بزاڤا رزگاریخوازیا گەلێ کورد ل باشوورێ کوردستانێ ، وەک بزاڤەکا نشتیمانی و نەتەوی ب درێژاھیا نێزیکی سەد سالان دەست ب خەبات و قوربانیدانێ کریە ژ پێخەمەت ب دەست ڤەئینانا ماف و ئارمانجێت ڕەوا یێن خەلکێ کوردستانێ ، د پرانیا ڤان سالێن خەباتێ دا پارتی دیموکراتی کوردستان ب رێبەرایەتیا بارزانی نەمر و پاشان سەرۆک مەسعود بارزانی سەرکێشیا ڤان شۆرەش و سەرھەلدانا کریە , ژبەرکۆ کوردستان ھاتیە داگیرکرن و دابەشکرن لسەر وەلاتێن دەوروبەر کۆ خودان شیانێن ماددی و مەعنەوی نە ، ھەر لدەسپێکێ رێبەرایەتیا ڤێ بزاڤا نەتەوی و نشتیمانی ، ب بەرنامە و پلانێن دارشتی دەست پێکریە و دەست نیشانکرنا قۆناغا ئێک ژڤان پلانان بوویە .
وەک مافێن رەوشەنبیری و ئیداری و پەروەردەیی ، ئۆتۆنۆمی ، فیدرالی و سەرخۆبوون . ئەڤەژی حیکمەت و لێزانینە ، ئەگەر بڤی رەنگی نەبا مە نەدشیا ( ب پلەکێ بچینە سەرێ گرەکێ ) ، نەوەک درۆشمێن ھندەک حزبێم کوردستانی کو درۆشمێن لخۆ مەزنتر بلند دکر و پاشان دبن وان درۆشماندا شکەستن .
لێ پارتی دیموکراتی کوردستان دڤان قۆناغان دا بزاڤا رزگاریخوازیا کوردستانی شاراند و بنەمایێن مۆکۆم بۆ دانان . وەک سەرکەفتنێن شۆرەشا مەزنا ئیلۆنێ پشتی گیانێ شۆرەشگێریێ و نەتەوایەتیێ دناڤ خەلکێ کوردستانێ دا مۆکۆم و بەڵاڤ کری ، دانپێدانا نیڤ دەولەتی و ھەرێمایەتیا ل رێکەفتنا ١١ ێ ئادارا سالا ١٩٧٠ دا ، دابین کر ، پشتی رێکەفتنا خیانەتکاریا نیڤ دەولەتیا ( ئەلجەزائیر ١٩٧٥ ) ، شۆرەشا پێشکەقتنخوازیا گۆلانێ لێ بەرھەم ھات ... ھەتا دگەھیتە قۆناغا راپرسیا سەرخۆبوونا کوردستانێ ل ٢٥/٩/٢٠١٧ . ویستگەھا دووماھیێ یا ئارمانجا بزاڤا رزگاریخوازیا گەلێ کوردستانێ سەرخۆبوون بوو ، ئەوا گاڤێن ئەکتیڤ بۆ ھاتیە ھاڤێتن و شەمەندەفر لبەر دەرگەھێ ڤێ ویستگەھێ بوو . لەوما دشێین بێژین ھەتا ڤێ قوناغێ بزاڤا رزگاریخوازیا گەلێ کورد بسەربلندی و شانازی ھەمی ئاستەنگ بڕین . لێ بمخابنیڤە دگەل چونەژوورا شەمەندەفرێ بۆ ناڤ وێستگەھێ جارەکا دی گرۆپێ خاینەتکارێن دیرووکی ئەوێن دناڤ ئێکەتیا نشتیمانی کوردستان دا وەکی زۆر جارێن دی بوونە داردەستێن داگیرکەرا و بۆ مەبەست و بەرژەوەندێن کەسی یێن ئیداری و دارایی ل ١٦ ئیکتۆبەرێ بوونە ئەکتەرێن