پارتی دیموكراتی كوردستان وه‌ك یه‌كه‌م هێزی سیاسی پێشكه‌وتووخواز له‌ عێراق و كوردستان خه‌باتی مه‌ده‌نی و سه‌رده‌می به‌گرنگ زانیوه‌ بۆ ئه‌مه‌ش له‌(18ی شوباتی 1953) باوكی روحی نه‌ته‌وه‌یی كورد (بارزانی نه‌مر) بڕیاری دا به‌ دامه‌زراندنی ڕێكخراوێكی مه‌ده‌نی تایبه‌ت به‌ قوتابیان بۆ ئه‌وه‌ی توێژی قوتابیان هاوشانی چین وتوێژه‌كانی تر كۆشش بكه‌ن بۆ به‌دیهێنانی مافه‌ ڕه‌واكان و به‌گژداچونه‌وه‌ی زوڵم وسته‌مكاری و ڕوخاندنی كۆشكی سته‌م، هه‌ڵبته‌ ئه‌و بڕیاره‌ی باوكی روحی نه‌ته‌وه‌یمان بریارێكه‌ پڕیه‌تی له‌ حیكمه‌ت و ژیری، چونكه‌ له‌ لایه‌ك ووزه‌ی قوتابیانی كۆكردۆته‌وه‌ به‌و ئه‌وه‌ی له‌ سه‌نگه‌ری خۆیان كار بۆ بنه‌ماكانی شۆڕش بكه‌ن، له‌لایه‌كی تریش كادیر و شۆرشگێری به‌توانای ئه‌و توێژه‌ به‌ ئه‌كادیمی بۆ شۆرش و جوڵانه‌وه‌كان ئاماده‌ بكه‌ن له‌م سۆنگه‌یه‌وه‌ قوربانی كه‌میان نه‌داوه‌ بۆ خزمه‌تكردنی نیشتیمان وه‌ك (شه‌هید له‌یلا قاسم ومه‌ئمون ده‌باغ و ئازاد میران) و ده‌یان كادری تری لێهاتوو گه‌واهیده‌ی حاشاهه‌ڵنه‌گرن، له‌به‌ر بایه‌خ و گرینگی ئه‌م توێژه‌ بووه‌ (بارزانی نه‌مر) فه‌رموویه‌تی "قوتابیان سه‌ری ڕمن له‌گشت شۆرش و ڕاپه‌رینێك دا".
پێكه‌وه‌ به‌ستنی توێژی قوتابیان له‌پاڵ چین و به‌شه‌كانی تری كۆمه‌ڵگای كوردستانی وای كرد تواناكان باشتر بكرێنه‌ ئامرازی به‌رگری نیشتیمانی بۆ ڕاماڵینی سته‌مكاران و هێنانه‌دی حوكمڕانیه‌كی چاكەخواز. یه‌كێتی قوتابیانی كوردستان كار و چالاكیه‌كانی گه‌واهیده‌ری ئه‌وه‌ن كه‌ ڕێكخراوێك بووه‌ هه‌م له‌شاخ و هه‌م له‌شار دا به‌ئه‌ركی رێكخراوه‌یی خۆی هه‌ڵساوه‌و بێ بچڕان له‌هه‌وڵ دابووه‌ بۆ پێشخستنی سیسته‌می په‌روه‌رده‌ و خوێندن له‌ كوردستان به‌ شێوازی جۆراو جۆر وه‌ك (داواكاری - پڕۆژه‌ - فشاری مه‌ده‌نیانه‌) بۆ سه‌ر لایه‌نی په‌یوه‌ندی دار. ئێستاش جێی په‌نجه‌یان دیاره‌ له‌ به‌ره‌وپێش بردنی ڕه‌وشی خوێندن و په‌روه‌رده‌، سه‌ره‌ڕای ئه‌وه‌ی هه‌میشه‌ ده‌نگی قوتابیانی و كه‌م ده‌رامه‌ت و ماف خوار بووه‌.
پارتیمان پارتی دیموكراتی كوردستان وه‌ك چۆن دوێنێ سوودی له‌ تواناكانی قوتابیان وه‌رگرتووه‌ ، له‌م قۆناغه‌ هه‌ستیاره‌ی ئه‌مرۆش دا ده‌بێت كاریگه‌رتر له‌ كادیران و ئه‌ندامانی یه‌كێتی قوتابیانی كوردستان بروانێت، چونكه‌ ئه‌ندامان و كادیرانی یه‌كێتی قوتابیان له‌ روح و هه‌ناوی ئه‌و كۆمه‌ڵگایه‌ هه‌ڵقوڵاون و له‌ ناوه‌نده‌كانی خوێندن و په‌روه‌رده‌ به‌شدارن ده‌زانن له‌كوێی كۆمه‌ڵگا كاره‌سات و برینی گه‌روه‌ هه‌ن،له‌گه‌ڵ ئه‌وه‌شدا ده‌توانن به‌ ئاسانی چاره‌سه‌ری گرفته‌كان بكه‌ن و خزمه‌تی زیاتر پێشكه‌ش به‌نیشتیمان بكه‌ن.