ددەمەکێدا ئەم دبینین سەرکردەیێن ئیراقێ دگەل حکومەتا هەرێما کوردستانێ دەست ب دانوستان و چاڤپێکەفتنان کریە دڤێت ئەم ژبیر نەکەین کۆ حەتا چ رادەژی ئەو روینشتن بدلێ وان نەبن لێ نەچارن، ژبەرکو سەرۆکێ حکومەتا هەرێما کوردستانێ نیچیرڤان بارزانی ب سیاسەتزانی و سیاسەتا خوەیا سەردەمیانە کو بناغەیێ وێ لسەر بنەمایێ یاسا و دەستوور و ئاشتییە و دانوستاندن تێدا تاکە رێگەیا چارەسەرکردنیە گرتیەبەر و ل بەرامبەر ڤێ سیاسەتێ هیچ کەس و لایەنەک نەشێت خوەراگربیت یانژی خوە ژێ ڤەدزیت.
دیدارێن بارزانی ل ناڤخۆیا کوردستانێ دگەل لایەنێن سیاسی، دگەل بەرپرسێن بەغدا دناڤا واندا حەیدەر عەبادی سەرۆک وەزیرێن ئیراقێ و پشترا ئەو سەرەدانا گرنگ و بەرچاڤ بۆ ئیرانێ و ئەو پێشوازیا گەرم و لسەر ئاستێ بلندێ بەرپرسێن ئیرانی بۆ سەرۆکێ حکومەتی، هەروەها بەشداریکرن د کوربەندێ داڤۆس یێ ئابووردا و ئەنجامدانا پانورامایەکا دیدار و چاڤپێکەفتنا دگەل سەرۆکێن وڵاتێن جۆدا و وەزیرێن وەڵاتێن مەزنێن دنیایێ رامانەکا دی دایە وێ سیاسەتا حەتا نوکە سەرۆکێ حکومەتێ بکارئینای ئەوشی سیاسەتا نەرم و سەردەمیانەیە.
هێجەتا هەری مەزن یا بەغدا بۆ رەوانەنەکردنا موچەیێ فەرمانبەرێن هەرێمێ ئەو بوو کۆ گەندەڵی د میکلاکێ موچەخۆراندا هەیە، لێ ب رادەستکرنا سیستەمێ بایومەتری کو حەتا نۆکە ئیراقێ بخۆژی ب وی سیستەمی فەرمانبەرێن خوە رێکنەئێخستئینە و رێژەیا گەندەڵی و دوو موچەیێ ناهێلیت ئیراق نەشیا هیچ بەهانەیەکێ بگریت، سەبارەت ب ئامادەبوونا نوێنەرێ حکومەتا فیدرال ل بالەفرگە‌ها و دەرگەهێن سنووری دیسان حکومەتا هەرێمی ئامادەسازیا خوە نیشادایە، لێ هەموو کەسەک دزانیت کو نها لگوری دەستووری کوردژی بەشەکن ژ گەلێن ئیراقێ و نابیت حکومەتا ئیراقێ هزر د هندێدا بکەت فەرمانبەرێن کوردێن دەروازە و فروکەخانا لاببەت و عەرەبان ل جهێ وان دانیت، چونکی ل وی دەمی هیچ رامانەک بۆ هاولاتیبوونا کوردان نامینیت.
دوسیەیا پەترولێ کو دوسیەکا هەری حەساسە دناڤبەرا بەغدا و هەولێرێدا، لە هەموو کەسەک دزانیت کو دگەل برینا بودجە و موچەیێ هەرێمی ب بریارەکا تاکەکەسی ل بەغدا هەرێم کەفتە د رەوشەکا دژواردا، هەر ژبەر وێ چەندێژی ئەگەر بوریا فروتنا پەترولێ نەبا حکومەتا هەرێمێ نەدشیا وی نیڤ موچیێ نوکەژی دابین بکەت و دا بەغدا موچە وەک کارتەکا فشارێ بکارئینیت بۆ ژناڤبرنا قەوارەیێ سیاسی یێ هەرێما کوردستانێ، لێ هەرێمێ ئەو رێک لبەر بەغدا نەهێلا و دەست ب سیاسەتا سەربەخۆیا ئابووری کر.
ئەوا نوکە دهێتە چاڤەرێکرن ئەوە کو بەغدا شایستەین مادی یێن هەرێمێ دابین بکەت و ئەگەر دابیننەکەت ئەڤە رامان وێ چەندێیە کو بەغدا ریزی ژ هیچ پەیمانەکا خۆ ناگریت و گوهێ خۆ نادەتە نەسیحەتێن دەوڵەتان و بودجە و موچەێی هەرێمی وەک کەرەستەیەکێ ریکلاما کومکرنا دەنگان بخۆ بکاردئینیت کو دەرئەنجامێن وێ دە گەلەک دخراب بن لسەر رەشا هەرێم و بەغدایێژی.