لە دنیای مۆدێرن و پیشکەوتوودا کە سیاسەت لە سەر بنەمای ، بەرژەوەندی و مودیرییەتی بار و دۆخ دادەمەزرێ هیچ تاک و حکومەت و کۆرێک نییە کە باوەری هەبێ بەو قسانە کە بە نیسبەت عێراقەوە دەیکەن
ناسنامەیەکی نەتەوەیی یەکگرتوو لە عێراقدا، بەو دوا کەوتوویی ئابووریی و کۆمەلایەتییەوە کە بوونی هەیە و بەو هەموو دوژمنایەتیی و جەرایمەوە کە رۆژانە لە بەرانبەر پێكهاتەی جیاواز دا پەیرەو دەکرێ ، دەبێ وەک خەون و خەیال چاوی لێ بکرێ.
کەس لە عێراقدا باوەری بە کەس نییە ئەگەر بێتوو وەک سووننە و شیعە و کورد و پێکهاتەی تر چاو لە عێراق بکەین. ئەم ئاواتە جوانە رۆژئاواییە دەتوانێ بەرهەمی پرۆسەیەکی پەنجا سالی داهاتوو بێت ئەگەر بێتوو گشت پێکهاتەکان سەربەخۆیی خۆیان وەرگرین و بکەوێنە ناو رەوتێکی ژیانی گەشەی ئابووریی و کۆمەلایەتی و لە دواییدا بۆ خۆیان بگەنە ئەو قەناعەتەوە کە دەتوانن پێکەوە بژین و ئەوەش بە قازانجیانە. ئێستا ئەوە نامومکینە.
گەندەلی و حکمرانی باش لە عێراقدا بەو پێکهاتەی کۆمەلایەتی و سیاسییە کە هەیەتی نامومکینە، کۆنتراکت لە ژیانی کاریی و یاسای بازاری کار و پاراستن شەریکات و پاراستنی مافی تاک بەرانبەر بە دەولەت و کار بەدەست ، گشتیان پرۆژەی مێژوویین و زۆری پێدەچێت تاکوو لە عێراقدا جێگیر بکرێن.
حکوومەتی ناوەندی هێز دەنێرتە کوردستان و بە شێکی زۆری ئەو سەروەریی نەتەوەییە کە لە دەستوردا بۆ کورد مسۆگەر کرا بوو دەخاتە ژێر پێ و دەست دەکاتە سووتاندن و وێران کردنی مالی کورد لەو ناوچانەدا کە دەستی دەروات و بە هیچ جۆرێک حازر نییە لە گەل دەستەلاتی کوردیی مسۆگەر کراو لە دەستوردا هەلست و کەوتی هەبێ، خاوەن ئەو شەرعییەتیە نییە کە متمانەی خەلکی کورد بە دەست بێنێت، ئەگەر شەرعەییەت و متمانەی خەلک پێوەر بێ بۆ حکمرانی. بۆیە ئاسۆی حکمرانی بەغدا بە سەر کورد دا تاریک و لێلە.
کورد دەیزانی دەکەوێتە بەر هێرش قسەی خۆی کرد و کەوتە ژێر هێرش و ئێستا بە گۆێرەی کتێب رەفتار دەکات تاکوو شکست بە سیاسەتی شۆڤۆنی و تایفی و بێ سەر وبەر بێنێت بە ر لەوەی زیاتر زەرەر بکات، بەلام ئەمە تاکوو هەتا هەتایی ناتوانێ بەردەوام بێ
سیاسەتی نێو دەولەتی دەبێ ئەوەی بزانێ کە رۆژێک دێت کە حکوومەتی کوردیی مەجبوور دەبێ لە جاتی دێفاع و بەرگری لە مووچەی کورد دیفاع لە کەرامەتی کورد بکات. هەموو لایەک دەبێ خۆیان بۆ ئەو رۆژە حازر بکەن .
بەلام دنیا بۆ وا رەفتار دەکات؟ لە ئابوورییدا ئەگەر بانکێک خوازیار بێ کە لە ولاتێکدا بانکی خۆی دابمەزرێنێت، دراسەی ولاتە کە دەکات بزانێ چەند لە سەدی خەلک حەساباتی بانکیان هەیە و مووچە چۆن دابەش دەبێت و پاشەکەوتی تاکی چەندەیە تاکوو بریار بدات بۆ چوونە ناو ئەو بازارەوە. زۆر جاران ئەگەر ولاتێک زۆر پێنەگەیشتوو بێ دەلەن ئەم ولاتە بۆ بانکداریی نابێت،/ نات بەک ئێبێل/ بە ئینگلیزی.
عێراق ولاتێکی/ بانک ئێبل/ نییە لە رووی سیاسییەوە بۆیە سیاسیەکانی ئەوروپا دەلێن با تێک نەچێت و لەوە خەراپتر نەبێت لەبەر ئەوە کە دەزانن هیچی تری لێ ساز نابێ. ئەوەی کە یەکەتی ئەوروپا پشتیوانی لە یەکەتی عێراق دەکات و خوازیارە حکمرانی باش جێگیر بکرێت و قسە خۆشەکانی تر دووپات کاتەوە هۆیەکەی دەگەرێتەوە سەر بن بەستی سیاسەتی دەرەوە بە نیسبەت عێراقەوە. ئەمە خالی بە هێزی عێراق نییە . ئەوان مەجبوورین بارو دۆخ ئیدارە و مودیرییەت بکەن . ئەم سیاسەتە داهاتووی نییە و گشت خەلکانی عێراق لێ زەرەرمەند دەبن. سالی ئەم سال دەبێتە ئەو سالە کە ناوەندی سیاسەتی جیهانی ئامریکا زەخت دەخاتە سەر ئەوروپا بۆ قەبوولی گۆڕان لە ناوچە دا.
لەم ناوەدا مەرجە کە کورد ستراتێژیی هەبێ و کاری رۆژانەشی بەرێوە بەرێت ، بە بێ ستراتێژی داهاتوومان تاریک و ناروونە، رێفراندۆم ستراتێژیی کوردی بە دنیا راگەیاند ، ئەوە دەبێ ببێتە بنەمای سیاسەتمان و پاشان بزانین لەگەل ئەم عێراقە و سیاسەتی نێو دەولەتی بەرژەوندیخوازە دەگەینە کێۆێ. زۆری پێناچێت تاکوو دیسکۆرسی کوردیی و رێبازی سەرۆک بارزانی دەبێتە خەت و بۆچوونی سەردەست.