کەسایەتی و ھەلکەفت زۆر جاران دبنە فاکتەرێ ئێک رێزی و ئێک پەیامیێ و ئاشتەوایی یێ دناڤ جڤاکی دا ژلایێ سیاسی و جڤاکی ، جڤاکێ کوردستانێ ژلایێ سیاسی یێ بەرنیاسە ب نەتفاقی و دووبەرەکیێ ، ژبەرکر جوگرافیا کوردستانێ لسەر چار وەلاتان ھاتیە دابەشکرن و ئەڤ وەلاتێن داگیرکەر ژی ھەردەم ھەول ددەن ئەڤ دووبەرەکیە یا بەردەوام بیت داکۆ دبەرژەوەندێن وان پێ بھێنە پاراستن .
لێ سەرەرای ڤێ چەندێ د زۆر ھەلکەفتان دا کەسایەتی و سەرکردێن کورد چ ل دەمێ ژیانێ دا یان لدەمێ وەغەرکرنێ ناکۆکی و دووبەرەکی لاداینە و گەلێ کورد ب گەلەکێ ئێکگرتی و ئێک پەیام نیشا جیھانێ دایە و دوژمن و داگیرکەر ژی پێ غەمبار و دلتەنگ کرینە ، رۆژا شەشێ چریا ئێکێ د دیرۆکا کوردستانێ بوویە رۆژا ئێکگرتن و ئێک گۆتاریا خەلکێ کوردستانێ ب ھەمی ئۆل و مەزھەب و نەتەوەڤە .
وەکی ڤێ رۆژێ لسالا ١٩٥٦ زڤراندنا جەنازێ پیرۆزێ شێخ مەحموودێ حەفید ئێکەم شاھێ کوردستانێ و کەسایەتیێ ھەرە مەزنێ کوردستانێ ژلایێ سیاسی و جڤاکی ل بەغدا بۆ کوردستانێ ، ھەر چەندی من وێنە و زانیاری لسەر وێ رۆژێ نینە ، لێ ئەز باوەرم ، ل وێ رۆژێ ئالی و کەسانێن ناکۆک و خودان ھزێن جودا د ئێک جە دا کۆم کرینە .
ھەر وەسا ڤەگەریانا بارزانی نەمر رێبەرێ بزاڤا رزگاریخوازیا کوردستانێ و سەرۆکێ پارتی دیموکراتی کوردستان پشتی ١٢ سالا ل ئێکەتیا سۆفیەتا بەرێ بۆ عیراقێ و پاشان بۆکوردستانێ ل رۆژا ٦/١٠/١٩٥٨ ، نە تنێ ئێک رێزیا گەلێ کورد نیشا نجیھانێ دا ، بەلکی ئەو جڤاکێ عیراقێ ئەوێن لسەر ھزرا شۆفینی و دژبەریا گەلێ کورد و بزاڤا رزگاریخوازیا کوردستانی ھایتە پەروەردەکرن ، ب ھەمی ئۆل و مەزھەب و پێکھاتە د ئێک گۆرەپان کۆم کرن و لدەمێ پێشوازیکرنا ڤی کەسایەتیێ مەزنێ کوردستانی و عیراقی و جیھانی کو بارزانی نەمرە ، ئەڤێ بوویەرێ رەوشا عیراقێ ب گشتی و یا کوردستانێ ب تایبەت ل قوناغا دژبەریێ و ناکۆیێن کوور بەرەڤ برایەتی و پێکڤە ژیانێ بر .
ل شەشێ چریا ئێکێ یا سالا ١٩٩٣ ێ ژی ئینانەڤا جەنازەیێن پیرۆزێن بارزانی نەمر و کاک ئدریسێ ھەردەم ساخ ل ئیرانێ بۆ ھەرێما کوردستانێ و گۆرستانا بارزان ب وێ کەرنەڤالا ھەرە مەزنا جەماوەری ل ھەمی باژار و بەشێن کوردستانێ روودانەکا ھەرە مەزن بوو ، چونکی خەلکێ کوردستانێ ب ھەمی بیر و بۆچوونێن سیاسی و جڤاکی و ئایینی و ئەتنی ھەر لسەر سنوورَن ئیرانێ ل دەڤەرا سلێمانیێ ھەتا بارزان ب رشتنا رووندێن خەمباریێ و درۆشمێن نەتەوی و ئێک رێزیێ ل پێشوازیا جەنازەیێن ڤان ھەردوو نەمران بوون . دڤێ رۆژێ دا خەلکێ کوردستانێ دیارکر کو ئێک بیر و باوەرە و بیر و بۆچوونێن حزبی بۆ خزمەتا ئێک رێزیێ نە و ئێک رێزیی ژی بۆ بدەستڤەئینانا ئارمانجێن نەتەوی و نشتیمانی نە و نەیارێن کوردستانێ د وێ رۆژێ دا حیبەتی مان و بێ ئۆمێن بوون ل سەرگرتنا پیلانێن وان بۆ پارچەکرنا جڤاکێ کوردستانێ . ھەر دوان رێو و رەسماندا رەحمەتی مام جەلال تالەبانی سکرتێرێ گشتی یێ ئێکەتیا نشتیمانی کوردستان د گۆتارا خۆدا گۆت ( ئەز ژی کورێ مەلا مستەفای بارزانی مە ) ، ئەڤە خۆ بخۆ پەیامەک بۆ نەیارێن رزگاری و ئازادیا کورد و کوردستانێ یێن نافخۆ و دەرڤە ، خەلکێ کوردستانێ چەند جوداھی ھەبن بۆ پرسێن نشتیمانی ھەر د ئێکگرتی نە .
