ده‌وڵه‌تی کوردستان، چ جۆرە ده‌وڵه‌تێك ده‌بێت؟
بەختیار جاف
سەرۆک بارزانی لەچەند هەفتەی ڕابردوودا، لەچەندین کۆڕو کۆبوونەوەی لەگەڵ چین وتوێژەجیاجیاکانی کوردستان باسی کرد، بیرۆکەو پرۆژەی دەوڵەتی کوردستان لەسەر ڕۆڵ و پێگەی (مافی مرۆڤ و پێکهاتەکانی کوردو نەتەوەکانی دیکەو موسڵمان و ئاینەکانی تری، لەسەر بنەمای وەک یەک لەماف و ئەرکدا داڕێژراوە، هەروەها بەڕێزیشیان لەزۆر بۆنەو کۆبوونەوەو ووتاریشدا ئاماژەی بەوەکردووە، کە بەها و دەوڵەمەندیی کوردستان لە هەمەڕەنگی و فرەپێکهاتەکەیدایە، کوردستان وڵاتی کوردو کریستیان و ئێزدی و تورکمان و شەبەک و فه‌یلی و كاكه‌یی و عه‌ره‌به، کە ناسنامەی جیاوازی ئەو پێکهاتانە لە یاساکانی کوردستاندا ددانی پێدا نراوە، دەوڵەتی کوردستانیش لەسەر ئەو بنەمایە دادەمەزرێت.
بارزانی دەیەوێت دەوڵەتێک دروست بکات، دەوڵەتی هەمووان و بۆ هەمووان بێت، ئه‌و سیستەم وشێوازەشی لەحكومڕانی ده‌وڵه‌تی كوردستان كه بارزانی ڕای گه‌یاندووە، گەلێک گرنگە، وەک هاوسه‌نگی له نێوان ته‌واوی پێكهاته ئاینی ونه‌ته‌وه و شارەکانی كوردستان، (سه‌رۆك بارزانی) لەقسەکانی چەند هەفتەی ڕابردووشیدا به‌هه‌موو كوردستانیانی ڕاگه‌یاند، "ئێوه چۆنتان ده‌وێت وەها ده‌وڵه‌تی كوردستان دادەمەزرێت، دەوڵەتی کوردستان، ده‌وڵه‌تێكی كۆماری په‌رله‌مانی فیدڕاڵی ده‌بێت و هه‌موو پارێزگایه‌ك په‌رله‌مانی خۆی ده‌بێت و هه‌موو ده‌سه‌ڵاته سیاسیی و كلتوری و ئابوریه‌كانی خۆی مومارسه‌ده‌كات، لەدەوڵەتی کوردستان هەموو لایەنێک شەریک دەبن"، ئەو سیستەمەی کەبارزانی ڕایگەیاندووە، سیستەمێکە لەحکومڕانی کە لەتەواوی وڵاتانی ڕۆژئاواو تەواوی جیهان قبوڵ كراوه‌و هەموو وڵاتانی جیهانیش ئەو سیستەمە به‌سیته‌مێكی دیموكراسی لەقه‌ڵه‌م دەدەن و بۆ ناوه‌نده‌كانی جیهانیش گەلێک گرنگه دەوڵەتێکی لەمجۆرە لە ڕۆژهەڵاتی ناوەڕاست دابمەزرێت.
ئه‌و شێوازە لە حكومڕانی ده‌وڵه‌تی ئایندەی كوردستان، بۆ ئاینده‌ی تەواوی ناوچەکە گرنگەو نموونەیەکی بەرزودیاریشە لە هاوسه‌نگی نێوان پێكهاته ئاینی و نه‌ته‌وه‌ییەكانی ناوچەکە، کە لەمێژووی دوورودرێژی ڕۆژهەڵاتی ناوەڕاستدا نموونەی نەبووە.
