بارزانی نەمر ئانکۆ مەلا مستەفای بارزانی ، رێبەرێ بزاڤا رزگاریخوازیا کوردستانی ل سەدێ بیستێ و دامەزرێنەرێ پارتی دیموکراتی کوردستان ، ڤی کەسایەتیێ مەزن مەزنترین و درێژترین شۆرەشا کوردستانی بەرپا کریە و سەرکێشی لێ کریە ، ب خەباتا خۆ یا زێدەتر ل پێنجی سالان بوویە بابێ کنیاتی و دیروکیێ نەتەوا کورد . خەبات و رەفتار و سەرەدەریێن وی بووینە رێبازەکا تایبەت و ھەمی لایەنێن ژیانێ ب خۆڤە دگریت . سیاسی ـ شۆرەشگێری ـ جڤاکی ـ ئابووری و دادپەروەری و ....ھتد . دادوەری و راستگۆیا وی ل سەرانسەرێ کوردستانێ دەنگ ڤەدا بوو . ژبەر دادوەریا وی ب بابێ فەقیر و ھەژارا دھاتە نیاسین . پسیارا ھەر کەسێ سەردەمێ وی بکەی کۆ دگەل خەبات کربیت ، دێ بێژیت ئەو کەسەک بوو خودای بو کوردرا ھنارت بوو ، و کەسەکێ وەک وی نابیتەڤە . لسەردەمێ وی چ جوداھی دناڤبەرا زەنگین و ھەژارا ، چینێن جڤاکی یان ئایینێن جودا نەبوو ، ب ئێک چاڤ تەماشای ھەمی مرۆڤان دکر . لەوما ھەر ل دەسپێکا شۆرەشێ کۆم کۆمە خەلکی پەیوەندی ب شۆرەشێ دکر و ئەڤ دادوەریا وی ئەگەر و ھاندەرێ بلندبوونا ھەستا نەتەوی و نشتیمانی و گیانێ شۆرەشگێریێ بوون دناڤ پێشمەرگەە و خەلکێ دەوروبەرێن وی . ھەر رەفتار و سەرەدەریێن وی بوون ئەگەرێن سەرکەفتنێ و تۆمارکرنا داستانێن بێ وێنە بەرامبەر لەشکرەکێ زەبەلاح ب شیانێن ھەری کێم . ھەڤالەکی زاردەڤێ پێشمەرگەھەکێ ئیلۆنی کۆ دگەل بارزانی نەمر دا بۆ من ڤەگێرا . رۆژەکێ ل رۆژان لسنوورێ سلێمانیێ بارزانی نەمر دگەل چەند پێشمەرگەھەکا بەرەڤ ئەرکەکی دچۆن و رێکا وان دناڤ باغەکێ سێڤا را چۆ ، ئێک ژ پێشمەرگەھان بێ ئاگاداریا بارزانی ( سێ ) سێڤ کرن و دگەل خۆ برن ، پشتی دەمەکێ کۆرت و بڕینا قۆناغەکا کێم ( ٤ – ٥ کم) بارزانی فەرمان کر دەمێ بێنڤەدانێ یە و چایەکێ چێ بکەن ، ھەمی پێشمەرگەە حیبەتی مان ، چونکی چ جاران د قۆناغەکا ھۆسا یا کوت بارزانی بێنا خۆ ڤەنەدایە . ھەر لدەمێ راوەستانێ ئیکسەر بارزانی گازی وی پێشمەرگەھی کر و گۆتێ ، تە بۆ ئەو سێڤ کرینە ..؟ ، ئەرێ تۆ نزایی نە یێت بێ خودانن..؟ ماتۆ نزایی گونەھا وێ چەندە ..؟ و چەند پسیارێن دیتر . پێشمەرگەھەکێ دیتر گۆت ئەزبەنی لێ ببورە بلا بخۆت و نە کارەکێ ھندێ مەزنە ، بارزانی نەمر کەرەمکر و گۆت ، ئەڤە گونەھەکا مەزنە و ئەوێ ڤێ بکەت دێ خیانەتێ ژی کەت . فەرمان دا ھەر نووکە وان سێ سێڤان ببەتەڤ ناڤ ھەمان باغ ، ئەگەر خودانێ یێ بەرھەڤ ببیت رادەست بکەتەڤە و ئەگەر نە ، لناڤ وی باغی دانێتەڤە ، ھەڤالەکێ پلەدار گۆت ئەزبەنی چەوا بۆ سێ سێڤا ڤێ زەحمەتێ ببەت و چەند دەم ژمێرا ناگەھیتە وێرێ، بارزانی لسەر رەئیا خۆ یێ رژد بوو و چەند ھیڤی لێ ھاتنێ کرن ، رێکێ بدەت ب دەواری بچیت دا زۆر بزڤریت ، ب ھەر حال لسەر ڤێ چەندێ رازی بوو . ب ھەر حال ئەو پێشمەرگە نەچار بوو ئەو سێڤ زڤراندن و بارزانی و ھەڤالێن دگەل دا بەردەمی دا قوناغا خۆ ، پشتی دەمێ درێژ ئەو پێشمەرگە گەھشتیەڤ وان . بارزانی فەرمان دا ، ئەو پێشمەرگەە بھێـە چەک کرن و دناڤ لەشکرێ کوردستانێ دەرکر ، لسەر کرنا سێ سێڤا . شۆرەشەک خۆدان ئەڤ سەرکردێ دادوەر و شۆرەشگێر بیت دێ ھەر سەرکەڤیت و ئێکگرتن دناڤبەرا واندا ھەبیت . ھەرچەندە ئەڤە سەرھاتیە زۆرا کورتە و ب ھزاران نمۆنێن دیتر ھەنە ، لێ ئەڤ سەرھاتیە زۆر رامانا ددەت و بۆ ڤی سەردەمی ژی پێتڤی یە مفا ل رێبازا بارزانی نەمر بھێـتە وەرگرتن بێ جوداھیێن حزبی چونکی بارزانی نەمر رێبەرێ مللەتێ کورد بو ، ئەگەر سەرکردێن مە یێن سیاسی و ئیداری بۆ رێڤەبەرنا کاروبارێن رۆژانە مفا ل رێبازا پیرۆزا بارزانی نەمر وەرگرتبا ، ئەم دڤێ رەوشێ دا نەدبوون ، بتایبەت ژلایێ دادوەر و کارگێری و ئابووی . نە مە گوە ل پەیڤا گەندەلیێ دبوو , نە چوداھیێن چینی . نەژی دووبەرکی دروست دبوو ، نەژی پێشمەرگەە و پلەدارێن بن دیوار ھەدبوون ، نەژی رزگاری و ئازادیا مە ھندە گیروو دبوو ؟.