ھەرچەندە خیانەت بەرۆڤاژی ئازادیێ نیە ، لێ ئەگەرەکە ژبووی گیرۆبوون و ژناڤبرنا وێ . بزاڤا رزگایخوازا کوردستانی ب درێژاھیا خۆ دیرۆکا خۆ ژبۆی ئازادی و رزگاریا کورد و کوردستانێ خەبات کریە و قوربانی ژی داینە ، ھەرچەندە دقۆناغێن خەباتا خۆدا زۆر جاران تۆشی شکەستنان یان ب نەچاری تووشی بێنڤەدانا بووینە و پرانیا ڤان شکەستن و بێنڤەدانا فاکتەرێن ناڤخۆیی بوونە ، کۆ ب خیانەت دھێتە ھژماردن ، لێ ھەرجار بەرەیێ دلسۆز و خەباتکار کۆ د لاندنا ئازادیێ و نەتەوایەتیێ دا مەزن و پەروەردەبوونە شیانە بسەر پیلانێن خیانەتکاریێن دەرڤە و یێن ناڤخۆیی ئەوێن د لاندکا خیانەتکاریێ دا پەیدا بۆی و پەروەردەبۆی سەربکەڤن ، ھەر ل سەرەتا و ناڤەراستا سالێن شێستان و ناڤەراستا سالێن حەفتێی و ھەشتێیان ل سەردێ بۆری . پشتی ئازادیا عیراقێ ژی درێژەپێدەرێن خیانەتا جاران ھەول دان داخازیێن کوردا یێن سیاسی و نشتیمانی ب دەستووری و یاسایی نەھێنە چارچۆڤەکرن , دەمێ ب فیدرالیەتا پارێزگەھان رازی بووی ، لێ ڤێ چارێ ژی پێشڕەوێ رێبازا کوردایەتیێ و نشتیمانیبوونێ و ھەلگرێ پەیاما ڕاست و ڕەوایا خەلکێ کوردستانێ سەرۆک بارزانی ، پیلانا وان ھەلوەشاند ، بۆ فیدرالیەتەکا لسەر بنەمایێ دیروکی و جوگرافی و برەنگەکێ یاسایی و دەستووری . راستە ئەو حزبا ئەڤ گرۆپە پێشرەویێ لێ دکەت درۆشمێن بریقەدا بلند کرینە ، لەوما خەلکی پەنا بۆ بریە و ل ھندەک دەلیڤاندا پشکەکا کاریگەر بوونە ل بزاڤا رزگاریخوازیا گەلێ کورد و کەسانێن نشتیمان پەروەر ژی دناڤ سەرکردایەتیێ و ئورگانێن وێ یێن دیتر ھەنە و ئەو جھێ رێزرگرتنێ نە ، لێ مخابن ڤی سەردەمی باڵێ خیانەتکار و ھەڤدژێن وان کۆنترۆل لسەر دەسھەلاتا ئێکەتی نشتیمانی کوردستان کریە ، نەخاسمە ژلایێ دارایی و لەشکری . پشتی خیانەتا (١٦) ێ ئکتۆبەرا سالا ٢٠١٧ دەمی کەرکووکا دلێ کوردستانێ و چەند دەڤەرێن دیتر یێن کوردستانی ، برێکەفتن رادەستی حەشدا شەعبی و پاسدارێن ئیرانێ کری ، راستیا روورەشیا وان بۆ خەلکێ کوردستانێ دیار بوو ، کا ھەتا چ راددە کەفتینە بن ئەجنداریێن داگیرکەرا و دەسکەفتێن نەتەوی یێن کوردستانێ دکەنە قوربانی بەرژەوەندێن خۆ یێن تایبەت .
نھو ژی سەرڤێ خیانەتا نشتیمانی را ھەول ددەن ، خیانەتا خۆ ڤەشێرن و بسەر کەفتن ھژمار بکەن ، ب بەھانەیا مانەڤا وان دناڤ کەرکووکێ دا . ئەگەر مانەڤا وان د کەرکووکا داگیرکری دا دەسکەفت بیت ، بلا کەرەمکەن ئالایێ پیرۆزێ کوردستانێ بلند بکەن یان بیرھاتنێن نەتەوی یێن ھەیڤا ئادارێ وەک نەورۆز و سەرھەلدانێ بکەن ، ب خیانەتا وان یا ل ١٦ ئکتۆبەرێ کەرب و کینا داگیرکەرا گەھشتە وی ئاستێ رێگریێ لبەرکرنا جلوبەرگێن کوردی بکەن ل بیرەوەریێن نەتەوی و نشتیمانی دا . ئەڤ بریارا رژێما نھو یا عیراقێ لسەر ڤێ چەندی لسەر دەمێ رژێما دکتاتوریا بەعس نەھاتینە دان . مخابن سەرباری ڤان ھەمی دوژمنایەتیا حکومەتا شیعەگەریا عیراقێ بەرامبەر گەلێ کورد ، ھێشتا سەرکردێن گرۆپێ وان خیانەتکارێن دێرین یێَ کوردستانێ ، ئالایێ پیرۆزێ کوردستانێ ب پارچەپەرووکەک دبینیت و داخاز دکەت خەلکێ کورکووکێ وەک وی پیرۆزیا ئالای ب پەرووک ببینیت . دیارە ڤان کابرایا دڤێت پەروەدەیا خۆ لسەر خەلکی بەڵاڤ بکەت ..! دیارە نزانیت خەلکێ کوردستانێ بگشتی و یێ کورکووکێ بتایبەت ، تەحەمولا گرتن و کوشتنێ لسەر دەستێ رژێما دکتاتوری بەعس کریە ، لێ تەحەمولا ھەلنەکرنا ئاگرێ نەورۆزێ و بلند نەکرنا ئالایێ پیرۆزێ کوردستانێ نەکریە ، ئەو ئالایێ ب ھزارا خەلکێ کوردستانێ خۆ ژبووی بلند راگرتنا وی شەھید کریە . دیارە ب دیتنا ( ئاراس شێخ جەنگیێ تالەباتی ) تنێ ئالایێ عیراقێ پیرۆزی ھەیە و ل ئاسمانی ھاتیە خار و ئالایێ وەلات و مللەتێ وی پارچە پەرووکە ..! . دێ نابیت خەلکێ کوردستانێ بڤان رەفتارێن وان حیبەتی بمینیت ، چونکی ئەوێن د لاندکا خیانەتێ دا مەزن دبن ، ھەر ئەڤ چەندە لێ دھێتە پێشبینیکرن ، نەک ئاڤاکرنا کۆچکێن ئازادیێ .