با نه‌وه‌ی دواڕۆژ هه‌موو بزانن
سالار حيسامى
به‌شی یه‌که‌م
ئه‌مریکا ئاغای هه‌موو جیهان بێ
گهورهی بێ دین و ئیمانداران بێ
لای کورد هیچ نرخی نه‌ماوه چیدی
بێ به‌ڵێن ده‌رچوو، خۆخوازه ئیدی
ته‌ڵه‌که‌بازی وه‌ک خۆی له مێژوو
نموونه‌ی نییه، فێڵبازی بێژوو
کاتێ عێراقی ڕزگار کرد له به‌عس
ناوی له خۆی نا: هێزی فریادڕه‌س
شیعه‌ی له به‌غدا کرده باڵاده‌س
به تاڵانی برد پاه‌ری کاش و به‌س
به پیلان کوردی کرده برابه‌ش
ویستی بیکاته هاوبه‌شی ڕووکه‌ش
عێراقی وێران له‌سه‌ر ده‌ستی کورد
ڕێک خرایه‌وه، به دروشت و ورد
ده‌ستوور دانرا، گشت په‌سه‌ند کرا
به‌ڵام به ده‌ردی ماران گه‌ز برا
به باقه باقی هه‌ی دیموکراسی
شیعه‌یان کرده نه‌هه‌نگ بۆ ماسی
به‌ربوونه سوننه به فیتی ئێران
په‌ڕاوێز خرا گشت مافی کوردان
پۆستی کارتۆنیی سه‌رۆک کۆماری
دانرا بۆ کورد بێ سه‌رژوماری
هه‌ڤده له سه‌دی بودجه‌ی ساڵانه
دانرا بۆ کورد وه‌ک ده‌رماڵانه
ئه‌وه‌شیان هه‌رده‌م کلک و گوێ ده‌کرد
هه‌ر لێیان بڕی، تاکوو سفریان کرد
عه‌ره‌بی سوننه‌ش که‌وته به‌ر ڕقی
کۆن و دێرین و هیچ ناما حه‌قی
وه‌زاڵه هاتن، سوننه ڕاپه‌ڕین
بوونه قاعیده بۆ خه‌ڵک سه‌ربڕین
چوونه پاڵ داعش له عێراق و شام
بوونه خوڵامی (به‌غدادی)ی به سام
له ترسی داعش سوپای عێراقی
بێ ده‌رپێ ده‌رچوون بێ چه‌کی ڕاقی
هامه‌ر و چه‌کی پێنج فیرقه‌ی سوپا
که‌وته ده‌ست داعش، له مووسڵ جێ ما
دڕنده‌کانی سه‌رکه‌وتووی سه‌رخۆش
مه‌ستی سه‌رکه‌وتن، به جۆش و خرۆش
دوو له سێ به‌شی عێراقیان له پڕ
داگیر کرد و خه‌ڵک به‌ردران له گڕ
( زیندوو به چاڵ و سڤیل سووتاندن
باجی زۆر قورس و خه‌ڵکی ڕووتاندن
ده‌ست بۆ نامووسی ئێزیدی بردن
مه‌حکوومکردنی پیاویان به مردن
په‌لاماردانی خاکی کوردستان)
بووه کارنامه‌ی ڕه‌شبیری دا‌ستان
بۆیه به‌په‌له سه‌رۆکی کوردان
بڕیاری دا بۆ شه‌ڕ و به‌رخۆدان
به‌رگی پیرۆزی پێشمه‌رگه‌ی پۆشی
بێ چه‌ک و تفاق زۆر به په‌رۆشی
هێزی پێشمه‌رگه‌ی وڵاتپارێزی
جووڵاند بۆ جه‌نگی جه‌هل و خوێنڕێژی
تیرۆریستانی داعش به پڕتاو
به بۆمبی خۆکوژ به هه‌زاران داو
به چه‌کی زۆر و قورسی ئه‌مریکی
به شه‌ڕی به‌ره و جه‌نگی چریکی
ویستیان پێشمه‌رگه به چۆکدا بێنن
هیچ نه‌یانزانی خۆ ده‌پسێنن
ئه‌مریکا ئه‌و کات له‌گه‌ڵ یارانی
ته‌نیا به هێزی چڕی ئاسمانی
بوونه پاڵپشتی هێزی پێشمه‌رگه
دوژمن نه‌یده‌گرت له‌و جه‌نگه به‌رگه
خوێنی چه‌ند هه‌زار ڕۆڵه‌ی ئه‌م گه‌له
ڕژا به ناحه‌ق به داو و ته‌ڵه
ئه‌فسانه‌ی داعش پووچه‌ڵ کراوه