ل ھەمان رۆژ سالا ٢٠١٧ جەنازێ پیرۆزێ سەرۆک کۆمارێ بەرێ یێ عیراقا فیدرال و سکرتێرێ گشتی یێ ئێکەتیا نشتیمانی کوردستان ل وەلاتێ ئەلمانیا گەھشتنەڤ کوردستانێ ، ئەڤ رۆژە ئێک بوو ل رۆژێن ھەرە خەمناک ل کوردستانێ و دەنگڤەدانەکا ئێکجار زۆر لسەر ئاستێ جیھانێ ڤە چ ژبەر کۆچکرنا ڤی کەسایەتیێ مەزن و رۆلدار د دیرۆکا بزاڤا رزگاریخوازیا کوردستانی و جڤاکێ کوردستانێ و عیراقا پشتی رژێما بەعسا ، دڤان رێو رەسمان ژی دا خەلکێ کوردستانێ خۆیا کر کۆ خۆشی و نەخۆشیێن وان ئێکن و د رۆژێن ھۆسادا خەلکێ کوردستانێ ئێک بوون و ئێکگریا خۆ نیشا جیھانێ ددەت . بەرھەڤبوونا جەنابێ سەرۆک بارزانی و نێچیرڤان بارزانی ل رێو رەسمێن پرۆتۆکۆلیێن پێشوارزیا جەنازێ نەمر مام جەلال کۆ جیھان پێ حیبەتی کر ، پەیام و ھۆشداریەکا ھەرە دژوار بۆ بوو دۆژمن و نەیارێن کوردستانێ ، لەوما ب بەھانەیا پێچانا جەنازێ وی ب ئالایێ کوردستانێ لجھێ ئالایێ عیراقێ رێو رەسم بجە ھێلان .
ب دیتنا من ڤەگەراندنا وان ھەمی نە ژبەر ڤێ ئەگەرێ بوو بەلکی ئێک بوون و ئێک گۆتاریا ھێز و ئالیێن سیاسی لوی دەمی ئەو ترساندن و چاڤێن وان پێ رانەبوون و ھەلوەشیانا پیلانێن وایە دژی کوردستانێ نەخاسمە پشتی ئەنجامدانا راپرسیا سەرخۆبوونێ . پەیاما سەرۆک مەسعود بارزانی و نێچیرڤان بارزانی سەرۆکێ حکومەتا ھەرێما کوردستانێ بڤێ ھەلکەفتا دلتەزین کۆ تێدا رۆلێ رەحمەتی سەرۆک مام جەلال زۆر ب گرنگ ھەلسەنگاند و مالئاڤاھیا وی ب زیان و ڤالاھیەکە ھەرە مەزن و دل تەزین ناسان و چەوا مام جەلالی خۆ ب کورێ بارزانی نەمر ھژمار کریە وەسا سەرۆک بارزانی خۆ ب برای مام جەلالی ھژمار کر و بەھی ب ھەھیا خۆ زانی . زێدەباری دیارکرنا رۆلێ مەزنێ رەحمەتی ل ئاشتەوایا سیاسی و چارەسەرکرنا قەیرانان ل کوردستانێ .
لەوما دبێژین ٦ ێ چریا ئێکێ رۆژا ئێک رێزی و ئێک پەیامیا کوردستانیا یە و دڤێ رۆژێ دا خەلکێ کوردستانێ بۆ دوست و دوژمنا دیارکریە ، پیلانێن دوژمنا نەشێن تۆڤێ دووبەرەکێ دناڤ کوردستانێ دا شین بکەن و ئەوێ ھاتیە چاندن ژی مە ھشک کر .
پێتڤی یە خەلکێ کوردستانێ ڤێ چەندێ ب دەلیڤە بزانیت و بۆ بەردەوامی دا لسەر ڤی ھەلویستی ، بۆ بچە ئینانا بریارا خەلکێ کوردستانێ ل راپرسیا سەرخۆبوونا کوردستانێ و شان کرنا ڤان کەسایەتیێن مە یێن مەزن بۆ ژبوی ڤێ رۆژی خەبات کریە و خۆ کریە قوربانی .