژاردنێن داھاتیێ جڤاتا نوونەرێن عیراقێ بن ، ئەڤەژی کارەکا بساناھی نینە ، لێ پێتڤی یە ھەر نۆکە کورد بۆ رێگریکرنا ڤێ چەندێ خۆ بەرھەڤ بکەن ، بۆ ڤێ چەندێ ژی ئێک رێکا سەرەکی ھەیە ئەوژی ئێک رێزیا ھیز و ئێک گۆتاریا ھێز و لایەنێن سیاسی یە ، لێ یا دوو لایەنی یە ، لایەنێ ئێکێ : بەرامبەر حکومەتا عیراقێ ئێک گۆتار و ئێک بریار بن و چ لایەن نەکەڤنە بن ئەجندایێن سیاسەتا لایەن و دەولەتێن دەرڤەی ھەرێما کوردستانێ و ھەمی پێکڤە ھەلگرێن پەیاما ھەرێما کوردستانێ بن ، لایەنێ دوویێ : بەرامبەر وەلاتێن دەرڤەی و جڤاکێ نیڤ دەولەتی دئێکگرتی بن ھەر وەکی دگەل عیراقێ . ئەگەر بۆ ڤێ چەندێ ژی دبلۆماسیەت و سیاسەتا سەرۆکێ حکومەتا ھەرێما کوردستانێ بجە بئینن ، ئارمانجا کوردستانێ دێ بسەرکەڤیت و پیلانێن داگیرکەرا دێ ژناڤ چن و بێ بەرھەم بن . لەوما دبێژین سەرۆکێ حکومتا ھەرێما کوردستانێ د ئەزمۆنەکا ب زەحمەت و دژوار دا بسەرکەفت و پێتڤی یە خەلکێ ھەرێما کوردستانێ پشتەڤانیێ لێ بکەت ، داکو بۆ قۆناغێن داھاتی ژی درێژیێ بڤان سەرکەفتنا بدەین تاکۆ ھەمی مافێن خۆ یێن نەتەوەی و نشتیمانی بجە بئینین ئەوێن بدرێژاھیا چەندین سالا خەباتێ بۆ دکەین و قوربانیا ژ پێخەمەت ددەین .