عيراق بزاڤێ دكه‌ت كوردستانێ ژ جيهانا ژ ده‌رڤه دوور بێخيت
هەژین رێکانی
دژايه‌تيا به‌رده‌وام يا عيراقێ وه‌كر كو حوكمه‌تا هه‌رێمێ په‌يوه‌نديێن دبلۆماسى ب هێز بێخيت و سه‌ره‌دانێن ل دووڤ ئێك ژ پشتى دوورپێچێن دبلۆماتيك يێن به‌غدا بۆ سه‌ر هه‌ولێرێ ده‌سپێكرى بكه‌ت و ماكرۆن ب فه‌رمى پێشوازيا شانده‌كێ هه‌رێما كوردستانێ ب سه‌رۆكاتيا نێچيرڤان بارزانى كر، د ده‌مێ بۆرى دا فره‌نسا د خواست ره‌وش ب ئاوايه‌كێ راست و راست بهێته ب رێڤه‌برن د پشت را ژى بريتانيا ژى ل پشت هه‌رێما كوردستانێ راوه‌ستيا كو ئه‌ڤ هه‌ردو ئه‌ندامێن ئه‌وله‌هيا نێڤده‌وله‌تى نه و ل دووماهيێ ژى گازيكرنا نێچيرڤان بارزانى بۆ ئه‌لمانيا كو وه‌لاتێ ئه‌لمانيا هه‌ڤپه‌يمانا دژى داعشه و ئه‌ڤه ژى ئێكه ژ وان وه‌لاتێن ب هێز يێن پێشمه‌رگه پشتێ پێ دبه‌ستيت و هه‌رێمێ په‌يوه‌نديێن له‌شكرى ل گه‌ل هه‌بووينه و رۆژ بۆ رۆژێ په‌يوه‌نديێن وان به‌ر باشتر ڤه چووينه. يا ئاشكه‌رايه كو نوكه ئه‌لمانيا مه‌كينه‌يا ئابوورێ ئورۆپايه و كارتێكرنا به‌رچاڤ د بڕيارا ئێكه‌تيا ئورۆپا دا هه‌يه.
ئه‌ڤه هه‌موو فاكته‌رێن ب هێزن بۆ سياسه‌تا هه‌رێما كوردستانێ، لێ د به‌رامبه‌ر دا سياسه‌تا عيراقێ شكه‌ستن د چه‌ند لايان دا هه‌مبه‌ر وه‌لاتێن ژ ده‌رڤه د ڤى ده‌مى دايه، ئه‌و دخوازيت ده‌سته‌لاتێن كوردستانێ كێم بكه‌ت و مه‌رجێن خوه ل سه‌ر ب سه‌پينيت و ژ به‌ر ڤێ ئێكێ ژى كوردان باوه‌رى ب هه‌بوونا دانوستاندنێن ئێكسه‌ر ل گه‌ل عيراقێ نينه و بۆ ڤێ ئێكێ كوردستان دخوازيت ئه‌مريكا و جڤاتا ئاسايشا نێڤده‌وله‌تى و نه‌ته‌وێن ئێكگرتى و هه‌تا رۆسيا ژى ناڤه‌ندگريێ د ڤى وارى دا بكه‌ن.
پشتى ڤان هه‌موو په‌يوه‌نديێن ب هێز يێن هه‌رێما كوردستانێ ل گه‌ل ژ ده‌رڤه عيراق بزاڤان دكه‌ت ئاسته‌نگان د رێيا ڤان په‌يوه‌نديان دا دروست بكه‌ت و ئه‌ڤه د ده‌مه‌كى دايه كو حوكمه‌تا عيراقێ بڕێكا وه‌زاره‌تا ژ ده‌رڤه ئاسته‌نگان بۆ هه‌موو نوونه‌راتيێن حوكمه‌تا هه‌رێما كوردستانێ دروست بكه‌ت و بالوێزخانا عيراقێ ل فره‌نسا داخواز ژ وه‌زاره‌تا ژ ده‌رڤه يا فره‌نسا كربوو كو نوونه‌راتيا هه‌رێمێ ل وى وه‌لاتى بهێته دايخستن، به‌لێ د به‌رسڤێ دا بۆ گۆتبوو كو ئه‌وان ژ سالا 1992ێ وه‌ره په‌يوه‌ندى ل گه‌ل هه‌رێمێ هه‌نه و ل 2005ێ ژى د چارچۆڤێ دستوورى دا وه‌كو هه‌رێمه‌كا فيدرال سه‌ره‌ده‌ريێ ل گه‌ل هه‌رێما كوردستانێ دكه‌ن، هه‌ر وه‌كو نوونه‌ره‌كێ هه‌رێما كوردستانێ ل ده‌رڤه ئه‌ڤ گۆتنه كرى.
ژ لايه‌كێ دى ڤه وه‌زيرێ ده‌رڤه يێ ئه‌لمانيا پلان هه‌بوو سه‌ره‌دانا كوردستانێ بكه‌ت، به‌لێ حوكمه‌تا عيراق ب دزى ڤه سه‌ره‌دانا وى راوه‌ستاند و ژ به‌ر ڤێ چه‌ندێ سه‌ره‌دانا وى بۆ عيراقێ ژى هاته هه‌لوه‌شاندن، هه‌روه‌سا گرتنا فرۆكخانه‌يان بۆ رێگرى ل په‌يوه‌نديان، لێ ئه‌ڤه هه‌موو نه‌بوويه رێگر ل هه‌مبه‌ر ئيرادا كوردان.
ئه‌ڤ ئاسته‌نگه هه‌موو ژ ئه‌نجامێ وێ دبلۆماسيه‌تا سه‌ركه‌فتى يا كوردان بوويه كو سه‌ره‌دانا پێشتر يا سه‌رۆكێ حوكمه‌تا هه‌رێما كوردستانێ نێچيرڤان بارزانى بۆ فره‌نسا و سه‌ره‌دانا ڤێ دووماهيێ بۆ ئه‌لمانيا و يا بهێت بۆ بريتانيا ئاماژه‌نه كو عيراق نه‌شێت ل سه‌ر وێ زۆلمێ يا به‌رده‌وام بيت و بارزانى دشێت ب ره‌نگه‌كێ دبلۆماسى دووماهيێ ب ڤێ زۆلمێ بينيت كو به‌غدا ل سه‌ر خه‌لكێ هه‌رێمێ سه‌پانديه.
نێچيرڤان بارزانى نوونه‌رێ راسته‌قينه يێ كوردايه و هه‌موو ده‌وله‌تان پشته‌ڤانيا خوه بۆ حوكمه‌تێ ده‌ربڕيه و ئه‌لمانيا ژى بڕيارا راهێنانا ب له‌شكرێ هه‌رێمێ درێژ كر و يا پێشبينيكريه كو سه‌رۆكێ حوكمه‌تێ دێ ل سه‌ر ڤان بزاڤان يێ به‌رده‌وام بيت ژ بوو ئه‌نجامێن باشتر و پشته‌ڤانيا به‌رده‌وام يا نێڤده‌وله‌تى بۆ كوردان.
