پشتی خەلک و جەماوەرێ کوردستانێ ب بریارا پرانیا حزبێن کوردستانی و رەزامەندیا پەرلەمانێ کوردستانێ ، لرۆژا (٢٥) ێ ئیلۆنێ د پرۆسەیەکا ئاشتیانەدا و د راپرسیەکا دیموکراسی دا بریار لسەر دیارکرنا چارەنڤیسێ خۆ دای ، وەلاتێن داگیرکەر و شۆفینی مینا کۆرگێن دەف بخۆین ھار و دین کرن . ژبەرکۆ ل ئێک کۆتاریا خەلکێ کوردستانێ و لایەنێن سیاسی ترسیان ، لەوما ژبووی دژبەریا خەلکێ کوردستانێ ناکۆکیێن خۆ یێن دژوار و دیرۆکی لادان و ب ئێک دەنگی بریار لسەر دژبەریا کوردستانێ و ناڤبرنا دەسکەفتێن نشتیمانیێن کوردستانێ دان . ئیران و تورکیا پلانا داگیرکرنا کوردستانێ ب چاڤدێری و سەرپەرشتا ئیرانێ بۆ عیراقێ دانا .
بێ لبەرچاڤگرتنا مافێ مرۆڤایەتی و جیرانەتی و ئایینی و خەبات و قوربانیێ، پێشمەرگەھێن کوردستانێ ل بەرەڤانیکرنا جیھانێ دژی تیرۆرستێن داعش ، ڤان وەلاتان ب رەزامەندیا ھژمارەکا سەرکردایەتیا ئێکەتیا نشتیمانی کوردستانی بتایبەت مالباتا جەلال تالەبانی کەرکووکا دلێ کوردستانێ و زۆربەی دەڤەرێن کوردستانی ب خیانەتەکا نشتیمانی رادەستی ئیرانێ و ھێزێن حەشدا شیعی کرن و ژبلی زیان و زرارێن گیانی دووزا سیاسی یا کوردستانێ پاشڤەبر بۆ بەرژەوەندێن ماددی .


دبیت پسیار بھێتەکرن چما ڤان کەسان خیانەت کر ..؟! . ب دیتنا من مالباتا تالەبان پشتی مرنا جەلالی ل پاشەرۆژا خۆ ددتریسان و دزانن ئیدی ئێکەتی نشتیمانی کوردستان ملکێ وان نیە و نەشێن ب حەز و بۆ بەرژەوەندێن خۆ بکار بینن و خیانەکا وان ل سەرکردێن خۆ کری نەخاسمە یا دارایی دێ ئاشکرا بیت و بڤێ چەندێ ئەو دێ روو ڕەش و شەرمرزار بن , لەوما پەنا برە بەر ڤێ خیانەتێ کۆ لاپەەرکێ دیترێ ڕەشێ خیانەتێ لسەر لاپەرێن خیانەتێن دیترێن وان زێدەکر ، ژلایەکێ دی ھەولا وان ئەو بوو ھەرێما کوردستانێ دابەش بکەن و ل سلێمانیێ دەسھەلاتەکا ئیداری نەک سیاسی دابنێن .

