ھەرچەندە ل وەلاتێن دیموکراسی ھەلبژاردن باشترین رێکە بۆ بدەستڤەئینانا ماف و ئارمانجێن نەتەوی و سیاسی و جڤاکی و ئیداری ، بەرۆڤاژی ل وەلاتێن دکتاتوری و دوور ژ پرنسیپێن دیموکراسیەتێ ، ئەڤ ماف و ئارمانجە دھێنە بنپێکرن ، ھەرچەندی عیراقا نوو یا پشتی رژێما دکتاتوری یا بەعس لسالا ٢٠٠٣ ێ وەکی سیتەم و دەستوور لسەر بنەمایێ دیموکراسیەتێ ھاتیە ئاڤاکرن ، پشتی خۆ لسەر پێگرتنەڤێ سەرکردێن عیراقی بەرامبەر کورد و کوردستانیا و پێکھاتێن نە شیعە بەرەڤ دکتاتوریەتێ و خۆ سەپاندنێ چوون ، چونکی بەرامبەر وان دەستوور و یاسا و پرانیا رێکەفتنێن سیاسی فەرامۆشکرن و ب بەھانەیێن بێ بنەما زۆربەری نوونەرێن وان ل دەسھەلاتا فیدرالی دوور ئێخستن . پشتی پیلانا خیانەتکاریا ١٦ ێ ئکتوبەرێ ب پالپشتیا گرۆپێ بالا دەستێ دناڤ ئێکەتیا نشتیمانی کوردستان دا کورکووک کو باژێرەکێ رەسەنێ کوردستانێ یە ھاتە داگیرکرن و دوور ل رەوشتنێن وەلاتیبوون و نشتیمانیبوونێ ، ھێزا لەشکریا حەشدا شیعی لسەر خەلکێ وێ سەپاندی یە کۆ ھێزەکا ڕەگەز پەرستی و تائیفەگەریا ھەلگرا ھزرا شوفینیا ئیرانی یە ، لەوما ھیچ پرۆسەیەکا دیموکراسی ل وێ دەڤەرێ سەرناگریت ئەگەر بەرژەوەندێن داگیرکەرا نەپارێزیت .
نھو کۆ عیراقێ بەرەڤ ھەلبژاردنێن گشتی دچیت ، پێدڤی یە خەلکێ کورد ل کەرکووک و دەوروبەر و دەڤەرێن دیتر یێن داگیرکری وەک بەرسڤدانەک بەرامبەر ھێزا داگیرکەر بایکوتا ڤان ھەلبژاردنان بکەت و بڤێ بایکۆتکرنێ بسەلمینین کۆ ئەو لایەنێ ئیرادا خۆ لسەر سەپاندنی ھێزەکا داگیرکەرە و نە جھێ رەزامەندیا خەلکی یە ، ھەر لایەنەکێ بڤی دەست و داری بەشداری ھەلبژاردنان بکەت شەرعیەتێ ددەتە ھێزا داگیرکەر و رازیبوونە ب داگیرکەریێ ، پارتی دیموکراتی کوردستان دەمێ ئەڤ بریارا بایکۆتکرنا ھەلبژاردنان ل کەرکووکێ دای بریارەکا نشتیمانی یە و لدەم و جھێ خۆدایە . چونکی بەشدارینەکرنا خەلکی لڤان ھەلبژاردنا ل کەرکووکێ و دەڤەرێن دیتر ژبلی کو کوردستانبوونا کەرکووکێ دێ سەلمینیت ، لیەر ئاستێ عیراقێ و جیھانێ ژی دێ بیتە بەلگەیەکا باوەرپێکەر کۆ دەڤەرەکا داگیرکری یە و باشترین بەرسڤە بۆ وێ ھێزێ و وان لایەنێن کوردی یێن خیانەتکار و پشتەڤانێن داگیرکەرا . دبیت ژی سەرنەکەفتنا پرۆسا دەنگدانێ ل وێرێ بن سیبەرا داگیرکاریێ ببیتە جھێ مایتێکرنا سازیێن نیڤ دەولەتی و پشتەڤانەک بۆ ھەرێما کوردستانێ و گڤاشتن لسەر حکومەتا عیراقێ بھێنە کرن بۆ بجە ئینانا ماددێ ١٤٠ ێ دەستووری یێن تایبەت ب کەرکووک و دەڤەرێن دیتر یێن کوردستانی یێن دەرڤەری ئیدارا ھەرێما کوردستانێ کو نھو ب دەڤەرێن داگیرکری دھێنە ھژماردن . لەوما پێدڤی یە ھەرنھو خەلکێ ڤان دەڤەرا لسەر باکۆتکرنا ھەلبژاردنان کاربکەت ، داکۆ جارەکا دی شکۆیا وان بزڤریت ، ئەو شکۆیا دڤان ھەیڤاندا لسەر دەستێ ھێزێن داگیرکەر و دیڤەلانکێن وان ھاتیە شکاندن و مەزنترین بێ رێزی بەرامبەر کوردا کری ، چ بەرامبەر ئالایێ پیرۆزێ کوردستانێ یان پێشمەرگەھی و سەرکردێن کوردا . ژلایەکێ دی بایکوتکرن دێ بیتە رێگریکرن ل ھەمبەر ھەولێن ب عەرەبکرنا کەرکووکێ و دەوروبەر ئەوێن ھەر ل پشتی خیانەتا ١٦ ێ ئکتۆبەرێ دەسپێکری ، دیسان تۆلڤەکرن و رێگریکرنە ل ھەمبەر جینوسایدکرن و شەھیدکرن و دەربدەرکرنا ب ھزاران کوردان ل حەوێجە و دەڤەرێن دیتر . لسەر ئاستێ کوردستانێ ژی بایکۆتکرن دێ بێتە روورەشی و شەرمرزای بۆ گرۆپێ خیانەتکارێن کورد ئەوێن بنەمایێن کوردایەتیێ و نشتیمانیبوونێ ژدەست دای و بووینە داردەستێن داگیرکار و پاسدارێن ئیرانێ و پرۆژێ شیعەگەریگرنا دەڤەرێ ژلایێ ئیرانێ ، دژی بەرژەوەند و ئازادی و رزگاریا کوردستانێ ژپێخەمەت بدەستڤەئینانا دەسکەفێن ماددی .