دەزانم تووشی نەخۆشی دژە پارتی بوون، دەزانم خەون بە لەناوچوونی پارتیشەوە دەبینن، ئەوەش دەزانم بۆ گەیشتن بەو خەونە (٥٤) ساڵە هەرکاتێک بۆتان هەڵکەوتبێ لە پێخەفی دوژمنان و داگیرکارانی فارس و عەرەبدا سەرخەوی چاوەڕوونیتان شکاندووە، بۆیە لە رووی پەرۆشی و بەزەیی هاتنەوەم بە ئێوەی دژە پارتی دەڵێم: هەڵەن و زۆریش هەڵەن ئەگەر پێتان وابێ لە پێحەفی دوژمناندا بە خەونی لاوازی و لەناوچوونی پارتی دەگەن، چونکە خەونی ئێوە لەناو پێخەفی دوژمناندا شۆڕشگێڕ و سەربەخۆخوازان بەئاگا دێنێتەوە و زیاتر لە دەوری پارتیان کۆ دەکاتەوە، بۆیە دەڵێم: ئەگەر دەتانەوێ بەرە بەرە پارتی لاواز بکەن و دواتر بە یەکجاری لەناوی بەرن، رەچاوی ئەم ئامۆژگاریەی من بکەن:ـ
ئێوە لە پێخەفی دوژمنان وەرنەدەر و لە گۆڕەپانی کوردایەتی و زووتر گەیاندنی کورد بە سەربەخۆیی پێشبڕکێ لەگەڵ پارتی بکەن، چونکە ئەوەی من و هەزارانی وەک منی لە پارتی کۆ کردۆتەوە لە خۆشەویستی پارتی نییە، بەڵکو لە رقی دوژمنکاری داگیرکارانی کوردستان و هەڵوێستی ناکوردانەی ئێوەیە، ئەوەش وەک ئەو نوکتە وایە کە لە شیعەیەکیان پرسی: ئەرێ عەلی و حوسێنتان ئەوەندە خۆش دەون کە ساڵانە بە لەخۆدان و شیوەنگێڕان یادیان دەکەنەوە؟ شیعەکە گوتی نەخێر، ئەوەی دەیکەین لە خەفەتی عایشە و عومەرە.
لە کۆتایی ئامۆژگاریەکەدا دەڵێم: ئێوەی دژە پارتی واز لە دژایەتی پارتی و خەوی ناو پێخەفی دوژمنان بێنن، منیش خەونی لاوازی و لەناوچوونی پارتیتان بۆ دێنمەدی، چونکە ئەوە هەڵوێستی ئێوەیە پارتی بەو هێزە هێشتۆتەوە.