پشتی سەرھەلدانا پیرۆزا گەلێ کورد ل ئادارا سالا ١٩٩١ ، ئەڤە ئێکەم سالە خەلکێ کوردستانێ ژ بلی کەرکووکا دلێ کوردستانێ و دەڤەرێن کوردستانی یێن دەرڤەی ئیدارا ھەرێما کوردستانێ ، د رەوشەکا تایبەت یا سیاسی و دارایی پێشوازیێ ل جەژنا نەورۆزا نەتەوی دکەت . ڕەنگە داگیرکەر و دیڤەلانکێن وان یێن پالپشتێن داگیرکرنا کەرکووکێ و دەڤەرێن دیتر یێن کوردستانێ ل خیانەتا ١٦ ئگتۆبەرا سالا بوری ، وەسا ھزر بکەن بدارگیرکرنا ڤان دەڤەرا و گەمارۆدانا ھەرێما کوردستانێ ژلایێ سیاسی و ئابووری ، پشتی ھەولێن وان یێن لەشکرکێشی ب مەردایەیتی و قەھرەمانیا پێشمەرگەھێن کوردستانێ بداوی ھاتە ، لوێ باوەریێ ، ئەڤ رەوشا سیاسی و ئابووری یا کوردستانێ خەلکێ کوردستانێ ل ئارمانجێن خۆ یێن نەتەوی و نشتیمانی بێ ھیڤی کریە و ئیدی دێ ئاگرێ نەورۆزا بەرخودانێ و ئازادیێ و گەشکرنا ھیڤیان ڤەمریت و لڤێ ئادار و بوھارێ سەیرانگەھێن ھەرێما کوردستانێ ل خەلکی دێ ڤالا بن و تنێ مژوویلی گوھداریکرنا داخۆیانیێن حکومەتا عیراقێ بن یێن دەم بۆراندنێ و دوور ژ راستیێ . بلا بزانن بەری زێدەتر ل ٢٧٠٠ سالا خەلکێ کوردستانێ کارەساتێن زۆر مەزنتر بسەردا ھاتینە و تووشی خیانەت و داگیرکرنێن دوژمنێن مەزنتر بووینە لێ دەست ل ھەلکرن و بلندکرنا ئاگرێ نەرۆزێ و گەشت و ئاھەنگێن وێ ئادارێ بەرنەداینە . لبن چەک و فەرمان و لەشکرێ رژێما دکتاتوریا بەعسا سەدامی ئاگرێ نەورۆزێ ھەلکریە و ئاھەنگێن وێ گێراینە و ھەلبەستێن نەرۆزێ و ئادارێ دوژمن و خائین کۆرە و دلتەنگ کرینە و خەلکێ کوردستانێ ژی ئۆمێد و ھیڤی پێ گەش کرینە . مخابن ئەڤرۆ کەرکووکا دلێ کوردستانێ دبن سیبەرا داگیرکەرا و خۆفووشاندا پێشوازیێ لڤێ جەژنا نەتەوی و سالڤەگەرا سەرھەدانا باژێرێ خۆ دکەت . راستە ڤێ داگیرکرنێ و قەیرانان خەلکێ کوردستانێ دلگران کریە ، لێ ئۆمێدا ئازادیێ و گەھشتن بمافێن نەتەوی و نشتیمانی نەمرینە و نامرن . ھەرچەندی پشتی بوورینا چەند مەھەکان لڤێ خیانەتێ سیاسەتا دوژمن و خائین شکێنەرا حکومەتا ھەرێما کوردستانێ ب سەرۆکایەتیا رێزدار نێچیرڤان بارزانی ، زۆر ئاستەنگ شکاندینە و قەیران سڤک کریە و باوەری بۆ خەلکی درۆست کریە ، ئاستەنگێن مایی ژی لدەمەکێ زوی دێ شکێن و خەلکێ کوردستانێ وەک بەرسڤەک بۆ خۆفرۆش و داگیرکەرا پتر لسالێن بووری دێ گرنگیێ ب جەژنا نەورۆزێ و ئاگرێ وێ و سەیران و ئاھەنگێن بوھارێ و بلندکرنا ئالایێ کوردستانێ دکەت و ئۆمێدا بدەستڤەئینا ئارمانجێن مەزنتر پێ گەشتر کەت و گوە نادەتە ھەول و پیلانێن وانن و دێ ھەول دەت ئەڤ جەژنا نەتەوی بکەتە فاکتەرێ ئێکرێزی و ئێکگۆتاریا سیاسی و جەماوەری ، بۆ بەرسینگ گرتنا پیلانێن دوژنا بۆ بچوک کرنا قەوارێ سیاسی یێ ھەرێما کوردستانێ . پێتڤی یە ئەو کوردێن خۆفرۆش ژی ڤێ جەژنا نەتەوی بدەرفەت وەرگرن بۆ بخۆدا چۆنەڤە و دانپێدان ب وێ خیانەتا خۆ یا مەزن و ڤەزڤرین بۆ باوەرشێ کوردایەتیا ڕەسەن . کۆ خەباتکرنە ژبۆ رزگاری و ئازادیێ و نەکەفتنە بن ئەجندایێن وەلاتێن داگیرکەر د ھەرکاودانەکی دا و مانەڤا کوردا خودان بریارا خۆ یا تایبەت .