ئاشتیخوازی، خێر و بەڵایا کوردان
November 19, 2017
وتار و بیروڕا
![ئاشتیخوازی، خێر و بەڵایا کوردان](https://gulanmedia.com/public/old_images/nusaran/helmete-kisteyi.jpg )
گەر مرۆڤ دیمەنێن دیرۆکی یێن بارزانییێ نەمر، مەلا موستەفایی دگەل دیکتاتۆرێ مەزن سەدام حوسێنی بینیت پێش چاڤێن خوە، بەلکو مرۆڤ هزر بکەت یان مەبەستا بابێ مهزن ژێ پاراستنا بەرژەوەندییێن خوە و بنەمال و هۆزا خوە بوویەیان ژى بێهێزى و لاوازییا كوردان یا وى دهمى سهدهم بوویه.
گەر مرۆڤ بیرا خوە ل گۆتنێن سەرۆک مەسعوود بارزانی یێن پشتی دامەزراندنا ئیراقا نوو یا فیدرال بینیت و وان درۆشمێن براتییا کورد و عەرەبان شرۆڤە بکەت، بەلکومرۆڤ بگەهیت وێ باوەرییێ، کو یان کوردان ل وی دەمی دیپلۆماسییەت بکار ئینایە یان ژی داهاتێ نەفتێ کورد ژبیر ڤە بربوون.
نها ژی پشتی وان سەربۆران، پشتی رێککەفتنێن تورک و فارس و عەرەبان و داگیرکرنا کەرکووکا دلێ کوردستانێ و شنگالا ئێزدخانێ، نێچیرڤان بارزانی، سەرۆکوەزیرێ هەرێما کوردستانێ هەمجا دەستپێشخەرێ دانوستاندنێن دناڤبەرا هەولێر و بەغدایێ دا یە.
بەلکو نها مرۆڤ حێبەتی دمینیت و پسیار دکەت: بۆچی ئەم بۆ خوە پێڤە ناچین؟
دییارە ئەحمەدێ نالبەند د هەلبەستا خوە دا بەحسێ مە دکر، دەما د گۆت:
"کەر ژ ئینسانێ خراب چێترە باش،
چ کوڕا کەفتێ رێ چوویە پاش" ؟
یان ژی ئەم وەک حەمێ بەرگڕی ژبۆ مەتحە و ژبەر سەررەقییا خوە یا بناڤ و دەنگ ل یا مە گۆتی لێڤە نابین تا کو ژ برس و سەرمایان دا دمرین؟
د دیرۆکا خویناوى یا کوردستانێ دا داگیرکەر و دوژمنان ب هەموو رێیان بزاڤا نەهێلانا مە کوردان کریە و د مالا مە دا ئەم کرینە کۆلە و زیندانی، لێ هەمجا کوردان خوە راگرتییە و دوبارە و سەدبارە بێی دەستبەرداریبوون و ژدەستدانا ئارمانجا خوە یا ئازادییێ، دەست ب خەباتێ کریە.
د وێ دیرۆکا دوور و درێژ دا ژی، گەلێ کورد ژبلی قارەمانییا پێشمەرگەیێ خوە، هەردەم ب بندەست هاتییە ناسین، چ جاران ناڤێ وی ب داگیرکرنا ئاخا ملەتەکێ دی یان خوارنا مافێن گەلەکێ دی نەچوویە، بەلکو بەرووڤاژی، هەر ئەو هەلگرێ ناسنامەیا قوربانییێ بەرژەوەندییێن ملەتێن دی یێن دەڤەرێ و جیهانێ بوویە. سەدەما خوەراگری و قوربانیدانا کوردان ژی تنێ یەک تشتە، ئەو ژی ئاشتیخوازییە.
ئەو بنەمایێ ئاشتیخوازییێ یێ کوردان ژی ژێرا بوویە خێر و بەلا، خێر چونکی د دیرۆکێ دا خوە پیس نەکرییە و خوە پاراستییە ژ تاوانان، بەلا ژی چونکی کورد د دەستێن هەڤسوی و دوژمنێن خوە دا تا ئەڤرۆ ژی ماینە کۆلە و زیندانی.
جوداهییا دناڤبەرا بنەما و درۆشمان دا ژی ئەوە، کو زێدەباری هەموو نەخوەشییان، هەموو رێگرییان، هەموو جەنگ و شەر و کۆمکوژییان، هەموو سۆز و درەو و هیڤییان، مرۆڤێ خوەدان بنەما ل رێیا خوە نازڤریت، خوە رادەست ناکەت، تۆبە ناکەت و ژناڤ ناچیت. دێ مینیت ستینەکا چکلاندی، یا سەرفراز و نەشکاندی.
لەوما ژی چ شێخێ کوردان، چ بابێ مهزن، چ ژی سەرۆک بارزانی زووباوەر و نەزان و بێهێز و دیپلۆماتکار نهبوون. لەوما ژی ئەڤرۆ زێدەباری سەربۆرێ مەها بووری دگەل حکومەتا ئیراقێ و بنپێکرنا دەستووری، داگیرکرنا کەرکووک و شنگالێ، ئاوارەکرنا هەزاران کوردان، بڕینا مووچەیێ هەرێمێ و بزاڤێن ژناڤبرنا سەروەرییا حکومەتا هەرێما کوردستانێ، سەرۆکوەزیر نێچیرڤان رژدتر ژ بەری نها دوپاتییێ ل دانوستاندنێن ئاشتییانە دگەل بەغدایێ دکەت.
نە ژبەر بەژنوباڵا حەیدەر عەبادی، نە ژبەر هێزا میلیشیایێن وی، نەژبەر کوردێن بێ بنەما یێن وی بۆ خوە کڕین، تنێ ژبەر کەساتییا پاک و ئاشتیخواز یا كوردان.
ئهو كهساتییا ئاشتیخواز ژى نه تنێ ب پهروهردهیێ هاتییه ئاڤاكرن، لێ بنهمایێ نهگۆر یێ گهلێ كورده كو ههردهم ئامادهبوویه و ئامادهیه و دێ ئامادهبیت سهرا وى بنهمایى مهزنترین قۆربانییان بدهت.
ژبەر کو هەر وەکو هەلبەستڤانێ مەزن یێ کورد، موئەیەد تەییب دبێژیت:
"نە ئاگر تێر دبیت ژ دارا
نە دەریا ژ چەم و رووبارا
نە دونیا ژ خوینا مە
نە ژی ئەم ژ ئازادییێ".