ب درێژاھیا دیروکێ دناڤ ھەمی مللەتان کەسانێن رەوشەنبیر و سازیێن رەوشەنبیری بەری خەلکەکێ دیکە ھەست ب ئازادی و رزگاریێ کریە ، زۆر جاران ژی لسەر ڤێ ھەستێ ھاتینە گرتن و ئەشکەنجەدان و سێدارەدان , چونکی کەسانێن رەوشەنبیری زێدەتر ل خەلکێ نە خویندەوار ژبەر داگیرکرنێ و بن دەستیێ ئێشانە ، لەوما ئەگەر پێشرەوێن شۆرەشێن ئازادریخواز ژی نەبووبن پشتەڤانێن رێبەرێن شۆرەشگێر بوونە . شۆرەشێن کوردی ژی د ھەمی قۆناغێن دەربازبوویی دا ژلایێ کەسانێن رەوشەنبیر بەرپا بوونە ، وەک شێخ سەعیدێ پیران ، شێخ رەزا و شێخ مەحموود و مالباتا بەردرخانیا ..... ھەتا دگەھیتە مەلا مستەفای بارزانی کو لسەر دەمێ وی شۆرەشێن کوردی بەرفرەھتر بوون و زێدەتر ل شۆرەشێن بەرێ د چارچووڤێ نشتیمانیبوونێ دا بوون وەک شۆرەشا مەزنا ئیلۆنێ و شۆرەشا گۆڵانا پێشکەفتنخواز ، کەسانێن زاناو و رەوشەنبیری ژی بەری کەسانێن دی پشکدار بوون و خەلکەک ژی ھاندا بۆ بەشداریکرن و پشتەڤانیکرنا ڤان شۆرەشان لەما بوونە شۆرەشێن نشتیمانیێن بەرفرەە و ب خەبات و پلانێن ڤان شۆرەشان دەسکەفتێن نەتەوی و نشتیمانی بدەستڤە ھاتن و گاڤێن باش ژی بۆ ئازادی و رزگاریا ئێکجاری کو سەرخۆبوونا کوردستانێ یە ھاتنە ھاڤێتن و پاشەرۆژ ل پێش وان روون و نێزیگ کر ، بۆ نفشێن داھاتی ئەڤ شۆرەشە بوونە قوتابخانە بۆ پەروەردەیا ھەستا نەتەوی و نشتیمانی . ئەڤرۆ ژی ھەرێما کوردستانێ د گاڤا دووماھیێ یا رزگاریێ یە و بریارا راپرسیا سەرخۆبوونا کوردستانێ ھاتیە دان ، دیسان پرانیا خەلکێ رەوشەنبیر و زانایێن کوردستانێ پشتەڤانن و ل ھیڤیا ڤێ رۆژێ داکۆ گەلێ کورد بریارێ لسەر سەرخۆبوونا کوردستانێ بدەت ، ئەو سەرخۆبوونا سەد سالە خەلکێ کوردستانێ خەباتێ بۆ دکەت و ب سەدان ھزارا قوربانی ژپێخەمەت داینە . لێ مخابن دڤان کاودانان دا کو دەلیڤە سەرخۆبوونێ دابین بوویە ، ھندەک کەس و سازیێن رەوشەنبیری ل پایتەختێ رەوشەنبیری لجھێ ھندێ وەک رەوشەنبیرێن سەردەمێن شۆرەشێن بەرێ روولەکێ ئەرێنی بگێرن و خەلکی لسەر بنەمایێ ھەستا نەتەوی و نشتیمانی پەروەردە بکەن و پێبگەھینن بناڤێ ئازادیا دید و بۆچوونا و دیموکراسیەتێ ھەول ددەن پرۆسا راپرسیا سەرخۆبوونا کوردستانێ سەرنەگریت و بھانەیێن بێ بنەما بۆ ڤەدبینن . جار ژبەر نەبوونا دەمێ گۆنجایی .. جار نەبوونا کۆدەنگیا سیاسی و ..... لێ دبنەرەت دا ئەڤ کەس و سازیە کەفتینە بن ئەجندایێن لایەنەکێ سیاسی و د بەرھەڤن ڤێ ھیڤی و ئارمانجا خەلکێ کوردستانێ بکەنە قوربانی ئارمانجا وی لایەنێ سیاسی ، ئەڤەژی نە رەفتارا کەسانێن رەوشەنبیرە ، بەلکی رەفتارەکا دۆژمنکارنەیە و مەرەمێن دۆژمن و داگیرگەرا پێ دھێنە بجە ئینان ، ئەگەر وان پەیوەندی دگەل ھەبیت یان نە . ھێدێ ھێدی ئەمێن بەرەڤ رۆژا راپرسیا سەرخۆبوونا کوردستانێ دچین ، ھەر کەسەکێ دژی سەرکەفتنا راپرسیا سەرخۆبوونا کوردستانێ سەرەدەریێ بکەت د چ ئاستدا بیت یان چەندین بەرھەم ھەبن ب رەوشەنبیری ناھێتە ھژماردن ، چونکی دژبەریا راپرسیێ دژبەریا ماف و ئارمانجێن خەلکێ کوردستانێ یە ب ھەمی ئۆل و مەزھەب و نەتەوە ڤە و مەزنترین خزمەتە دگەھینتە دۆژمن و داگیرکارا و پێتڤی یە ل خۆ بزڤریت و ب ھەستەکا رەوشەنبیریا نشتیمانی کار بۆ سەرکەفتنا راپرسیێ بکەت و خەلکێ کوردستانێ ھان بدەت لرۆژا ٢٥ ێ ئیلۆنا ٢٠١٧ ب دەنگێ بەلێ بێنە سەر سندوقێن راپرسیێ ، ئەگەر نە پشتی سەرکەفتنا راپرسیێ و دەولەتبوونا کوردستانێ دێ پێتڤی ب دلۆڤانیا خەلکێ وەلات پارێز و نشتیمان پەروەر بن و دبیت پاشی نەخویندەوارێن کوردستانێ یێن نشتیمان پەروەر لێ نەبوورن و کارڤەدان بەرامبەر ھەبیت .