چەند رۆژە پێلەکا خوەنیشاندانێن نە یاسایی و دور ژ بنەمایێن دیموکراسی ل سنوورێ پارێزگەها سلێمانیێ دهێنە کرن، ل پشت ڤان خوەنیشاندانان ژی ئەو پارت و کەسن یێن دژاتیا حکومەتا نها یا هەرێما کوردستانێ دکەن و خو ل پشت مێزان و د کۆنجێن خانیێن گەرم ڤە ڤەدشێرن و بەرێ کورێن خەلکی ددەنە سەر جادەیان بۆ کرنا توندوتیژیان و سوتنا بارەگەهان و سازیێن حکومی و تا وی رادەیی خوینا وان ژی بهێتە رژتن.
داخوازکرنا مافان ل چ وەلاتێن دنیایێ ب ڤی رەنگێ نها نینە یا ئەڤ خوەنیشاندەرێن دهێنە پالدان ژی ژ لایێ چەند لایەنێن سیاسی ڤە دکەن، ب چ رەنگان نابێژنێ خوەنیشاندان بەلکو تێکدانا ئارامیا وەلاتییە و ئالۆزتر بوونا رەوشا ناڤخو و دەرگەهڤەکرنە بۆ جێبەجێکرنا پلانێن ئیراق و ئیرانێ، ئەگەر حکومەت ژ دابینکرنا موچەیی و خوشگوزەرانیا خەلکی بەرپرسیار بیت، ئەو حکومەتە ب تنێ پارتی نینە بەلکو هەمی حزب تا ڤی دەمی ژی بەژدارن دڤێ حکومەتێ دا، ئانکو بەرپرسیاری یا هەمیانە، لێ ئەو لایەنێن پشتەڤانیا ئالۆزیان دکەن خوە ساویلکە دکەن و خو ژ بەرپرسیاریێ دیر دئێخن، نزیکی چار سالەیە بەژدارن و هەمی موچە و پێدڤیێن خوە ژ ڤێ حکومەتێ وەردگرن و دبێ دەنگن، لێ پشتی پتر تێکچوونا رەوشا دارایی یا هەرێمێ، ب سەرشوریی ڤە تەڤگەرا گوران و کۆمەلا ئیسلامی یا کو چ ئارمانج نەماین ب تنێ بریارێن گورانێ جێبەجێدکەت، شنیکا بریارا ڤەکێشانێ ژ حکومەتێ ددەن و ب ئاشکرایی ئەندامێن وان دناڤا خوەنیشاندان دا هانا خونیشاندەران ددەن بۆ تێکدانێ، یوسف محەمەد ئێک ژوان کەسان بوو یێ بوویە ئەگەرێ سەرەکی یێ پەکەفتنا پەرلەمانی بو دەمێ دوسالان نها ب ئاشکرایی دناڤا خونیشاندەران دا دەردڤەیت ، باشە ئەگەر دەرکەتنا تە بۆ پتر ئالۆزبوونا رەوشێ نەبیت؟ پا بوچیە؟ ژ لایەکی دیڤە ئەمیرێ کۆمەلا ئیسلامی دبێژیت گەر حکومەتا رزگاری نشتیمانی هاتبا دامەزراندن ئەوا نها چیدبیت نەدبوو، ئەڤەژی دەلیلەکێ ئاشکرایە کو لپشت تێکدانا رەوشا نها کی هەیە؟ دڤێت وەلاتیێن مە گەلەک هشیار بن و ل دیڤ بەرنامێ ڤان پارت و کەسێن نەبەرپرسیار نەکەڤن و بارەگەهو دام و دەزگەهان نەسوژن ژبەرکو ئەو مۆلکێ وەلاتیانە و خزمەتا وان تێدا دهێت کرن، ژ مێژە مەرەما ڤان پارتان یا دیارە بەلێ گەلەک بێ ئەخلاقیە هزر بکەن دێ ب رێژتنا خینا کورێن هەژاران گەهنە مەرەمێن خوە یێن سیاسی، سیاسەتکرن بەرنامەیە و ب کریارێن خوە یێن درست سوزا خەلکی بو خوە دکێشن نەک ب تێکدانێ، ب ئاشکرایی ئەڤ پارت و لایەن ئەجێندایێن وەلاتێن دەرەکی ب تایبەت ئیرانێ جێبەجێدکەن ئەگەر نە وان چ بهانە نین ژ بەرکو حکومەتا هەرێمێ ب ئاشكرایی ئامادەیا خوە بۆ کرنا هەلبژارتنان دیارکریە، لێ ترسا ڤان لایەنان ژ کرنا هەلبژارتنایە و دزانن ئێدی سەنگ نەمایە و بێگومان نەشێن ب ریێن رەش ڤە دوبارە بەشداری دەستەلاتێ ببن بوویە ب هەمی رەنگان بزاڤێن تێکدانا رەوشێ دکەن بۆ ژناڤبرنا حکومەتا نها ، لێ خوشبەختانە د نهادا زلهێزێن جیهانێ ب هەمی رەنگان پشتەڤانێن ڤێ حکومەتێ نە و بێ گومان رەوش دێ گەلەک بەرەڤ باشتر چیت.