بەغدا دڤێت چ فێلبازیەکێ ل کورستانێ بکەت
November 28, 2017
وتار و بیروڕا
![بەغدا دڤێت چ فێلبازیەکێ ل کورستانێ بکەت](https://gulanmedia.com/public/old_images/nusaran/karwan-bady.jpg )
بۆ هەمی لایەکی یا دیارە کو ئەڤە بتنێ یاریکرنە ب دەمی، چونکی بەغدا بتنێ نیەتا هندێ هەیە هەرێمێ نەچار بکەت ب رادەستبوونا ئیرادەیا وێ و سەپاندنا مەرجێن خوە بسەر خەلک و دەسەڵاتا هەرێما کوردستانێ کو ئەو د وێ باوەرێدانە پشتی دەمەکێ هەرێم دێ توشی قەیرانەکا دی یا ئابووری بیت بتایبەت پشتی وان ب هەڤکاریا لایەنەکێ سیاسی یێ کوردستانێ دەست بسەر کەرکووکێدا گرتی و ئەو پەترولا بەری نوکە حکومەتا هەرێمێ بۆ دابینکرنا موچەیێن کوردستانێ دهنارتە دەرڤە راگرتی.
پرسیارا نێچیرڤان بارزانی سەرۆک وزیرێن حکومەتا هەرێما کورستانێ ژ بەغدا یا د جهێ خۆدا بوو دەما دبێژی ئایا بەغدا دڤێت ب چ شێوازەکی فروکەخانە و دەروازەیان رادەست بکەین، ئاوا ئەو دخازن کارمەندێن کورد لاببەن و خەلکێ خۆ ل جهێ وان بدانن؟ ئایا ما کوردژی هەر نە ئیراقێنە؟ بۆچێ بەغدا دخازیت کوردان لاببەت و خەلکێ دی ل جهێ وان بدابنیت، د بنەرەتدا ئەڤە پرسیارەکا واقعییە، ئەگەر براستی کورد ئیراقیبن، پێدڤیە کارمەندێن خۆجهی یێن دەڤەرێن کوردی هەر کورد بن ئەڤە لگوری دەستووریژی هاتیە چەسپاندن.
حکومەتا کوردستانێ ب هەموو شێوەیەکێ ئامادەیا خۆ دەربریە بۆ هەماهەنگیکرنێ دگەل بەغدا بتایبەت د مەسەلا برێڤەبرنا فروکەخانە و دەروازە و تەنانەت دوسیەیا نەفت و گازێ، لێ وەک دیارە بەغدا دڤێت بێی چ حسابان بۆ قەوارەیا هەرێما کوردستانێ بکەت بخوە و بتنێ وان دوسەیان برێڤە ببەت و تەڤایا وان داهاتانژی ببەتە بەغدا و وەک کارتێن فشارێ لدژی خەلکێ کوردستانێ بکار بینیت و هەر گاڤا ڤیا وەک ئەوا ل ٢٠١٤ کری کو ب ئێک تلەفونا سەرۆک وەزیرێن وی دەمی نووری مالکی بودجەیا هەرێما کورستانێ هاتە برین و هەرێما کوردستانێ توشی قەیرانەکا دارایی یا مەزنکر هەمیژی پێخەمەت رادەستکرنا ئیرادەیا خەلکێ کوردستانێ بوویە بۆ بەغدا.
دەرئەنجام ئەوە کو وەک دیار بەغدا هەتا نها هیچ نیەتەک نیە کو ب دانوستان کێشەیان دگەل هەرێمێ چارەسەربکەت و توشی غرورەکا مەزن بوویە بتایبەت دەما دبینیت هەریەک ژ ئیران و تورکیا بهەموو شێوەیەکێ دگەلدانە و بەشەک ژ کوردانژی لگوری سیاسەتا وان کاردکەن دژی سەربەخۆی و حکومەتا هەرێمێ و هەموو بزاڤەکا وان ئەوە ڤان دەسکەفتێن نها کوردستانێ هەین ژناڤ ببەن، هەر ژبەر ڤێ چەندێ خۆ ڤەدزینا بەغدا ژ جێبەجێکرنا دەستووری و جێبەجێکرنا بریارر دادگەها فیدرالی دەما دبێژیت دڤێت دەرئەنجامێن پشتی ریفراندومێ بێنە هەڵوەشاندن کو وەک بۆ هەموو لایەکی دیارە دەرئەنجامێن پشتی ریفراندوومێ پێک دهێن ژ قەدەغەکرنا هاتنوچوونا ئەسامانی بۆهەرێمێ هێرشا حەشدا شەعبی بو سەر کوردستانێ و ستون و تالانکرنا مالێن کوردان ل دەڤەرێن کوردستانێ یێن دەرڤەی ئیدارەیا هەرێمێ، داخۆیانێن دوژمنکارانە و دەرخستنا بریارێن توند ژلایێ پەرلەمانێ ئیراقێڤە لدژی کوردستانێ لخو دگرن.