سەرەکی د سیناریۆیا شانۆگەریا ژناڤبرنا دەسکەفتێن نەتەوی و نشتیمانی یێ، کوردستانێ و ڤەگەراندنا وێ بۆ قۆناغێن بەری ب دەھان سالا ب دەرھێنەریا ئیرانێ و حکومەتا شیعەگەریا عیراقێ . ھەرچەندە پەردا ئیکێ یا ڤێ شانۆگەریێ د بەرژەوەندا واندا ب داوی ھاتی ، لێ شانۆگەریەکا بێ بینەر بوو ..! چونکی دربا مەزن ل جەماوەرێ خۆ و خەلکێ کوردستانێ دا دەمێ کەرکووکا دلێ کوردستانێ و دەوروبەرێن وێ ب خیانەتەکا نشتیمانی رادەستی ھێزێن داگیرکەرا کری و دژی ئەنجامێن راپرسیا سەرخۆبوونا کوردستانێ راوەستان کۆ بریارا پرانیا ھەرە زۆرا خەلکێ کوردستلانێ بوو . ژلایەکێ دی دڤێ خیانەتا واندا دیار دبیت وان کوردستانەکا داگیرکری و ژیانا بندەستیێ و نۆکەریێ پێ باشترە ل کوردستانەکا سەربخۆ و بەختەوەر لسەر دەستێ پارتی دیموکراتی کوردستان و ھەڤپەیمانێن وێ و سەرۆک مەسعود بارزانی . بەلێ قوناغا ئێکێ یا پیلانا خیانەتکاریا وان سەرگرت ، لێ جھێ سەرفیرازیێ یە پیلانێن وان یێن مەزنتر و دارشتیتر بۆ داگیرکرنا ھەمی ئاخ و خەلکێ ھەرێما کوردستانێ و نەھێلانا ھەرێما کوردستانێ وەک کیانەکێ سیاسی و یاسایی و دەستووری یێ خۆ برێڤەبرنێ ، ژناڤ بر و خەونا وان یا مێژینە بجە نەھات ، تنێ شیان رێکا سەرخۆبوونا کوردستانێ دوورتر بکەن و پری ئاستەنگ بکەن ، بڕینا ڤێ رێکێ و لادانا وان ئاستەنگا ژی بۆ پارتی و سەرۆک بارزانی و سەرۆکێ حکومەتا ھەرێما کوردستانێ دگەل ھێزێن نشتیمان پەروەرێن کوردستانێ گاڤەکا نەیا بزەحمەتە و تنێ پیَِـڤی ب دەمەکێ کورتە ، چونکی پارتی شیایە قوناغێن دژوارتر بسەرفیرازی ببڕیت وەک قوناغا پشتی رێکەفتنا خیانەتکاریا نیڤ دەولەتیا جەزائیر و ئەنفال و کیمیا رانکرنێ . ھەر نھو پشتی بوورینا چەند مەھەکان ب سیاسەت و لێزانینا سەرۆکێ حکومەتا ھەرێما کوردستانێ نیشانێن سەرکەفتنێ وڤەزڤرینا سەنگ و پێگەھێ ھەرێما لسەر ئاستێ جیھانێ سەرھەلدایە و چەوا پارتی بسەرفیرازی بسەر ھەمی ئاستەنگێن دیرۆکی زاڵ بوویە و وەسا دێ بسەر ڤان ئاستەنگا ژی زاڵ بیت ئەوێن ب رێ نیشاندەریا گرۆپێ خیانەتکاریا ناڤ ئێکەتیێ دا ل شازدێ ئکتۆبەرێ دژی بەرژەوەندێن گەلێ کورد و ھەرێما کوردستانێ ھاتیەکرن و دەسکەفت و شانازیێن وان لڤێ خیانەتێ تنێ دێ روورەشتی و شەرمرزای بیت .