دامەزراندنا دەولەتەکا کوردستانی خەونا ھەرە مێژینەیا خەلکێ کوردستانێ بوویە و بۆ ڤێ چەندێ خەلکێ باشوورێ کوردستانێ بن سیبەرا شۆرەشا مەزنا ئیلۆنێ ب رێبەریا بارزانی نەمر و شۆرەشا گولانا پێشکەفتنخواز خەباتەکا دوور و درێژ کریە و ب ھزاران قوربانی داینە ، ل شۆرەشا ئیلۆنێ بناغێ دەولەتا کوردستانی دانایە و ل گۆلانێ ژی ئەڤ بناغە بەرفرەھتر کریە ، ب پەرەوەردەکرنا خەلکێ کوردستانێ ب ھەستەکا نەتەوی و نشتیمانی و داکۆکیکرن لسەر بدەستڤەئینانا ڤی مافەی .
پشتی سەرھەلدانا پیرۆزا خەلکێ کوردستانێ ل سالا ١٩٩١ و پاشان ئاڤاکرنا پەرلەمان و حکومەتا ھەرێمێ و سازیێن دیتر بۆ جیھانێ خۆیا بوو کۆ خەلک و دەسھەلاتا کوردستانێ ، بەرۆڤاژی خەلک و دەسھەلاتێن ڤێ دەڤەرێ نە و دڤێن ب ئاشتیانە و لسەر بنەمایێن دیموکراسی و مافێ مرۆڤ دڤێت وەلاتەکی ئاڤا بکەن کو لدیڤ بنەمایێن نیڤ دەولەتی نە . پشتی ئاڤاکرنا دەولەتا نوو یا عیراقێ لسەر بنەمایآَ دیموکراسی و فیدرالی روولێ کوردان ھەرێ کاریگەر و بەرچاڤ بوو و عیراق ل شەرەکێ ناڤخۆیی رزگار کرن ، ئەڤ چەندەژی بۆ موکمکرنا بنەمایێن دەولەتەکا کوردستانی بوو و خورتکرنا پەیوەندیێن کوردستانی دگەل جیھانێ . پشتی داگیرکرنا زۆربەری دەولەتا عیراقێ ژلایێ تیرۆرستێن داعش ل سالا ٢٠١٤ ، ھەر کورد بوون ب سەرپەرشی و بەشداریا راستەوخۆیا سەرۆک بارزانی ئەڤ مەزنترین ھێزا تیرۆرستیا جیھانی ژناڤ بر و ب نوونەرایەتیا جیھانێ شەرێ ڤان تیرۆرستا کر ، و دڤان کاودانێن بەرتەسکێن ئابووری دا ھەرێما کوردستانێ ب فەرمان و رێنمایێن سەرۆک بارزانی و سەرۆکێ ھەرێما کوردستانێ پێشوازی سەدان ھزار ئاوارە و پەنابەرا کر و بێ جیاوازیێن نەتەوی و ئەتنی و ئایینی و جوانترین سەرەدەری دگەل ھاتە کرن ، کۆ بوویە جھێ حیبەتیا جیھانێ .


ژئایەکێ دی ژبەرکۆ سەرۆک بارزانی و ھەرێما کوردستانێ گەھشتنە باوەریەکا مۆکۆم کۆ ئەڤ حکومەتا عیراقێ ژی وەک یێن بەرێ ل عەقلیەتەکا بەرتەستا تائیفی و نەتەوی دانە بەرامبەر کوردستانێ و گۆھداریا دەستوور و یاسا و رێکەفتنا ناکەن و تاکڕەوانە سەرەدەریێ دگەل کوردستانێ دکەن ، لەوما ب نەچار بەرەڤ راپرسیا سەرخۆبوونا کوردستانێ چوون و ب سەرکەفتیانە ئەڤ پرۆسە ھاتە ئەنجامدان و زۆرینەیا ھەرە زۆرا خەلکێ کوردستانێ بەشداری تێدا کر و بەلێ بۆ سەرخۆبوونێ ھەلبژارت . ھەرچەندە شۆرەش و خەباتا گەلێ کورد ب رێبەریا بارزانی نەمر و سەرۆک مەسعود بارزانی بناغێ دەولەتا کوردستانێ دانا بوو ، لێ سەرەرای پێشوازی نەکرنا نیڤ دەولەتی و دژبەریا وەلاتێن ھەرێمی وەک عیراق و تورکیا و ئیران ئەڤ راپرسیە بوویە بەلگەنامەکا دیرووکی ددەستێ سەرکردێن کوردستانێ دا بۆ ھەتا ھەتا .ئەگەر خیانەتا نافخۆیی یا ھندەک سەرکردێن (ینک) نەبا ئەڤ رەوشە بسەر کوردستانێ نە دھات . راستە ئەڤرۆ ژبەر رەوشا تایبەت یا کوردستانێ ، ئەنجامێن راپرسیێ ھاتینە ڕاگرتن ( سرکرن ) لێ ئەز باوەرم ل ئاییندەکێ نێزیک دا جڤاکێ نیڤ دەولەتی دێ ب خەلەتیا خۆ زانیت بەرامبەر گەلێ کورد و ب ھێزەکا گەرم و خورت تر کوردستانێ دێ ھێتەڤ گۆرەپانا سیاسیا دەڤەرێ و ئیرادا گەلێ کوردستانێ دێ بسەرکەڤیت و گەھینە مافێ خۆ یآَ سەرخۆبوونێ . چونکی بالا دەستیا ئیرانێ بڤی رەنگی ل دەڤەرێ مەترسیەکا ھەرە مەزنە لسەر جیھانێ و جڤاکێ نیڤ دەولەتی . رەنگی ئەڤرۆ خەلکەکێ نەیار و خۆفرۆش وەسا ھزر بکەت پشتی ڤێ رەوشێ و دووماھی ھاتنا دەمێ سەرۆکاتیا سەرۆک مەسعود بارزانی . دووماھیا سەرکەفتنا بزاڤا رزگاریخوازیا کوردی و دەسھەلاتداریا پارتی دیموکراتی کوردستانە ل کوردستانێ . ئەڤ خیالەکا خاڤە و ھەردەم سەرۆک بارزانی پێشمەرگە و بەرەڤانیێ کورد و کوردستانێ یە و تاکە لێڤەگەرێ سیاسی و جڤاکی یە ل کوردستانێ و پارتیا وی ژی کانگەھا ھەلکەفتنا سەرکردێن مەزنە کو د ھەمی دەلیڤان دا بشێن سەرکردایەتیا مللەتێ کورد بکەن .


خەبات و خورگریا سەرۆک بارزانی و پارتیا وی بۆ گەھاندنا مللەتێ کورد بمافێن خۆ یێن نەتەوی و نشتیمانی چ جار ناھێنە ژبیرکرن و وان بناغە و ئاڤاھیێ دەولەتا کوردستانی ئاڤاکریە ، تنێ ئاستەنگ د دەمی دا ھەیە و ھەر دەمێ دەولەتا کوردستانێ د ھێتە راگەھاندن دێ لسەر وی ئاڤاھی و بناغەی بیت ئەوێ سەرۆک بارزانی و پارتیا وی ئاڤاکرین ، ئەگەر پشتی سەد سالێن دیتر ژی بیت .