ئەنجامێ سەرھەلدانا پیرۆزا گەلێ کورد ل ئادارا سالا ١٩٩١ دژی رژێما داگیرکەر و شوفینیا بەعسا عیراقێ ، ئازادی و رزگاریا کوردستانێ بوو و پاشان پەرلەمان و حکومەت و سازیێن دیتر و ئاڤەدانی و دیموکراسی و رەوشەنبیری و بنگەھێ پەیوەندیێن نیڤ دەولەتی و ...ھتد لدیف خۆ ئینان . لەوما ئەڤ سەرھەلدانە ب نیشانێ ئازادی و رزگاری و بەرختەوەریا کوردا ھژمار دبیت و ھەتا ھەتا نفشێن داھاتی ل باشوورێ کوردستانێ دێ شانازیێ پێ بەن .
مخابن پشتی پێگەھشتنا نفشێ پشتی سەرھەلدانێ و ئازادیێ نھو ل ھندەک دەڤەرێن سلێمانیێ و ھەلەبجە ھندەک ئالیێن سیاسی ئەوێن ب درێژاھیا چەندین سالا کار لسەر خورتکرنا وی تۆڤێ کین و دووبەرەکیا باپیرێن وان دناڤبەرا خەلکێ باشوورێ کوردستانێ چاندی ب بەرۆڤاژیکرنا سەرھەلدانا پیرۆزا سالا ١٩٩١ بگەھینن و بەرھەم بئینن .
رێک ئەڤ خۆ نیشاندانە بیرا مرۆڤی ل رۆژێن وێ سەرھەلدانێ دئێنەڤە ، ژبەرکۆ ب وێ کەرب و کینا جەماوەرێ زۆلم لێ کریێ کوردستانێ ھێرش دکرە سەر بنگەە و بارەگایێن وێ رژێما بەعس کۆ گەلێ کورد تۆشی ئەنفال و جینۆساید و کیمیا بارانکرنێ کری و ب ھزاران گوندێن کوردستانێ وێران کری ، ئەڤ خودان کەرب و کینە و بسەرداچوویی ھێرشان دکەنە سەر بارەگایێن پارتی دیمەکراتی کوردستان و سازیێن حکومەتا ھەرێما کوردستانێ ، ھەرچەندە ھندەک بارەگایێن حزبێن دیتر ژی ھاتینە سۆتن لێ ئارمانجا سەرەکی پارتی یە .
شێوازێ ڤان خۆ نیشاندانا شێوازێ سەرھەلدانایە دژی دۆژمنا نە خۆنیشاندانێن ئاشتیانە و دیموکراسیانە بۆ گەھاندنا داخازیێن خۆ و بدەستڤەئینانا ئارمانجێن دەست نیشانکری ، ئەگەر بڤی رەنگی بانە ، ھەمی خەلکێ کوردستانێ ب حزب و حکومەت ڤە دا پشتەڤانیا وان کەن و دبیت ئەنجام ژی ھەبانە ، لێ ئەڤ تۆوند و تیژیا ژلایێ وان دھێتەکرن ، ئەجندا و مەرەمێن دۆژمن و داگیرکەرا بجە دئینن و درێژەپێدەرا پیلانا خیانەتا نشتیمانا ( ١٦ ) ێ ئکتۆبەرێ یە کۆ کەرکووک و دەورو بەر ل چەند دەم ھژمێرەکا رادەستی ھێزێن داگریکەرێن حەشدا شیعی و پاسدارێن ئیرانێ کری ، ئەگەر نە ، بۆچی دەسپێکرنا ڤان خرڤەبوونێن بناڤێ خۆ نیشاندانا ، ھەڤەدەمە دگەل لەشکرکێشیا حەشدا شیعی و لەشکرێ ئیراقا شیعەگەری ل نێزیک ھەولێرا پایتەخت . ڕەنگە زۆر ژ وی خەلکێ بەشداری خۆنیشاندانا دبیت بۆ مەبەستا گەھاندنا داخازیێن خۆ یێن ڕەوا بیت وەک بەردەوامیا مۆچەی کۆ مافەکێ سرۆشتی یە ، لێ ب ئاشتیانە ، لێ خەلکەکێ زۆر درێکا ھندەک سەرکردێن حزبێن دیارکری ئەڤ چەندە کریە بەھانە و ب پیلانێن دارشتیێ وەلاتێ ئیرانێ و حکومەتا عیراقێ ، گۆدەتایەکا سەربازی ل ھەرێما کوردستانێ ب لبەرکرنا کراسێ خۆ نیشاندانا بەرپا کریە . ئەڤ چەندە ژی بۆ بدەستڤەئینانا دەسکەفتێن دارایی و مانەڤا وان ل کۆپیتکا سەرکردایەتیا حزبا خۆ . ب دیتنا من کەفتینە دناڤبەرا نال و بزماران دا ، یان لدەست دانا ئیرانێ وەک وەلاتەکێ پشتەڤان و ھەڤکارێ دێرین ، چونکی بۆ وان لدەست دانا ئیرانێ ژبلی کۆ ژێدەرەکێ سەرەکیێ داھاتی دێ لدەست دەن ، زۆر بەلگەنامێن خیانەتکاریا وان بۆ خەلکێ کوردستانێ و جیھانێ دێ ئاشکرا بن . یان لدەست دانا خەلکێ نشتیمان پەروەرێ کوردستانێ . دناڤبەرا ھەردووکان دا وان ئیران ھەلبژارت داکۆ ل کەو و کڕکاکان بن .
ژلایەکێ دی کەرب و کینا سەرکردێن ھندەک حزبێن دەڤەرێن سلێمانیێ بەرامبەر پارتی و بنەمالا بارزان گەھشتیە وی ئاستی ، ژیانا بن سیبەرا راگیرکەرا پێ باشتر بیت لبن سیبەرا دەولەتەکا کوردستانی یا پارتی دامەزرێنەر و رێڤەبەر بن .
ئەز باوەرم ئەڤ پیلانا خیانەتکاریا درێژەپێدەرا ( ١٦ ) ئکتۆبەرێ سەرناگریت و حکومەتا ھەرێما کوردستانێ ب سەرۆکاتیا نێچیرڤان بارزانی چەوا شیا لدەمەکێ نێزیک پشتەڤانیا نیڤ دەولەتی بۆ ھەرێما کوردستانێ دابین بکەتەڤە ، وەسا دێ لسەر ڤان ئاریشا ژی زال بیت و قەیرانا دارایی دێ چارەکەت ، ئەگەر ئەم وەکی خەلک پشتەڤان بین و گوھدارای جێبجێکارێن داگیرکارا نەکەین و بەرژەوەندا نشتیمانی و نەتەوەیی لبەرچاڤ بگرین .