نھو پشتی پیلانا وان سەرگرتی تەپا سیاسی و ئێک لاکەر کەفتە بەردەستێ خەلکێ نشتیمان پەروەر و وەلات پارێزێ کوردستانێ بتایبەت وان سەرکردێن ئێکەتیێ ئەوێن دژی ڤێ خیانەتێ . چونکی ئەڤ پیلانە دژی خەلکێ کوردستانێ و دەسکەفتێن مە یێن نەتەوی و نشتیمانی بوو . ژلایەکێ دی دوورکرنا وان سەرکردێن ئێکەتیێ بوو ل ژێدەرێ بریارا وێ حزبێ و ئیدارە و دارایی یا وان . بۆ قووناغا داھاتی پێـتڤی یە خەلکێ کوردستانێ ب ھەرستەکا نشتیمانی و راست و دروست ھەلسەنگاندنا رەوشێ بکەت و رەش و سپیا ژێک ڤاڤێریت ، چونکی دیار بوو ڤان خیانەتکارا پێشمەرگەھێن کوردستانێ ژی ئەێن سەر ب وان ڤە بسەردا برن . دیسان دیار بوو سەرۆک بارزانی و پارتی دیموکراتی کوردستان ھەتا چ راددە خەمخورێ خەلکێ کوردستانێ یە و ژبووی گەھشتن ب ماف و ئارمانجێن نەتەوی وو نشتیمانی خەبات کریە و قوربانی ژی دانە ، ئەگەر خۆراگریا وان نەبا بەرسینگێ لەشکرێ زەبەلاحێ حەشدا شیعی یا مەجوسی ب پشکداری و سەرپەرشتیا پسپۆر و شارەزایێن ئیرانی نەدگرت و پیلانا داگیرکەرا بۆ رادەستکرنا ھەرێما کوردستانێ دا سەرگریت . بۆ قوناغا داھاتی پێتڤی یە خەلکێ کوردستانێ بتایبەت یێ دەڤەرا کەسک ( سلێمانی ) گۆھداریا راگەھاندنا وان یا گۆبلسی نەکەن و رێکێ ل بەردەوامیا خیانەتکارا بگرن و ب گیانێ رەوشەنبیریا نشتیمانی و نەتەوی سەرەدەریێ دگەل رەوشێ بکەن و پابەندبوونا حزبایەتی لابدەن ، داکۆ ب سەرفیرازی ئەڤ رەوشە دەرباز ببیت . ئەز باوەرم ب ئێک رێزی و ئێک گۆتاریا خەلکێ کوردستانێ ئەڤ قوناغە زوو دێ دەربازی بیت و جڤاکێ نیڤ دەولەتی ژی دێ نەچار بیت پشتەڤانیا خەلکێ کوردستانێ کەت . ئەگەر خەلکەک وەھا ھزر بکەت ئەڤ رەوشە دەرئەنجامێ راپرسیا سەرخۆبوونا کوردستانێ بوو ، ئەڤە بۆچوونەکا خەلەتە و پیلانەکا دارشتیا رژێما شیعەگەریا عیراقێ بوو و خیانەتکاریا وان سەرکردێن ئێکەتیێ رێکخۆشکەرێن وێ پیلانێ بوون ، ژلایەکێ دی پێتڤی یە خەلکێ کوردستانێ بتایبەت یێ زوونا کەسک حکومەتا کوردستانێ ب حکومەتا خۆ بزانیت و خۆ ل دوو ئیدارەیی یێ دوور بکەت و پشتەڤان بن بۆ بەردەوامیدانا حکومەتا ھەرێما کوردستانێ ب خزمەتگۆزاریا و کارێن رۆژانە و وەنەکەن ڤالاھیا ئیداری درۆست ببیت . ب دیتنا من مەرەما ڤی گرۆپێ خیانەتکاری ئەوە ل سلێمانیێ و ھەلەبچە و گەرمیان ڤالاھیەکا ئیداری درۆست بکەن , دا دەلیڤە بۆ ھەلکەڤیت ب تەمامی دەستا لسەر دانێن .
لدووماھیێ دبێژین تەپە لبەر دەستێ خەلکێ کوردستانێ یە و پێتڤی یە ب ئێک گۆتاری و ئێک ھەلویستی پشتەڤانێ سەرۆک بارزانی و حکومەتا ھەرێما کوردستانێ بن بۆ دەربازکرنا ڤێ رەشێ و بەەرڤ قوناغێن باشتر بچین ، ئەڤ پیلانە ل پیلانێن بەری وەک (١٩٧٥ و ١٩٨٨) مەزنتر نیە .