خودایێ مەزن د ژیانا سەر دونیایێ و دووماھیێ ( ئاخیرەتێ ) دا خۆشی و نەخۆشی دانە ، باوەردارێن ھەمی ئایینێن ئاسمانی دا ، د باوەرێ دانە کۆ بەھەشت و دووزەخ ھەنە ، ژبووی گەھشتن بۆ بەھەشتێ و مانەڤا تەتا ھەتا د ناڤ وێ خوشیێ دا مرۆڤ خودێ دپەرێسن و گرێدایی یاسا و پرنسیپێن ئایینی دبن و ژ ترسا دووزەختێ خۆ ل زۆر خوشیێن دونیایێ دویر دکەن ، داکۆ ل دووماھیێ بگەھنە خوشیێن خودایی . ئەڤە نیشانێ وێ چەندێ یە مرۆڤ ل دووف خوشیان دگەرێت . د ژیانا دوونیایێ ژی خۆشی و نەخۆشی ھەنە ، ژبوی بدەستڤەئینانا ڤان خۆشیان مرۆڤ ماندی دبیت و قوربانیان ددەت ، بتایبەت بۆ دابینکرنا ژیانەکا خۆش و بەختەوەر و ببیتە خودان مال و ملک ، چونکی پاشەرۆژی مرۆڤی و مالباتێ پێ دھێـتە دابینکرن و ھەوجەوی بەردەستێ خەلکی نابیت . راستە ئەڤ چەندە ب زۆر رێکان بەرجەستە دبیت وەک کارکرن و بازرگانی و جوتیاری و ....ھتد . لێ ئەگەر مرۆڤ یێ ئازاد نەبیت و خودان ملک نەبیت ئەو بەختەوەری یا دۆمدار نابیت و دبیت د ئێک رۆژدا ھەمیان لدەست بدەت . ژبوی گەھشتن ب ئازادیێ و ملکداریا ھەتا ھەتایی پێتڤی ب ئازادی و رزگاریا وەلاتی ھەیە ، گەلێ کورد ژی ژ پێخەمەت ئازادی و رزگاریا کورد و کوردستانێ ب درێژاھیا سەرد سالان خەبات کریە و قوربانی داینە ، داکۆ ئاخا کوردستانێ یا داگیرکری بۆ خەلکێ کوردستانێ بزڤریت و بێ منەتی و بۆ ھەتا ھەتا بکاربینیت بۆ ئازادی و بەختەوەریێ وەلات ببیتە بەھەشتا سەر دۆنیایێ . ئەگەر دیرۆکا ڤان سەد سالێن گەلێ کورد بخوینین ھەمی خەلک ب ھەمی تەخ و چینڤە لدیف ڤێ ئازادیێ گەریایە و ڤیایە کوردستان ببیتە وەلاتەکێ سەربخۆ ، چونکی بسەرخۆبوونێ دێ ل دزولم و زۆرداریێ و کوشتن و رەگەزپەرستیێ و داگیرکرنێ رزگاربیت ، ژبوی ڤێ رۆژێ قوناغێن دژوار ھاتینە بڕین و قوناغێن ساناھی مانە ، ئەوژی راپرسیا سەرخۆبوونا کوردستانێ یە کۆ بریارە ل ٢٥ ێ ئیلۆنا ئەڤ سالە بھێـە ئەنجامدان ، ئەگەر بەراووردی بھێتە کرن دناڤەبەرا چاوانیا دەربازبوونا قوناغێن بەرێ دگەل ڤێ قۆناغێ ئەڤ قوناغا بەرامەبر وێ ئاڤ ڤەخوارنە چونکی ب بەشداریا راپرسیێ و ئاماژەکرنا بەلێ دێ ئەڤ قوناغە دەرباز بیت . بدەرباز بوون لڤێ قۆناغێ ، گەلێ کوردستانێ دێ ل دۆزەخا سەردونیا کو داگیریاری و بن دەستیا دۆژمنایە رزگار بیت و چیتە جیھانەکا دیکە کو جیھانا بەختەوەری و سەرفیرازی و ئاڤەدانی و دادوەریێ و وەک ھەڤیێ و تاپۆ کرنێ یە ، ئەرێ چ کورد ھەنە ئەڤە نەڤێت ..؟ ! ، مخابن ژبووی مەبەستێن حزبی و پاراستنا بەرژەوەندین کەسایەتی و بێ جورئەتیێ بەرامبەر مەرحەبایەکا ھندەک کاربدەستێن وەلاتێن داگیر کەر ھندەک ئالیێن سیاسی یێن کوردستانێ بۆ دروستکرنا ئاستەنگا ل ھەمبەر پرسا راپرسی و سەرخۆبوونا کوردستانێ بەھانەیێن بێ بنەما ڤەدبینن ، وەک نەبوونا دەمێ گونجایی و کارانەبوونا پەرلەمانی ....ھتد . پێتڤی ئەڤ ئالیێن نەرازی و دژبەرێن راپرسی و سەرخۆبوونا بزانن ، سەرخۆبوونا کوردستانێ بەھەشتا سەردونیایێ بۆ کوردستانیان و بھەر رێکەکا ھەبیت دڤێت بگەھنێ ئەگەر د دۆزەخێ ژی را بچیت و ئەڤە سەد سالە بۆ ڤێ نیعمەتێ خەباتێ دکەین و قوربانیان ددەین و د ئامادە نینە ل دووماھیا رێکێ بزڤرین پشتی ئەڤرازی ب دووماھی ھاتی ، ئەگەر وە ئەڤ بەھەشتە نەڤێت دەرگەھـ دڤەکرینە ھوین دشێن ب ساناھی لێ دەرکەڤن و جەکێ دی ھەلبژێرن ، لێ ھوین نەشێن خۆ لبەر شەپۆلێن کەلێ کورد بگرن یێن بەرەڤ ڤی ئاراستەی دچن ، پێتڤی ب تاقیکرنا نیە .