ژبۆى كو عه‌بادى نه‌چار بكه‌ن دژى خه‌لكێ كوردستانێ ب راوه‌ستیت، په‌رله‌مانێ ئیراقێ پشتى ب رێكا سێزده خالان رێكێن دژایه‌تیكرنێ ئاراسته‌ى عه‌بادى كر، كو ئێك ژ وان راوه‌ستاندنا گه‌شتێن نێڤده‌وله‌تى یه ل ل هه‌ردوو فرۆكخانه‌یێن هه‌ولێر و سلێمانیێ، هه‌لبه‌ت راوه‌ستاندنا گه‌شـتێن نێڤ ده‌وله‌تى ل فرۆكخانه‌یێن هه‌رێمێ ژ لایێ عه‌بادى ڤه ب وێ ئارمانجێ نه‌بوویه كو ئه‌و داهاتا ل وێ فرۆكخانه‌یێ ب ده‌ستێ حكومه‌تا هه‌رێمێ دكه‌فتن، ئیدى نه‌مینیت، ئانكو ئه‌گه‌ر عه‌بادى و حكومه‌تا وى مه‌ره‌مێن ئابورى بۆ ڤێ بریارێ هه‌بن ژى مه‌ره‌مێن سه‌ره‌كى نه‌بووینه، به‌لكو مه‌ره‌مێن لاوه‌كى بوویه و ئارمانجێن وێ بریارێ ئه‌و بوویه كو په‌یوه‌ندیا هه‌رێما كوردستانێ ب جیهانا ده‌رڤه نه‌هێلیت، بۆ ڤێ یه‌كێ ئارمانج راوه‌ستاندنا سه‌ره‌دانێن دبلۆماسی یێن حكومه‌تا هه‌رێمێ و بۆ ده‌رڤه و به‌روژڤاژى ژى هه‌ر دروسته، لێ ئه‌گه‌ر ئه‌م ته‌ماشه‌ى ئالیێ ئابوورى بكه‌ین، بێگومان وێ بریارێ زیان ب ئابۆرێ هه‌رێمێ گه‌هاند، چونكى كوژمه‌كێ زۆرێ دراڤى كو ژبۆ موچه‌یێن فه‌رمانبه‌رێن هه‌رێمێ دهاته ته‌رخانكرن ئیدى ل ڤان هه‌ردوو فرۆكخانه‌یان نه‌ما و ب ڤێ بریارا عه‌بادى زیان ب خه‌لكێ هه‌رێما كوردستانێ گه‌هاند، لێ ژ ئالیێ دبلۆماسیڤه نه‌ك عه‌بادى نه‌شیا وێ رێكێ ل هه‌مبه‌ر سیاسه‌تڤان و به‌رپرسێن حكومه‌تا هه‌رێمێ بگریت، به‌لكو پێگه‌هێ حكومه‌تا هه‌رێمێ و گرنگییا سه‌رۆكێ حكومه‌تێ نێچیرڤان بارزانى ل سه‌ر ئاستێ نێڤ ده‌وله‌تێ بۆ چاره‌كرنا قه‌یرانێن ناڤبه‌را ئیراقێ و هه‌رێمێ گرنگتر لێكر، چونكى ئه‌گه‌ر شاندێن دبلۆماسیێن جیهانێ ژبه‌ر وێ بریارا عه‌بادى نه‌كارن بهێنه هه‌ولێرێ، ئه‌و رامانا وێ یه‌كێ ناده‌ت ئیدى ل وێرێ عه‌بادى هه‌موو رێك گرتن، واته عه‌بادى نه‌شیا ئه‌و هه‌رێما پێشتر نموونه‌یا ئارامى و پێكڤه‌ژیانێ بوویه دناڤ جه‌رگێ رۆژهه‌لاتا ناڤین و پێگه‌هێ ئارامێ خه‌لكێ ئیراقێ هه‌موویێ بوویه؛ ل پێش چاڤێ سیاسته‌ڤان و وه‌لاتێن زلهێزێن جیهانێ ڤه‌شێریت، به‌لكو ئه‌ڤ وه‌لاتێن زلهێز ژ بۆ خاترا حكومه‌تا هه‌رێما سه‌ره‌دانێ خوه‌یێن دبلۆماسی بۆ ئیراقێ هه‌لوه‌شاندن و چ چێژ و مفا د وێ سه‌ره‌دانا ئیراقێ نه دیتن ئه‌گه‌ر بێ سه‌ره‌دانا هه‌ولێرێ بیت، نموونه‌ژى پێشتر وه‌زیرێ ده‌رڤه‌یا ئه‌لمانیا ژ به‌ر رێگریێن