تارانی "ا‌میر" و به‌غدای "عمیل!"
سالار حيسامى
به تێپه‌ڕبوونی زه‌مان ده‌رکه‌وت، عه‌قڵییه‌تی شیعه و سوننه‌ی به‌رهه‌ڵستکارانی به‌عس، بۆ مامه‌ڵه‌کردن له‌گه‌ڵ کورد، هیچی له هه‌مان عه‌قڵییه‌تی شۆڤینیی به‌عسییه‌کان که‌متر نییه، به‌تایبه‌تی که شیعه‌ی زۆرینه بوونه حوکمڕانێکی ته‌واو عه‌یاری مه‌زهه‌بگه‌را و به هه‌موو شێوه‌یه‌ک سوننه‌یان په‌ڕاوێز خست، ئاکامه‌که‌شی سه‌رهه‌ڵدانی داعش و تاوان و کاولکارییه‌کانیان بوو، که تا هه‌نووکه‌ش مه‌ترسیی به‌هێزبوونه‌وه و سه‌رهه‌ڵدانه‌وه‌ی ئه‌و ڕه‌شبیره تیرۆریستانه ئه‌گه‌رێکی به‌هێزه! کوردیش له‌و هاوکێشه‌یه‌دا قوربانیی سه‌ره‌کی بووه.
گوێلک به چی ده‌بێته که‌ڵه‌گا و گامێش؟ ده‌بێ کا و کادێن و ئاخۆڕی بۆ دابین بکه‌ی، نان و ئاوی بده‌یتێ و له گورگان بیپارێزی. ده‌قاوده‌ق کوردی باشوور ئه‌وه‌ی بۆ شیعه‌ی عێراق کرد، که‌چی هه‌ر شاخیان ده‌رهێنا، به سه‌ره‌شاخان به‌ربوونه کورد! له سه‌رده‌می کابینه‌که‌ی نووری ئه‌لمالکی (سه‌رۆک وه‌زیرانی پێشووی عێراقی به‌ناو فیدڕاڵ)، ئه‌وه‌ی له 16ی ئۆکتۆبه‌ری 2017 به فه‌رمانی تاران ڕووی دا، به‌نیاز بوون ئه‌و کات جێبه‌جێی بکه‌ن و هێزی دیجله-شی بۆ دروست کرا و به‌ره‌و که‌رکووک جووڵێندران! که داعش مووسڵ-ی داگیر کرد، سه‌رباز و فه‌رمانده‌ی پێنج فه‌له‌قی سوپای عێراقی چه‌کی خۆیان به "دشداشه" ده‌گۆڕییه‌وه و قاره‌مانتیی پێشمه‌رگه ده‌رپێی به پێی ئه‌و سوپا شکستخواردووه‌دا کرده‌وه! به‌غدای بێ ئیراده و گوێ له مستی تاران، له بری ئه‌مه‌گناسی، بودجه و مووچه و قوتی خه‌ڵکی سڤیلیان بڕی و بازنه‌ی ئابڵۆقه‌کانی له سه‌ر هه‌رێمی کوردستان ته‌نگتر کرد! له‌و کاته‌وه تا ئێستاشی له‌گه‌ك بێ، پاسدار قاسم سوله‌یمانی، به‌رده‌وام له‌م وڵاته بێ سه‌روبه‌ره‌دا به ئاره‌زووی خۆی ته‌ڕاتێنی کردووه و به زه‌بری دۆلاره نه‌وتییه‌کان، میلیشیای جۆراوجۆری تێهه‌ڵکێشی سوپای قودسی به‌رفه‌رمانی کردووه هه‌تا سوننه‌ی پێ چاوترسێن بکا، دوای داعشیش، میلیشیاکانی له‌گه‌ڵ چه‌ند "کاڵفامی سیاسی"ی هاوزمانمان له سه‌ر مێزی ڕێککه‌وتنێکی پڕ له خیانه‌ت کۆکرده‌وه، هه‌تا ناوی هه‌رێمی کوردستان به ته‌واوی بسڕنه‌وه، که له نه‌به‌ردی پڕ حیماسه‌تی "پردێ"دا پێشمه‌رگه پێشی پێ گرتن و کۆتاییان به‌و لووتبه‌رزیئه هێنا.
هه‌ر سه‌رباز و فه‌رمانده‌یه‌کی هێزه‌کانی حه‌شدی شه‌عبی، پاسدار قاسم سوله‌یمانی به فه‌رمانده‌ی گشتیی هێزه چه‌کداره‌کانی عێراق ده‌زانێ، نه‌ک دکتۆر حه‌یده‌ر ئه‌لعه‌بادی! سه‌رۆک وه‌زیرانی عێراق، به بێ ره‌زامه‌ندیی قاسم سوله‌یمانی ناتوانێ ده‌روازه‌کانی سنوور و فڕۆکه‌خانه‌کان بکاته‌وه، چ بگا به‌وه‌ی بودجه و مووچه بۆ هه‌رێمی کوردستان بنێرێ..
ئه‌و ڕاستییانه وه‌ها زه‌ق بووه‌ته‌وه، که ناوه‌نده‌کانی توێژینه‌وه‌ی ئه‌منی و سیاسی له ئاستێکی به‌رفراوانی جیهانیدا به جاران باسیان کردووه. ئا به‌و بارودۆخ و هه‌ل و مه‌رجه‌وه، هیچ گومانێک له‌وه‌دا نه‌ماوه‌ته‌وه که ئه‌و تڕانزیته دیپلۆماسییه‌ی تاران به‌ره‌و به‌غدا دروستی کردووه، ته‌نیا مانۆڕی دیپلۆماسی و شتێکی ڕووکه‌شییه بۆ گه‌مه‌ی سیاسی و له واقیعدا هیچ پێویست ناکا، به‌رپرسانی باڵای کۆماری ئیسلامیی ئێران خۆیان ماندوو بکه‌ن و سه‌ردانی به‌غدا بکه‌ن. تاران "ا‌میر" و به‌غدا بووه‌ته "عمیل"، ئه‌م سه‌ردانه‌ی ئێسحاق جه‌هانگیری (جێگری یه‌که‌می سه‌رۆک کۆماری ئێران)یش ته‌نیا مانۆڕکی دیپلۆماسییه..
