پێشتر مانۆرێن ناڤخوه‌یى بوو، كو د چارچۆڤه‌یێ وان سه‌ره‌دانان دا نێچیرڤان بارزانێ سه‌رۆكێ جڤاتا وه‌زیرێن هه‌رێما كوردستانێ هه‌لوه‌ستێ هه‌موو ئالیێن سیاسیێن هه‌رێمێ دهربارهى ره‌وشا ناڤخوه‌یى هه‌رێمێ و ئاریشهیێن دگه‌ل به‌غدایێ گه‌نگه‌شه كر، ب ڤێ یه‌كێ سه‌رۆكێ ئه‌نجوومه‌نێ وه‌زیران ئارمانجا وان سه‌ره‌دانان ژ بۆ دروستكرنا ئێكده‌نگیێ دناڤبه‌را پارتێن سیاسیێن هه‌رێمێ ناڤكربوو، ئاشكرایه ژى ئه‌ڤ سه‌ره‌دانێن شاندێن حكومه‌تا هه‌رێما كوردستانێ بۆ جه‌م ئالیێن سیاسى پشتى درێژكرنا ده‌مێ ڤێ كابینه‌یا حكومه‌تێ و پاشخستنا هه‌لبژارتنا هات، لێ نها سه‌ره‌دانێن حكومه‌تا هه‌رێما كوردستانێ ل سه‌ر ئاستێ ناڤده‌وله‌تى ده‌ستپێكریه، كو پێشتر ل كوچكا ئیلیزێ هاته پێشوازیكرن و ل گه‌ل ئیمانوێل ماكرۆن ره‌وشا ده‌ڤه‌رێ گوتوبێژكر، د پشت را ژى ئه‌لمانیا و بریتانیا هات، ئه‌وێ هه‌ژى ل سه‌ر راوه‌ستیانێ یه، سه‌رۆكێ جڤاتا وه‌زیران به‌ریا گه‌شتا ئه‌لمانیا بكه‌ت نامه‌یه‌ك ئاراسته‌ى په‌رله‌مانێ كوردستانێ كریه و دووێ نامه‌یێ دا داخوازكریه ده‌مێ هه‌لبژارتنێن بهێت یێن په‌رله‌مانێ كوردستانێ و سه‌رۆكاتییا هه‌رێمێ ده‌ست نیشان بكه‌ن ب وى ره‌نگى ل سێ مه‌هان ده‌رباز نه‌بیت، هه‌ر د وێ نامێ دا ئاماژه ب وێ ژى هاتییه كرن كو ژ بۆ پاراستنا ئێك رێزى و ئێك ده‌نگیا ناڤبه‌را پارتێن سیاسیێن هه‌رێمێ باشترین چاره‌سه‌ر ڤه‌گه‌ریانه ژ بۆ ده‌نگێ گه‌لى، كه‌واته ئه‌ڤ نامه‌یا نێچیرڤان بارزانى ژ بۆ په‌رله‌مانێ كوردستانێ ژبلى كو بزاڤه‌كه ژبۆ دروستكرنا ئێك رێزیێ كو پێشتر ژى هه‌ر بۆ وێ ئارمانجێ سه‌ره‌دانا پارتێن سیاسیێن هه‌رێمێ كربوو؛ بێده‌نگكرنا وێ ده‌نگێ نه‌رازى یه كو پێشتر دناڤا هه‌رێما كوردستانێ دهربارهى پاشخستنا ده‌مێ هه‌لبژارتنان دهاته بهیستن، ئه‌ڤه ژلایه‌كى و ژلایه‌كێ دى ڤى ژى كو دنامه‌ى دا داخواز هاتییه كرن؛ ده‌مێ هه‌لبژارتنا بهێته ده‌ست نیشان كرن و ژ سێ مه‌هان ده‌رباز نه‌بیت، ئه‌ڤه د ده‌مه‌كى دایه كو ئیراق ژى به‌ر ب هه‌لبژارتنان دچیت و ده‌ست نیشانكرنا ده‌مێ هه‌لبژارتنان ئه‌گه‌ر د سێ مه‌هێن بێهت بهێته‌كرن؛ وى ده‌مى هه‌رێما كوردستانێ دێ به‌رى ئێراقێ هه‌لبژارتنێن خوه كه‌ت، كو ئه‌ڤه ژى ئێك ژ خواستێن پارتێن سیاسیێن هه‌رێما كوردستانێ بوو، كه‌واته ژبلى سه‌ره‌دانێ شاندا حكومه‌تا هه‌رێمێ بۆ ئه‌وروپا و وه‌لاتێن زلهێزێن جیهانێ بۆ چاره‌كرنا ئاریشهیێن ناڤبه‌را هه‌ولێر و به‌غدایێ، ئاریشهیێن ناڤخوه‌یێن هه‌رێمێ ژى نه‌هاتنه ژبیركرن و سه‌رۆكێ حكومه‌تێ وێ ئینیه‌تا باش یا كابینه‌یا خوه بۆ دروستكرنا ئێك رێزى و ئێك ده‌نگى ب نامه‌یا به‌رى سه‌فه‌رێ نیشان دا، ئه‌وا دهێته خواندن ل ڤێرێ ئه‌وه، كو حكومه‌تا ئیراقێ ب هێزه و ب هێرشێن شازده‌ى ئكتۆبه‌رێ كاریگه‌‌رییه‌كا زۆر ژ ئابۆرا هه‌رێما كوزرودستانێ كریه و داهاتێ هه‌رێمێ كێمكریه، ڤێ یه‌كێ ژى وه‌كریه سه‌ره‌راى ب هێزبوونا حكومه‌تا ئیراقێ نابیت، د هه‌مان ده‌مدا د ناڤخوه‌یا هه‌رێمێ ئالۆزى هه‌بن و هه‌رێما كوردستانێ ب لاوازى ل هه‌مبه‌ر به‌غدایێ بهێته دیتن، كه‌واته ئه‌وا ژ لایێ حكومه‌تا هه‌رێما كوردستانێ و سه‌رۆكێ وێ نێچیرڤان بارزانى هاتییه كرن، هه‌موو رێك و بزاڤ بوون ژ بۆ ڤه‌دیتنا چاره‌یه‌كێ كو ل هه‌مبه‌ر به‌غدایێ كورد ببن ئێك ده‌نگ، ژ ئه‌نجامێ هه‌موو سه‌ره‌دان و گوتوبێژان ژى ڤه‌گه‌ریان بۆ ده‌نگێ ملله‌تى هاتییه هه‌لبژارتن، هه‌لبژارتن و ده‌نگدان بخوه‌ژى باشترین و رێكا دیموكراسیێ یه ل سه‌ر ئاستێ جیهانێ، ئێدى نامه‌یا به‌رى سه‌فه‌رێ هیچ به‌هانه‌یه‌ك ژبۆ گا‌زنده‌یا پاشخستنا هه‌بژارتنا نه‌هێلا و بزاڤه‌كه ژى بۆ دروستكرنا كوردستانه‌كا ب هێز ل هه‌مبه‌رى پلانێن به‌غدایێ.
کارزان فەقێ
