فرەنسا تاکە وەلاتێ زلھێزێ جیھانێ بوویە ل دەمێ ئاخا کوردان ل سەر مێزەیێن دانوستاندنا دناڤبەرا وەلاتێن روژئاڤا و ئقلیمی دا دھاتە پارڤەکرن، ئەو یا ئامادە نەبوو ل سەر سوفرا وێ مێزەیێ ئامادەبیت، بولکو ھەول ددا مافێ ملەتەکێ ستەملێکری بۆ ڤەگەرینیت و ھاریکار بوویە بۆ بدەست ڤە ئینان مافێ ملەتێ کورد، نموونە ژی ھەولێن وێ ل سالا ١٩٩١ پشتی دامەزراندنا حکومەتا ھەرێمێ ،ندەرخستنا بریارا ٩٨٦ یا نەتەوەیێن ئێکگرتی بوو ب فشارێن وێ یێن بەردەوام. ئەڤە بۆ ئەگەرێ پاراستنا ھەرێما کوردستانێ ژ وەلاتێن دەوروبەر و دیسان کێمکرنا مایتێکرنا وەلاتێن رۆژئاڤا ل کوردستانێ، ب سەرکێشیا سەرۆکێ وی دەمی یێ فرەنسا فرانسوا میتران و دەیکا ئاشتیێ یا گەلێ کورد دانیال میتران.
د کاودانێن نھا ھەرێما کوردستانێ تێدا دەرباز دبیت ھەم ژ قەیرانا دارایی و بریارێن نە یاساییی یێن ئیراقێ و داگیرکرنا دەڤەرێن کوردستانێ ب ھاریکاریا میلیشیایێن حەشداشەعبی ب سەرکێشیا ئیرانێ و بێدەنگیا وەلاتێن زلھێزێن جیھانێ ل سەر ڤان پێشێلکاریا، فرەنسا وەک ھەر جار بوو پشتەڤانا ئێکێ ل مافێن شەرعی یێن گەلێ کوردستانێ، ھەر ژ دەستپێکا ڤان کاودانان داخواز ژ بەغدا کریە ب رێیا دانوستاندنان کێشەیێن خوە دگەل ھەرێما کوردستانێ چارەسەر بکەت و ئەڤەژی د ھەردوو بەیانێن وەزارەتا دەرڤە یا وی وەلاتی و کۆچکا سەرۆکاتیێ دا ب روونی دیارن. ل سالا ٢٠١٤ ژی ل دەمێ ھاتنا داعشێ فرەنسا ب ھەمی رەنگان ھاریکاری و پشتەڤانیا کوردان کریە و ھاتنا سەرۆکێ وی دەمی فرانسوا ئۆلاند دو جارا بۆ ھەرێما کوردستانێ باشترین بەلگە بوو.
پێشوازیکرنا سەرۆکێ حکومەتا ھەرێمێ و شاندێ دگەل دا ل ڤی دەمی باشترین بەرسڤە بو وەلاتێن رۆژئاڤا و زلھێزێن دی یێن جیھانێ و وەلاتێن ئیقلیمی و ب تایبەت بۆ بەغدا کو فرەنسایا بەردەوام پشتەڤانی ل گەلێ کورد کری دێ یا بەردەوام بیت و ھەلویستێ وێ ناھێتە گھورین ب تایبەت پشتی گوتنا سەرۆک ماکرونی د کۆنگریێ رۆژنامەڤانی دا د گەل نێچیرڤان بارزانی دا دەمێ راگەھاندی:نابیت چ جورە میلیشیایەکا وەک حەشدا شەعبی ل ئیراقێ ھەبیت، ئەڤەژی گولەیەکە بۆ دفنبلندیا بەغدا و مەجبوورکرنا وێ یە بۆ کرنا دانوستاندنان و راکرنا سزایێن ل سەر ھەرێمێ دیسان بەرسڤەکە ژ بۆ وەلاتێن رۆژئاڤا ژی کو ئەڤ مێلیشیایە ژ چ رێکخراوەکا تیرورستی یا وەک داعشێ کێمتر نینە و دڤێت ئێدی سنورەک بۆ ڤان مێلیشیا دگەل بریارێن بەغدا یێن نە دەستوری بھێتە دانان.
فرەنسا وەک وەلاتەکێ دیموکراسی خواز و ئەنداما ھەردەمی یا جڤاتا ئاسایشا نێڤدەولەتی ب بەردەوامی ل اودانێن نەخووش خوە ل کوردان کریە خودان و داکوکی ل مافێن گەلێ کورد کریە ل دەمێ نھا ژی سەلماند گەلێ کورد ب تنێ نینە و سەرەدانا سەرۆک وەزیرێن ھەرێمێ و پێشوازیکرنا فرەنسا ل وی شاندی وەک پێشوازیکرنا شاندێ وەلاتەکێ سەربەخوو دێ گەلەک گھورینان د رۆژەڤا نھا یا رۆژھەلاتا ناڤەراست دا پەیدا کەت ب تایبەت ل ئیراقێ.