پێشمه‌رگه بوو به ڕه‌مزی براوه
که‌رکووک و هه‌موو ناوچه‌ی دابڕاو
نه‌خشه‌ی دزراو و خه‌ریته‌ی دڕاو
ساغ کرانه‌وه و که‌وتنه ژێر چه‌تری
پێشمه‌رگه‌ی نه‌به‌رد، مه‌تر به مه‌تری
ته‌فروتوونا بوون داعشی زاڵم
به‌غداش ڕق له دڵ له حاڵ و ماڵم
حه‌شد و پاسداری وا تێک ترنجان
هه‌تا هه‌ڵکۆڵن خاکم وه‌ک جورجان
بۆیه کورد ده‌بوا خۆی ساغ کاته‌وه
یان دیل و کۆیله، یان بای داته‌وه
خۆی له عێراقی گیرۆده‌ی مه‌زهه‌ب
که شیعه و سوننه‌ی بوونه‌ته له‌هه‌ب
جیا کاته‌وه و ببێ به ده‌وڵه‌ت
ئه‌مریکاش سوور بوو که نایدا مۆڵه‌ت
به‌ڵام ئیراده‌ی پۆڵایینی گه‌ل
سه‌رکه‌وت له داوێن به‌ره‌و دوندی که‌ل
25ی 9 به سه‌رفرازی
هاته‌دی خه‌ونی کورد و مورازی
له ئه‌یلوول مێژوو دره‌وشایه‌وه
گشتپرسیی کوردان ده‌نگی دایه‌وه
کوردی خاراوی له گڵ ده‌رهاتوو
له قوربانیدان هیلاک و ماندوو
له که‌رنه‌ڤاڵ و جه‌ژنی ڕیفراندۆم
پرسی: قه‌ره‌ج نیم، بۆ ده‌مکه‌ن به دۆم؟
ملیۆنان کوردین هه‌تا هه‌نوکه
لێمان ده‌ڕوانن وه‌کوو جنۆکه
له نیشتمان و خاک و زێدی خۆ
پیلان ده‌گێڕن بۆ مه‌ی ڕه‌نجه‌ڕۆ
وا سه‌دان ساڵه ده‌مانخنکێنن
ده‌وڵه‌ت به کوردان ڕه‌وا نابینن
له‌وه‌تی هه‌ن له دژی کوردن
چه‌ند له پیلانا به ده‌ست و بردن
بۆیه وا ده‌نگمان دا به سه‌ر‌وه‌ری
به سه‌ربه‌خۆیی و کیانی دادوه‌ری
..
ئابڕووتکاوان له به‌غدا و تاران
ته‌نگه‌تاو بوون و وه‌ک شاره ماران
هه‌ر لێک ده‌لوولان تا بمانگه‌زن
به‌ڵام ده‌ترسان هه‌ر زوو ببه‌زن
باش ده‌یانزانی پێشمه‌رگه‌ی نه‌به‌رد
لووتیان ده‌شکێنێ سه‌ر ده‌درێ له به‌رد
تاقمێ بێ ئابڕووی کوردیان به کرێ گرت
به پل ته‌قاندن له خشته‌یان برد
برا و زڕبرای کۆڕی شێخ جه‌نگی
کوڕه گهورهی مام، زۆر به ده‌به‌نگی
که‌رکووک و هه‌موو ناوچه‌ی دابڕاو
ئه‌و خاکی کورده‌ی به خوێن ئاودراو
کردیان به هه‌دیه بۆ حه‌شدی وه‌حشی
کردیانه خۆراک چه‌شنی شێخ مه‌حشی
بۆ سفره‌ی قاسم مام سوله‌یمانی
حیسابیش نه‌کرا به هاوپه‌یمانی
وه‌ک کرێگرته و به‌رده‌ست و ته‌ندیس
بوونه خوڵامی ئه‌بوو مه‌هه‌ندیس
لێیانی ده‌خوڕی هادی عامری
وه‌ک که‌ر له جۆگه‌ی قوڕ و لیتاوی
ئاڵای کوردستان له قودسه‌که‌یان
داگیرا و سووتا و به‌ربوونه خه‌ڵکان
دیسان ته‌عریب و کۆڕه‌وی کوردان
تاڵانی ماڵ و ده‌ست له نامووسدان
له مێژووی دوور و نزیک و سه‌رده‌م
خه‌یانه‌تی کورد رووی داوه هه‌رده‌م
بۆیه وا قه‌ده‌ر قه‌هری لێ کردووین
دڵدار له خۆڕا ده‌ڵێ نه‌مردووین
کوا زیندووین کاتێ ئاڵا نه‌وی بێ
سه‌رۆکی خۆمان حه‌ز که‌ین که‌وی بێ؟!
