پشتی ئەنجامدانا پرۆسا راپرسیا سەرخۆبوونا کوردستانێ ب رەنگەکێ دیموکراسی و سەرکەفتنا دنگێن ئەرێ ب رێژەیەکا ھەری زۆر ، دەسھەلاتا عیراقێ ، نەخاسمە حکومەت بەرەڤ توندرەوی و خۆپەرستنێ بوون بەرامبەر ھەرێما کوردستانێ ، ھەمی رێک دژی ھەرێم کوردستانێ بکارئینان ، یێن سیاسی و ئابووری و لەشکری ، ژبۆ بجە ئینانا مەبەستێن خۆ پەنا بۆ وەلاتێن ھەرێمی ژی بر ، تا گەھشتیە ئاستێ چەکداری و ھەولێن داگیرکرنا کوردستانێ . ئەو بۆ بێ گوھداریکرن ل دەستوور و یاسایێن عیراقێ و رێکەفتنێن سیاسی ، بخیانەتا بالەکا ئێکەتیا نشتیمانی کوردستان ل ١٦/١٠/٢٠١٧ حەشدا شیعی ب پشکداریا پاسدارێن ئیرانێ باژارێ کەرکووک و دەور و بەر داگیر کرن و تاوانێن دوو ژ رەشتی مرۆڤایەتیێ بەرامبەر خەلکێ سڤیلێ کورد ئەنجام دان و پشکەکا مەرامێن خۆ ب پالپشتیا خیانەتا نافخۆیی بجە ئینان ، خۆشبەختانە پێشمەرگەھێن کوردستانێ ب رێنمایی و سەرپەرشتیا سەرۆک بارزانی ب تۆمارکرنا داستانێن بێ وێنە رێگری ل بجە ئینانا پیلانا داگیرکرنا کوردستانێ کر ژلایێ عیراقێ ب چاڤدێریا ئیرانێ .
ھەرچەندە پشتی ڤان بوویە ھەرێما کوردستانێ ئەنجامێن راپرسیا سەرخۆبوونا کوردستانێ سڕ کرن و بەردەوام داخازا دانۆستاندان ب رەنگەکێ ئاشتیانە دکەت بۆ چارەسەرکرنا پرسێن ناڤبەرا ھەردوو ئالیان لدیف دەستوورێ ھەردەمی یێ عیراقێ لێ پشتی بوورینا نێزیکی دوو مەھان حکومەتا عیراقێ ب سەرۆکاتیا عەبادی ، ھەمی داخازێن کوردستانێ بۆ دیالۆگێ رەت دکەت . سەەرەرای سازیێن نیڤ دەولەتی و زۆر وەلاتێن جیھانێ ھەمان داخاز دکەن . ئەڤ سەر رەقیا عەبادی نیشانێ مەغرۆریێ یە و خۆ ب ھێز دیار دکەت و دیارە دڤێت ھەرێما کوردستانێ خۆ بۆ بشکێنیت و دەستا ل زۆر دەسکەفتێن نەتەوی و نشتیمانی بەردەت .
لێ د بنەرەت دا رەتکرنا دیالۆگێ ژلایآَ عەبادی چەند مەبەستێن دیتر لپشتن ، وەک کاریگەیا ھەژمۆنا ئیرانێ کۆ دڤێت پیلانا خۆ یا شیعەگەریێ بچەسپینیت و تەڤایا عیراقێ ب کوردستان و دەڤەرێن سنی ڤە بێخیتە بن سیبەرا خۆ ، ژلایەکێ دی ب مخابنی ڤی ھێشتا پرانیا جادا عیراقێ ھەلگرێ ھزرا تۆندڕەویا مەزھەبی و ڕەگەز پەرستیە و ب چاڤەکێ کێم خەلکێ نە عەرەب و نە لسەر مەزھەبێ وان دبینن بتایبەت خەلکێ کورد ، لەوما ھەر حزبەکا عەرەبی یان رێبەرەکێ وان دژایەتیا کوردا بکەت و لسەر وێ ھزرا شۆفینی بیت ل ھەلبژاردنا پتر دەنگا بدەستڤە دئینیت و دگەھیتە دەسھەلاتێ لەوما عەبادی نەڤێت ژمارەکا زۆرا دەنگا لدەست بدەت چونکی عیراقێ بەرەڤ ھەلبژاردنان دچیت .
ژلایەکێ دی ئەگەر دانۆستاندن دناڤبەرا ھەرێما کوردستانێ و حکومەتا ناڤەندی دەسپێبکەن ، ھەرێما کوردستانێ دێ بمفادارتر بیت ، ژبەرکۆ گاڤێن ھەرێما کوردستانێ ب راپرسی ژی ڤە د دەستووری بوون ، لێ گاڤێن حکومەتا ناوەندی بەرۆڤاژی دەستوورێ ھەردەمیێ عیراقێ نە ، ھەر ل برینا بۆدجە و مۆچێ چەندین سالێن ھەرێمێ و پێتڤیێن پێشمەرگەھی و ...... ھەتا دگەھیتە ھەولێن داگیرکرنا کوردستانێ و ئینانا لەشکرێ ئیرانێ . نەخاسمە ئەگەر دانۆستاندن ب چاڤدێریا نەتەوەیێن ئێکگرتی یان ھەڤپەیمانان بیت . بۆ کوردستانێ یا گرنگ ئەوە ھەرێما کوردستانێ بتایبەت نێچیرڤان بارزانی سەرۆکێ حکومەتا ھەرێما کوردستانێ بەردەوام تەکەزیێ لسەر دانوستاندنان دکەت لسەر بنەمایێ دەستوورێ عیراقێ بۆ چارەسەرکرنا ھەرمی ئاریشا و ئەڤی ھەلویستێ ئاشتیانە و دیموکراسیانە سەرۆکێ حکومەتا کوردستانێ پالپشتیا نیڤ دەولەتی و ھەڤپەیمانان بۆ ھەرێما کوردستانێ دێ دابین کەت و ئەز باوەرم ئەڤ ھەلویستە بوونە وەلاتەکێ مینا فەرەنسا پێشوازیێ ل نێچیرڤان بارزانی بکەت و گاڤێن باش بۆ دەسپێکرنا دیالۆگێ دناڤبەرا ھەردوو لادا دێ ھێنە ھاڤێتن، یان عیراق دێ نەچار بیت دەست ب دیالۆگێ بکەت یان ھەلویستێن نیڤ دەولەتی بەرامبەر عیراقێ دێ ھێنە گۆڕین ، ئەڤەژی دبەرژەوەندا ھەرێما کوردستانێ دایە . نەخاسمە ژبەر زق بوونا ھەژموونا ئیرانێ ل ھەمی بووار و سازیێن عیراقێ کۆ دژی بەرژەوەندێن ھەڤپەیمانان و وەلاتێن عەرەبی یە .