لەگەڵ نزیک بوونەوەى هەڵبژاردنەکانی عێراق ململانێکانی نێوان مالیکی و عەبادی روو لە توندبوون دەکەن، هەرچی (عەبادی)یە پێیوایە بە دژایەتی کردنی ماف و ئادزادیەکانی کورد دەتوانێ گرەوەکە لە مالیکی بەرێتەوە و بۆ چوار ساڵی تر پۆستی سەرۆک وەزیران بۆ خۆی مسۆگەر بکاتەوە، هەرچی (مالیکی)شە بۆ بردنەوەى گرەوەکە و خستنی عەبادی و گەڕانەوەى بۆ پۆستی سەرۆک وەزیران رووی لە کورد کردۆتەوە و وەک بەرگریکارێک لە کورد خۆی دەردەخات، عەبادیش پێیوایە چەندی دژایەتی کورد بکات ئەوەندە زیاتر دەنگی شەقامی عەرەبی و شۆڤێنیزمەکانی سوننە و شیعە کۆ دەکاتەوە، ئەمەریکا و ئێرانیش گرەوی یەکلاکردنەوەى بەشێک لە کێشەکانیان لە ناوچەکە لەسەر ئەو هەڵبژاردنەی عێراق کردووە، بۆیە گومان لەوەدا نییە کە لە سەروبەندی هەڵبژاردن و پێکهێنانی حکومەت ململانێی نێوان عەبادی و مالیکی دەچنە قۆناغی دژایەتی و بەریەککەوتن، ئەو دژایەتی و بەریەککەوتنەی نێوانیشیان عێراق تووشی شڵەژانێکی ناوخۆیی و هەرێمی و نێودەڵەتی ئاڵۆز دەکات.
پرسیار ئەوەیە حزب و لایەنە سیاسیەکانی کوردستان چۆن لەو ململانێیەی نێوان مالیکی و عەبادی و گرەوە یەکلاکەرەوەکەی ئەمەریکا و ئێران دەڕوانن؟ ئایا وەک ئێستا و بە دید و بۆچوونی حزبی مامەڵە لەگەڵ ململانێی ئەو دوو شیعە مەزهەبخواز و دیکتاتۆرە دەکەن؟ یان پەندیان لە مێژوو وەرگرتووە و لە دیدی نەتەوەییەوە دەچنە ناو ململانێکانی نێوان مالیکی و عەبادی؟
کورد دەبێ ئەو راستییە بزانێ کە هەموو مالیکی و عەبادیەکانی شیعە و سوننەى عەرەب لەگەڵ هەموو جیاوازیە سیاسی و ئەو دوژمنایەتیە مەزهەبیەی نێوانیان، لە دیدی شۆڤێنیزم و چاوچنۆکی عرووبەوە لە ماف و ئازادیەکانی کورد دەڕوانن، بۆ ئەو مەبەستەش بەردەوام کاریان لەسەر تێکدانی ناوماڵی کورد و قوڵ کردنەوەی جیاوازیە سیاسی و حزبیەکانی ناو لایەنەکانی کوردستان کردووە، لەو بارەشەوە هەر کاتێک ویستبێتیان چەند دەستە و گرووپێکی کوردیان لە رێڕەوی کوردایەتی لاداوە و خستوویاننە سەر باریکە رێی دەستکەوتی کەسی و حزبی، رووداوەکەی ١٦ی ئۆکتۆبەریش زیندووترین نموونەی ئەو راستیەیە.
گومان لەوەدا نییە هەڵیژاردنەکان عێراق دەکەنە گۆڕەپانی بەریەککەوتنی جیاوازیە سیاسیە ناوخۆییەکان و هەڵپەی باڵادەستی هێزە هەرێمی و نێودەوڵەتیە دژەکان، ئەوەش دەرگای بەغدا بە رووی کورددا دەکاتەوە، جا ئەگەر حزب و لایەنە سیاسیەکانی کورد مەستی موزایەدەی سیاسی بەریان بداو دوور لە ژاوەژاوی حزبی و ئامانجی رشتنی کۆنەقین و تۆڵەی سیاسی بچنە ناو گۆڕەپانەکە، ئەوا دەتوانن هەڵەکانی مێژوو راست بکەنەوە و تۆڵەی ئەو شکستەکانەش بکەنەوە کە بە هۆی سەرەڕۆیی هەندێ حزب دووچاری بووین، بە پێچەوانەشەوە کورد تووشی زۆر نەهامەتی دەکەن و رووداوەکەی ١٦ی ئۆکتۆبەر دەکەنە بەشێکی لە بیرکراوی نەهامەتیەکان.