عه‌بادى بۆ سه‌ره‌دانا وى یا هه‌ولێرێ وى سه‌ره‌دانا خوه بۆ ئیراقێ ب گشتى كانسلكر، د هه‌مان ده‌مى دا ل پال ئه‌لمانیا، پێشتر فه‌ره‌نسا و ل دووڤ به‌رلینێ ژى، له‌نده‌نێ داخوازنامه‌یا فه‌رمى ژ بۆ سه‌رۆكێ حكومه‌تا هه‌رێمێ هنارتن كو سه‌ره‌دانا وه‌لاتێ وان بكه‌ت و ئاریشه‌یا ناڤبه‌را هه‌ولێرێ و به‌غدایێ ل پایته‌ختێ وه‌لاتێ وان بهێته گه‌نگه‌شه كرن، ل هه‌موو جهێن كو پێشوازى نێچیرڤان بارزانى و شاندا ل گه‌ل هاتییه كرن، جه‌خت ل سه‌ر پێگیرى كرن ب ده‌ستورێ ئیراقێ هاتییه كرن و ئه‌و ل گه‌ل رێكێن حكومه‌تا هه‌رێمێ بۆ چاره‌كرنا ئاریشه‌یان هه‌ڤرا بووینه، كه‌واته عه‌بادى نه‌شیا وێ په‌یوه‌ندییا خورت و بهێز ب گرتنا گه‌شتێن فرۆكخانه‌یان ب دووماهى بینیت كو ب دبلوماسیه‌تا حكومه‌تا هه‌رێمێ ل گه‌ل وه‌لاتێن جیهانێ ب گشتى و ئه‌وروپا ب تایبه‌تى هاتییه دروستكرن، ل ڤێرێ چووناسه‌رۆكێ جڤاتا وه‌زیرێن هه‌رێمێ بۆ وه‌لاتێن رۆژئاڤا و پێشوازیكرنا وى ل ئه‌لیزێ و به‌رلینێ و له‌نده‌نێ و كۆمبوونا وى ل گه‌ل كه‌سێ ئێكێ ڤان هه‌ر سێ وه‌لاتان، گڤاشێن ل سه‌ر حكومه‌تا ئیراقێ و عه‌بادى بخوه زێده‌تر كرن كو دڤێت مافێن گه‌لێ كوردستانێ ل گۆرى ده‌ستورێ ئیراقێ بده‌ت و هه‌موو برگه‌یێن ده‌ستورى وه‌كو خوه بهێت ب جهـ ئینان، ژبه‌ركو ڤان وه‌لاتان رۆله‌كێ به‌رچاڤ د هاریكاریا هێزێن ئیراقێ د سه‌ركه‌فتنا ب سه‌ر داعشێ هه‌بوویه، كه‌واته ژلایه‌كیڤه عه‌بادى ل هه‌مبه‌ر داخوازیێن ڤان وه‌لاتان بۆ ده‌ستپێكرنا دانوستاندنان ژلایه‌كێ دیڤه دژایه‌تیا ته‌هران و هنده‌ك ئالیێن شیعه بۆ حكومه‌تا هه‌رێمێ، عه‌بادى خستیه ناڤبه‌را نال و بزمارێ و هێزا وى یا بریاردانێ لاوازكریه، لێ ئیدى ئه‌و بزاڤێن ژ لایێ حكومه‌تا هه‌رێمێ و زاتێ نێچیرڤان بارزانى بۆ ب ده‌ست خستنا مافێن خه‌لكێ كوردستانێ هاتینه كرن هه‌موو رێك ل عه‌بادى و حكومه‌تا وى گرتینه، كه‌واته ژبلى كو عه‌بادى نه‌شیا ب گرتنا گه‌شتێن ئاسمانێ رێكێ ل چوونا دىه‌رگه‌یا سیاسه‌تڤانێن كورد بگریت، به‌لكو ره‌نگه ب نه‌دانا مافێ هه‌رێما كوردستانێ سه‌رێ كورسیكا وى ژى بهێته خوارن، چونكى د كابینه‌یێن بۆرى یێن حكومه‌تا ئیراقێ هه‌موو ده‌ما ده‌نگێ كوردان ژ بۆ پێكئینانا حكومه‌تێ ئیكلاكه‌ر بوویه و كورد ل گه‌ل كى بووینه، ئه‌و شیایه بیته سه‌رۆكێ جڤاتێ.
کارزان فەقێ
