جڤاکێ کوردستانێ ب گشتی ب راستگۆیی و میانڕەویێ ھاتیە نیاسین ، ئەڤێ چەندێ کاریگەری لسەر بزاڤا سیاسیا کوردستانی ژی کریە ، ئانکۆ بزاڤا سیاسی یا کوردستانی ل وی ژێدەری ھەلاڤێتی یە ، ئەڤەژی باشترین رێکە بۆ پێکڤە ژیانێ و دابینکرنا داھاتەکێ گەر یێ سیاسی و جڤاکی .
ئەڤرۆ پشتی رەوشا کوردستانێ یا سیاسی ئەوا ژ ئەنجامێ خیانەتکاریا ١٦َ ئکتۆبەرێ ژلایێ باندەکێ حزبەکا سیاسی یا کوردستانێ ل کەرکووک و دەڤەرێن دیتر یێن کوردستانێ کۆ بوویە ئەگەرێ داگیرکرنا زۆر دەڤەرێن کوردستانێ ژلایێ حکومەتا بناڤ فیدرالا عیراقێ ب پشکداری و رێنمایێن لەشکرێ ئیرانێ و بێ دەنگا جڤاکیێن نیڤ دەولەتی ، سەرەرای رەفتار و سەرەدەریێن نە یاسایی و دەستووری یێن حکومەتا عیراقێ بەرامبەر ھەرێما کوردستانێ ، بتایبەت گرتن و کوشتنا خەلکەکێ سڤیل و بێ تاوان و ب عەرەبکرنەڤا دەڤەرێن کوردستانی و ھەولێن بەردەوام بۆ لەشکرکێشیکرنێ بۆ سەر ھەرێما کوردستانێ ، ھەرچەندە پێشمەرگەھێن کوردستانێ ب تۆمارکرنا داستانێن مەزن حەشدا شیعی و پاسدارێ، ئیرانێ شکاندن ، بەردەوام داکۆکیێ لسەر پرنسیپێ ئاشتیانە و دیموکراسی دکەت لسەر بنەمایێ دەستوورێ ھەردەمیێ عیراقێ ، ھەرچەندە ھەتا نھو حکومەتا عیراقێ لدیڤ ڤێ بانگەوازا کوردستانێ نەھاتیە و ب فەرمی دەست ب دانۆستاندنا نەکریە . لێ ئەڤ سیاسەتا حکومەتا ھەرێما کوردستانێ ب سەرۆکاتیا نێچیرڤان بارزانی ، رێکەکا سەردەمانە و دیموکراسی یە و پێتڤی یە بەردەوامیێ لسەر ڤی ھەلویستی بکەت .
چونکی ئەگەر حکومەتا عیراقێ لسەر ڤی ھەلویستێ خۆ یێ ڕکونی و دوژمنکارانە بەرامبەر کوردستانێ بەردەوام بیت جڤاکێ نیڤ دەولەتی یان دێ حکومەتا عیراقێ نەچار کەت دەست ب دانوستاندنا کەت لدیڤ بنەمایێ دەستووری یان ژی دێ پشتەڤانیا حکومەتا کوردستانێ دکەت ، ژبەرکو ھەبوونا عیراقەکا شیعە پەرستی و جێبجێکارێن بەرژەوەندێن دەولەتا ئیرانێ دژی بەرژەوەندێن جڤاکێ نیڤ دەولەتی و وەلاتێن زل ھێز و وەلاتێن سونی یێن عەرەب و پشکەکا زۆرا خەلکێ عیراقێ یە . بھێزبوونا ئیرانێ ل عیراقێ ھەوا شیعەکرنێ دەست پێ کریە و گەھشتیە ئاستێ جینۆسایدکرنا کورد و سوننەیان ب گشتی . ئەڤەژی مەترسیەکا زۆرە بۆ موسلمانێن سوننە ب گشتی و جڤاکێ عیراقێ ب تایبەت . لەوما وەلاتێن سوننە لسەر بێ دەنگ نابن . دبیت عەرەبێن سوننەیێن عیراقێ ژی کارڤەدانێن دژوار ھەبن و ل ئاییندەکێ نێزیک دا شەرێ تائیفی سەرھەل بدەت . ئەز باوەرم سازیێن نیڤ دەولەتی و وەلاتێن زل ھێز نەخاسمە ئەمریکا ڤێ راستیآ باش دزانیت و ھەست ب خەلەتیا خۆ کریە بەرامبەر کوردستانێ ، لەوما ھەلویستێ وان ھێدی ھێدی بەرامبەر کوردستانێ بەرەڤ ئاسایی بوونەڤێ دچیت و لسەر ئاستێ سیاسەتمەداێن مەزن و بەرنیاس تەکەزیێ لسەر پشتەڤانیا کوردستانێ دکەن و گەلێ کورد و حکومەتا کوردستانێ ب دوستێن خۆ دزانن و بالا دەستیا ئیرانێ ژی ل دەڤەرێ ب مەترسی دبینن . لسەر ئاستێ نافخۆیی ژی گاڤێن کومەتا ھەرێما کوردستانێ زۆر د ئەرێنی نە بۆ دروستکرنا کۆدەنگیا سیاسی بەرامبەر رەفتار و سەرەدەریێن حکومەتا عیراقێ دژی کوردستانێ و پێتڤی ھەمی حزبێن کوردستانێ ب ئەرکێ خۆ یێ نەتەوی و نشتیمانی و جڤاکی راببن داکۆ بشێن ڤێ قۆناغێ دەرباز بکەن ، نەخاسمە پشتی سەرنەگرتنا پیلانا دوژمن و داگیرکەرا بۆ بەرپاکرنەڤا شەەرکێ ناڤخۆیی ل کوردستانێ و دابەشکرنا ھەرێما کوردستانێ ژلایێ جڤاکی و سیاسی و ئیداری ، ئەڤ قوناغا داھاتی بساناھی ترە ل قۆناغا پشتی ٢٦ /١٠/٢٠١٧ و خۆراگریا خەلک و پێشمەرگەھێن کوردستانێ کۆ ب حیکمەتا سەرۆک بارزانی و ھەڤچەپەرێن وی بوون . نھو ژی ھەول و گاڤێن سەرۆکێ حکومەتا کوردستانێ د بەرژەوەندا گشتی یا کوردستانێ دانە ژلایێ سیاسی و ئیداری . دووبارە دکەینەڤە راستی و میانڕەویا حکومەتا کوردستانێ بەرامبەر ڤێ رەوشێ و رەفتارێن ھۆڤانە یێن حکومەتا عیراقێ فاکتەرێن خورتن بۆ دەربازبوونا کوردستانێ دڤێ رەوشێ دا ل دەمەکێ کورت و دابینکرنەڤا پشتەڤانیا نیڤ دەولەتی بۆ کوردستانێ و مەحالە جڤاکێن نیڤ دەولەتی و وەلاتێن زلھێز و عەرەبی و خەلکێ عەرەبێن سوننە لسەر ڤێ تائیفە پەرستیا شیعەگەری ل عیراقێ رازی ببن .