پشتی روودانا خیانەتکاریا فرۆتنا کەرکووکا دلێ کوردستانێ ژلایێ باندەکێ ئێکەتیا نشتیمانی کوردستانێ ل ١٦/١٠/٢٠١٧ ب حەشتدا ئیرانی و مەزھەب پەرستێن شیعەیێن عیراقێ ، ھەرێما کوردستانێ و دەڤەر ئێخستە بەرمەترسیێن دژوار ، ژبەر بالا دەستیا ئیرانێ ل دەڤەرێ کۆ دگەل بەرژەوەندێن جڤاکێن نیڤ دەولەتی ناگۆنجن ، ھەرچەندە ل دەسپێکێ جڤاکێن نیڤ دەولەتی یێ بێ دەنگ بوو ، لێ ئەڤ بێدەنگیە ژ ئەنجامێ خیانەتا وێ باندا بناڤێ کوردا بوو . لێ ب حیکمەت و سیاسەتا لێزانا سەرۆک بارزانی شیا د وان کاودانێن بەرتەنگ دا ھەرێما کوردستانێ ل مەترسیەکا ھەرە دژوار ب پیلانا ئیرانێ و ب پالپشتیا حکومەتا شیعەگەریا عیراقێ و وێ گرۆپێ ئێکەتیا نشتیمانی کوردستان دەرباز بکەت . ژوان مەترسیا دووبارەبونەکا شەرێ ناڤخۆیی دناڤبەرا پارتی و ئێکەتیێ دا ، ئەگەر ھاتبا روودان ئەزمۆنا سیاسی یا کوردسانێ دا چەندین سالان پاش کەڤیت و دبیت کارەساتەکا مینا رێکەفتنا رەشا ئەلجەزائرا سالا ١٩٧٥ دووبارە ببا ، ئەگە دووبارە ژی نەببا دا شەرەکێ گران و دوومدار دناڤبەرا ھەردوو ئالیا روودەت و دا بیتە فاکتەر و رێخۆشکەر بۆ کۆنترۆلکرنا ھەرێما کوردستانێ ژلایێ حکومەتا ناڤەندیا عیراقی .
ژلایەکێ دی ب رێنمایێن سەرۆک بارزانی پێشمەرگەھێن کوردستانێ کو پرانیا ھەرە زۆر کادر و ئەندام و لایەنگرێن پارتی بوون شیان رێکێ ل ھاتنا حەشدا شیعی و پارسدارێن ئیرانێ بگرن ل پردێ و پاشان ل مەخموور و مەحموودیێ کو دربێن ھەرە زۆر ل حەشدا شیعی دان و لسەر ئاستێ نیڤ دەولەتی دەنگڤەدا و لسەر ئاستێ ناڤخۆیی ژی دیار بوو کو پارتی دیموکراتی کوردستانێ پارتیا کورد و کوردستانیا یە و ئاییندێ کوردستانێ بڤێ پارتیێ ڤە یآ گرێدایی یە و بھێزترین بەرەڤانە ل دەسکەفتێن نەتەوی و نشتیمایێن کوردستانێ .
سڕکرنا ئەنجامێ راپرسیا سەرخۆبوونا کوردستانێ ژی حیکمەتەکا دیترا سەرۆک بارزانی بوو دڤان کاودانان دا ، چونکی ئەگەر دڤان کاودانان دا کورد لسەر سەرخۆبوونێ د رشت بانە ئەو باندێ ئالیآ سەوز دا دەرفەتێ زێدەتر دەنە وەلاتێ ئیرانێ کوردستانێ داگیر بکەن و دا ئەو ئالی ب فیتا ئیرانێ و شیعەیێت عیراقێ مەزنترین دڕب ل دەسکەفتێن کوردستانێ دەن و دبیت دەسھەلاتا کوردستانێ ژناڤ چووبا ، ژلایەکێ دیتر سڕکرنا ئەنجامێن راپرسیآ ، دیتنێن جڤاکێ نیڤ دەولەتی بەرامبەر کوردستانێ گۆرین و ل حالەتێ تاماشەکرنێ بوویە حالەتێ پشتەڤانیێ و ئەڤ پالپشتیە بەرە بەرە یا زێدە دبیت و ئەز باوەرم ل چەند ھەیڤێن داھاتی دا دێ گۆرانکاریێن مەزن درۆست بن و سەنگا ھەرێما کوردستانێ دێ لبەری سالێن چوویی زێدەتر بیت و پشتەڤانێن بھێز یێن سەرخۆبوونێ لسەر ئاستێ جیھانێ دێ زۆربن و پالپشتیا عیراقێ ژی لسەر ئاستێ جیھانێ دێ زۆر بن و بڤێ داگیرکرنا عیراقێ ژلایێ ئیرانێ رازی نابن .
رازی نەبوونا سەرۆک بارزانی بۆ بەردەوامی دان ب سەرۆکاتیا ھەرێما کوردستانێ و دابەشکرنا دەسھەلاتا لسەر چوند سازیان ، خالەکا دیترا ئەرێنی بوو ، چونکی بۆ جیھانێ خۆیا کر کو سەرۆک بارزانی چ جارا سەرۆکاتی ب پلە ھژمار نەکریە و بۆبەرژەوەندا کوردستانێ و گەھشتن ب ئارمانجێن نەتەوی و نشتیمانی سەرۆکاتی وەرگرتیە و بۆ جیھانێ خۆیا بوو کو پارتی و سەرۆک بارزانی دیموکراسیەتێ پراکتیزە دکەن نەک تنێ درۆشمن وەک دەولەتا عیراقێ و چەندین وەلاتێن دەڤەرێ . پێشمەرگاتیا سەرۆک بارزانی باشترین مەحالە بۆ پاراستنا کوردستانێ ل ھەمی مەترسیا و سەرۆک بارزانی ھەردەم ژلایێ خەلکێ نشتیمان پەروەرێ کوردستانێ لێڤەرگەرێ سیاسی و جڤاکیێ کوردستانێ یە و سەرۆک بارزانی ب پێشمەرگیاتیێ و لێڤەگەریێ دێ شێت زۆر گاڤێن دیتر بۆ خزمەتا خەلکێ کوردستانێ بھاڤێژین کو لدەمێ سەرۆکاتیێ نەدشیا بھاڤێژیت .
بتایبەت ھندەک موستەحەقاتێن پارتی دیموکراتی کوردستان چ یێن سیاسی یان ئیداری ، ئەڤەژی بۆ کادر و جەوماوەرێ پارتی دێ بنە دەسکەفت . ب دیتنا من لدەمەکێ کورت دا رەوشا سیاسی یا ھەرێما کوردستانێ ب ڤان حیکمەتێن سەرۆک بارزانی دێ د قازانجێ خەلکێ کوردستانێ دالەنگن و ھیڤیا خەلکێ کوردستانێ کو سەرخۆبوونا کوردستانێ لسەر مێزێن جڤاکێ نیڤ دەولەتێ دێ بیتە گەرمترین مژار و گەھیتن .