نێچیرڤان بارزانى بۆچى ئه‌ڤ سێ گۆتنه كرن؟
کارزان فەقێ
-دێ موچه‌یێن فه‌رمانبه‌ران ده‌ین:
ئه‌ڤ گۆتنه د ڤى ده‌مى دا نه بتنێ فه‌رمانبه‌ران پشت راست دكه‌ت كو بێ پاره نابن و ئاریشه‌یێن هه‌ولێر و به‌غدا كارتێكرنێ ل وان ناكه‌ت، به‌لكو بارزانیێ سه‌رۆكێ وه‌زیر ب ڤێ گۆتنێ لڤینه‌كا مه‌زن ژى ئێكخسته ناڤا بازارێ هه‌رێمێ، چونكى ب ڤێ یه‌كێ خه‌لك هه‌ست ب دلنیایێ كر و ترسا وێ یه‌كێ ل ده‌ف نه‌ما كو ئه‌و پاره‌یێن ل به‌رده‌ستێ وى هه‌ین، ل كونێن مالێ مالێن خوه نه‌ڤه‌شێرێت و ترس ل ده‌ڤ هه‌بیت ژ مه‌زاختنا وان.
مه دڤێت ل كه‌ل جیرانێن مه ب دانوستاندنێ په‌یوه‌ندیێن خوه ب هێز بكه‌ن:
ئه‌ڤه ب خوه گه‌له‌كا ئاماژه‌یان دده‌ت، ژ وان ژى ئه‌وه كو چه‌وا هیچ جاره‌كێ هه‌رێما كوردستانێ جهێ گه‌ف و مه‌ترسێ نه‌بوویه بۆ سه‌ر وه‌لاتێن جیران، ب هه‌مان شێوه نها ژى جیرانه‌كێ باشه و هه‌رده‌م خوازیارێ دانوستاندنێ یه، بۆ ڤێ یه‌كێ رۆلێ سه‌رۆكێ حكومه‌تێ ل ده‌مێن بۆرى ناهێته به‌رزه‌كرن و چه‌وا پرێن په‌یوه‌ندیێن بازرگانى ل گه‌ل توركیا و ئیرانێ دروستكریه، هه‌ر ب هه‌مان شێوه بزاڤێ دكه‌ت ئه‌ڤ پره به‌رده‌وام بن و هه‌ر دوو ئالیى خوه‌دى قازانجێن خوه‌یێن ئابوورى بن، بێ گومان قازانجێن ئابوورى دبیته ئه‌گه‌رێ خوه‌شكرنا په‌یوه‌ندێن سیاسى ژى.
گۆتنا سێ یێ كو من دڤێت ئاماژه‌ى پێ بكه‌م، گه‌له‌ك گرێداى ئاریشه‌یێن ناڤبه‌را به‌غدا و هه‌ولێرێ یه و كو نێچیرڤان بارزانى دبێژیت: (به‌غدا ئه‌و ماده‌یێن ده‌ستورى كو د به‌رژه‌وه‌ندا وى بیت ب جهـ دئینیت و یێن كو ل به‌رژه‌وه‌ندا هه‌رێمێ ژى بنپێدكه‌ت)، ئه‌ڤ گۆتنه ب چ قه‌باره‌یه‌ك ئاراسته‌ى به‌غدایێ ها‌تبیته كرن، ب قه‌باره‌یه‌كێ مه‌زنتر ژ بۆ جڤاكا نێڤ ده‌وله‌تى ئاراسته‌كریه، چونكى هه‌ر بنپێكرنا ماده‌یێن ده‌ستورى بوو حكومه‌تا هه‌رێمێ ل سالا 2015 سه‌رخوه‌بوونا ئابورى رابگه‌هینیت، هه‌ر ب بنپێكرنا ده‌ستورێ ئیراقێ ژ لایێ حكومه‌تا عه‌بادیڤه بوو كو گه‌لێ كوردستانێ هزر د سه‌رخوه‌یبوونێ دا بكه‌ن. بۆ ڤێ یه‌كێ ههم سه‌رۆكێ جڤاتا وه‌زیران و ههم به‌غدا ژى ب باشى دزانن، رێكه‌فتن ل دووڤ ده‌ستورێ ئیراقێ ب واتا دانا پشكا 17% ژ داهاتێ ئیراقێ بۆ كوردستانێ دهێت، ب واتایا دابه‌شكرنا پۆستێن سیادیێن ئیراقێ ب شه‌راكه‌تا كورد و عه‌ره‌بان دهێت، ده‌ستور ب واتایا ره‌سمیكرنا زمانێ كوردیه ل ته‌نشت زمانێ عه‌ره‌بی ل سه‌رانسه‌رى ئیراقێ، هه‌روسا ب جهـ ئینانا ماده‌یا 140 و دروستكرننا پرۆژه‌یێن مه‌زن وه‌كو به‌نداڤ و هێلێن ئاسنى و وێستگه‌هێن كاره‌بێ و فرۆكخانه و سایلۆو.. هه‌روه‌سا بجهـ ئینانا ده‌ستورى ب وێ واتایێ دهێت كو پێشمه‌رگه به‌شه‌ك بیت ژ هێزا به‌رگریا ئیراقێ و بۆدجه و هه‌موو پێدڤیێن وێ وه‌كو هێزێن دى بهێته دابینكرن و گه‌له‌كین دى، به‌غدا ڤێ یه‌كێ باش دزانیت، لێ ئاریشه‌یا حكومه‌تا هه‌رێما كوردستانێ ل گه‌ل سیسته‌مێ حكومرانیێ نینه ل ئیراقێ، به‌لكو ئاریشه ل گه‌ل عه‌قلێ ده‌سته‌لاتداریێ یه.
ب ڤان گۆتنێن سه‌رى نێچیرڤان بارزانى سێ په‌یام ئاراسته سێ جهێن ده‌ستنیشانكرى كرینه و هه‌موو بزاڤێن حكومه‌تا خوه دناڤ ڤان سێ گۆتنان دا ئاراسته‌كریه، ئیدى خه‌لكێ كوردستانێ خوه‌دان سیاسیێن ب ڤى ره‌نگینه و ل ده‌ف خه‌لكى باوه‌رپێكرینه، د هه‌مان ده‌م دا دیرۆكا په‌یوه‌ندیێن بازرگانى و سیاسیێن هه‌رێمێ و وه‌لاتێ جیران وه‌كو توركیا و ئیران ژى ل سه‌ر كاریزما و سیاسه‌تڤانییا ناڤبرى دیده‌ڤانن، یا دمینیت ئه‌وه به‌غدا ده‌ست ژ عه‌قلیه‌تا تاك ئالییانه به‌رده‌ت و داوى ب وێ گۆتنێ بینیت كو دبێژیت: (به‌شی خۆم بۆخۆم و به‌شی تۆش ده‌خۆم)
