شۆرەشا مەزنا ئیلوونێ ب پلان و بەرنامێ پارتی دیموکراتی کوردستان و ب رێبەریا بارزانی نەمر ب درێژاھیا نێزیکی چاردە سالان د کاودانێن تایبەت دا یێن سیاسی و جڤاکی و لەشکری و رەوشەنبیری دا شیا ببیتە شۆرەشەکا سەرتاسەریا نشتیمانی ، لەوما ب شۆرەشا مەزنا ئیلۆنێ ھاتە نیاسین ، ئەڤێ شۆرەشێ ب شیانێن تایبەت یێن مادی و لەشکری شیا چەندین دەسکەفتێن نەتەوی و نشتیمانی بدەستڤە بینیت و داستانێن بێ وێنە تۆمار بکەت . ژلایێ ھەستا نەتەوی و نشتیمانی ژی شۆرەشا ئیلۆنێ شیا دناڤ خەلکێ کوردستانێ دا بگەھینتە کۆپیتکێ . لسەر ئاستێ نیڤدەولەتی ژیشۆرەشا مەزنا ئیلۆنێ دووز و بزاڤا سیاسی کوردستانی ل دووزەکا ناڤخۆیی کرە دووزەکا نیڤ دەولەتی ، ب تایبەت پشتی حکومەتا عیراقێ نەچار کری د رێکەفتنا یازدێ ئادارا سالا ١٩٧٠ ێ دا دان ب مافێن نەتەوی و نشتیمانیێن خەلکێ کوردستانێ بکەت و ب مافێ ئۆتۆنۆمی رازی ببیت . لسەر ئاستێ ناڤخۆیی یێ جڤاکێ کوردستانێ و شۆرەشێ , شۆرەشا مەزنا ئیلۆنێ شیا ببیتە نمۆنەیێ بێ وێنە ژلایێ پێکە ژیانێ و بەشداریکرنێ ، چونکی ھەمی پێکھاتێن ئەتنی و ئایینی یێن کوردستانێ بەشداری تێدا ھەبوو و شۆرەشەکا سەرتاسەری بوو . ئەڤەژی بۆ وی دەمی ئیھامەکا مەزن بوو و ئەڤ ئیلھامەزی بۆ رێبەرێ بزاڤا رزگاریخوازیا گەلێ کورد مستەفا بارزانی نەمر دزڤریت کو نھو پشتی بۆرینا چەندین سالا و لڤی سەردەمێ دیموکراسیەتێ و جیھانگیریێ و تەکنۆلۆژیانێ ھێشتا زۆربەری وەلاتێن رۆژھەلاتا ناڤین و دەور و بەرێن کوردستانێ نەگەھشتینە ئاستێ پێکڤە ژیانا برایانە و ئاشتیا نەیا ئۆلی و ئەتنی یا سەردەمێ شۆرەشا مەزنا ئیلۆنێ . ئەڤرۆ لدەمێ خەلکێ کوردستانێ سالڤەگەرا (٥٦) سالیا ڤێ شۆرەشا مەزنا نشتیمانی دکەت ، ھەڤەدەمە دگەل بەرپابوونا شۆرەشەکا مەزنتر یا ئیلۆنێ ئەوژی راپرسیا سەرخۆبوونا کوردستانێ . ئەگەر خەلکێ کوردستاتێ لسەردەمێ شۆرەشا ئیلۆنێ ب نەچاری چەک ھەلگربیت بۆ بدەستڤەئینانا مافێن نەتەوی و نشتیمانی ، ئەڤرۆ ب دیموکراسی و ئاشتیانە ، لرۆژا ( ٢٥ ) ێ ئیلۆنێ ب کەرنەڤال دێ پشکداریێ ل راپرسیا سەرخۆبوونا کوردستانێ کەت و بێ دوودلی ب بەلێ دێ دەنگێ خۆ دەت و ئەڤێ رۆژێ کەتە رۆژەکا نشتیمانی و د ئێک رۆژ دا و ب ئێک پەیڤ شۆرەشەکا مەنتر یا ئیلۆنێ بەرپا کەت و گوھداریا درۆشمێن دیڤەلانکێن داگیرکەرا ناکەت ئەوێن ئەوێن ژبەر بەرژەوەندێن خۆ یێن حزبی و تایبەت دژبەریا راپرسیێ و ب دەستڤەئینانا خەونا دێریا خەلکێ کوردستانێ دکەن کو دەولەتەکا کوردستانێ یە . خەلکێ کوردستانێ راپرسیێ ب پرسەکا نشتیمانی دبینن و ئاریشە و ناکۆکیێن دناڤبەرا پارتیێن کوردستانێ ژی ب پرسەکا نافخۆیی و لاوەکی دبینن و ب ھیچ رەنگی یێ بەرھەڤ نیە بەرژەوەندێن نشتیمانی بکەتە قوربانی بەرژەوەندێن حزبی . ئەگەر ئەڤرۆ د عیراقەکا ھەلوەشیایی و دەسھەلاتەکا مەزھەبی دا ، یان گەھشتنا دبلۆماسیەتا کوردستانی بۆ ئاستەکێ ھەرە بلند لسەر ئاستێ جیھانێ ، یان حیبەتیبوونا جیھانێ ب سەرکەفتنێن پێشمەرگەێن کوردستانێ ب سەر مەزنترین ھێزا تیرۆرستیا داعش ، یان زڤراندنا دەڤەرێن کوردستانی یێن دەرڤەری ئیدارا ھەرێما کوردستانێ وەک کەرکووک و شنگال ... ب خوینێ بۆ سەر ھەرێما کوردستانێ ، یان و یان و یان .... دەمێ راپسی و سەرخۆبوونا کوردستانێ نەبیت ئەرێ کەنگی دەمە ..؟ ! . راپرسی بریارا خەلکێ کوردستانێ یە و سەرخۆبوون ژی ئارمانجا خەلکێ کوردستانێ یە و لرۆژا ٢٥ ئیلۆنێ ئەڤ بریار و ئارمانجە دێ بجە ھێن و دێ بۆ جیھانێ ژی خۆیا کەین کۆ گەلێ کورد ھەژی سەرخۆبوونێ یە و فاکتەرێ ئێمناھی و سەقامگیریا دەڤەرێ یە و ھەیڤا ئیلۆنێ دێ کەینە ھەیڤا شۆرەشێن مەزن و مەزنتر .