- ریفراندۆم پڕۆسەیەكی گشتگیری جەماوەرییە بۆ سەلماندنی داوا رەواكان كە گەلێك، یان نەتەوەیەك بیەوێت بگات بە ئازادییەكان و بانگەوازێكە بۆ وەرگرتنەوەی مافە زەوتكراوەكان، تا لەو رێگایەوە وێنەیەكی پڕاوپڕی خواستەكانی میللەت پیشانی بەرامبەرەكەی و جیهان بدات، واتە هەنگاونان بۆ ریفراندۆم، كارێكی رەواو یاسایی و هیوایەكی نیشمانییە كە بەرجەستە دەبێ بۆ هێنانەدی ئەو هەقە خوراوەی كە بەر لە سەد ساڵ زیاترە بەبێ عەدالەت و یەكسانی لێی سەندراوەتەوە، هەر بە هۆی ئەوەشەوە كورد مێژوویەكی خوێناوی و پڕ لە كارەساتی هەیە و لەو نەهامەتییانەدا ژیاوە، بەڵام ئەمڕۆ دەیەوێت كۆتایی بەو ستەم و بندەستی و نەهامەتییانە بێنێ كە لەژێر چەتری هێزو دەستەڵاتی حوكمڕانیی تۆتالیتاری و دیكتاتۆرییەكانی عێراقدا بە كولەمەرگی و ژیانی شۆڕشگێڕی و جەنگێكی ناهەموار كە بە ئایدیاو هزری عەرەبی سوننە بردوویەتە سەر، وا لەم سەردەمەدا لەژێر سایەی عەرەبی شیعەدا، بەدوای دانانی دەستوور و رووخاندنی رژێمی بەعسی فاشی و هەوڵدان بۆ دروستكردنی (عێراقی هیواو ئاوات) چوونەوە بۆ (بەغدا) هەر لە سەرەتای ساڵی (2004) بۆ جارێكی كە رۆحی نەتەوەیی تیا شكاوەو بەو ئومێدەی (عێراقی ئەمڕۆ عێراقی دوای دەسەڵاتی شۆڤێنی و رەگەزپەرست و خاوەنی دەسەڵاتی رەها نەبێت و رێز لەمافەكانی مرۆڤ و گەل و كەمایەتی و هەموو هاووڵاتیان بگیرێت و بە یەكسانی و برایەتی و پێكەوەژیان بەڕێی بكەن، لەو نیازەدا هیچیان دەست نەكەوت و بەمەرام نەگەیشت، بەڵام لە راستیدا بە ئەستۆكەوت و سەرسمێكی سەختماندا بەرەو رووی واقعێكی تاڵ كراینەوە. ئێمە وامان لێكدایەوە كە هەموو لەژێر زەبری بەعسدا فێری هۆشمەندی و هەقبێژی و دیموكراتییەت بووین و عێراقیش دەبێتە بەهەشتێك بۆ هەمووان، وەلێ بەداخەوە وا دەرنەچوو، دەستەڵاتی نوێی عێراق بە هزری شیعەگەرایی و عەرەبایەتی كەوتنە پیلانگێڕان و خۆدزینەوە لە خاڵەكانی نێو دەستوور و دروستكردنی هێزی سەیر سەیر وەك هێزی دیجلەو داواكردنی F16 و تەشقەڵەو ئاژاوەنانەوە لەناوچە گەرمەكانی دەرەوەی حوكمەتی هەرێم و خۆدزینەوە لە ماددەی (140) و دەستكردن بە تاڵانی و سەرانەو كوشتن و رفاندن و هێنانی سوپای (حەشدی شەعبی) و جێبەجێ نەكردنی مافە شەرعییەكانی كورد. گەرچی زۆرجار گوێمان لەبەرپرسانی (عێراق) دەبێت كە دەڵێن ریفراندۆم دژی دەستوورەو نایاساییە!! بۆ ئەوان یاساو رێساكانی دەستوور یان بەجێهێناوە و هیچیان لێ جێبەجێ كردووە؟ تەنیا لە كوێدا دەسەڵات و توانایان بووبێ كەوتوونەتە پلاندانان و شەڕانگێزی، ئەگەر شەڕی داعشی خوێنڕێژ نەبوایە دەمێ بوو بەهیوای گەڕانەوە بۆ خاڵی سەرەتا گەلەگورگ ئاسا پەلاماریان دەداین. لەگەڵ ئەوەشدا وردە وردە كەوتنە بڕینی بودجەو دەركردن و خانەنشینی بەرپرسە كوردەكان لەبەغداو بەفیتی دەرەكی چەندەها ئاژاوەو پەیام و بەرنامەیان خستەگەڕ تا هەرچی لە خەیاڵیاندا هەیە بۆیان بچێتە سەر و تەواو هەناسە لە كورد ببڕن و بە كڕینی چەند بەرپرس و كەسانی سووك و ریسوا كە بەناو كوردن و بە ئەندێشە عەرەبن، مەرامە گڵاوەكانیان بێننەدی، لێرەدا بۆمان روون دەبێتەوە ئەمانە عەقڵی حوكمڕانی و پێكەوەژیان و دادی كۆمەڵایەتییان لا مەبەست نییە. هەرگیز، ئەوانە بە مافە رەواكانی ئێمە نابینن، بەڵكو هەردەم بەخەیاڵی عێراقی یەك پارچەو (شمالی حبیب) و نكۆڵیكردن لە بوونی كورد لەسەر خاكی كوردستان كە بە بەشێك لە خاكی عەرەبی دەزانن، لایان ئێمە میوانین، یان كۆچەرین، ئەمەش داڵخەیەكی توندڕەوی و شۆڤێنی نییە، ئەوان (سەید) و ئێمەش بندەست و كۆیلە بین! ئیتر چ فەرهەنگی فیدڕاڵی و سەربەخۆیی و ئازادییان بەلاوە پەشمە. چوونەوەیان هەقیقەتی گەڕانەوە بۆ سەرچاوەی عێراقی عەرەبی (جا شیعەبێ، یان سوننە)، بۆیە دەبێت كورد ئەو ئەجێندایە بخوێنێتەوەو خۆی لێ گێل نەكات، چونكە هەمان تاس و گەرماوە، بۆیە دەبێت هەر كوردێكی دڵسۆزو بەوەفا رێز لە خاك و خوێنی شەهیدان بگرێت، ئەوەشی ئەو هەموو خەبات و بەرخۆدان و قوربانییانە فەرامۆش بكات، هەرگیز بە تاكێكی دڵسۆزی كوردایەتی ئەژمار ناكرێت و لە كوردییەت بێبەری دەبێت. چیتر كورد چاوەڕوانی چی لەم (عەمامە) بەسەرانە دەكات و دڵی بە چییان خۆش بێ؟ دیارە زۆر بە روونی هیچ شتێك نەماوە لەسەر ئەرزی واقیع پێكەوە بمان بەستێتەوە، هەتا ئەوانە خاوەنی خیتابی رەگەزپەرستی و خۆ بەزلزانین و فەرامۆشی بن و بەنیاز بن بە زۆرداری بمانلكێننەوە بە دەسەڵاتی مەركەزی (بەغدا)ـی بێ ماف و دادپەروەرییەوە، لەمەدا چی بۆ كورد دەهێڵێتەوە غەیری گەڕانەوە بۆ ملكەچی؟! بۆیە ئەوەی فەرزە لەسەرمان ئەوەیە كە هەموو بەیەك دەنگ و بە یەك هەڵوێست بە گیانی كوردایەتی و شكۆمەندی ئاڵای كوردستانەوە بۆ رزگاربوون و سەربەخۆیی خاكی كورد، ریفراندۆم بكەینە چرای رۆشنكەرەوەی ئەو رێگایە تا ئاواتەكانمان بە زوویی بێتەدی، دیارە حەتمەن ئەوەش بەبێ ئاستەنگ و تەگەرە دانان، داونانەوەو بڵاوكردنەوەی پڕوپاگەندەو كەمكردنی پڕۆسەكەو ترس چاندن لە نێو هاووڵاتیانداو چاندنی بێ باوەڕی و هێنانەوەی بەهانەی ئەملاولاو نەبوونی و كەمی مووچەو هەندێ دیاردەی گەندەڵی و خەمساردیی قەڵەم و دەنگی نەگریس و بەكرێگیراوی دەرەكی، كە تەواو قۆڵیان لێ هەڵمالیوە، بەقسەی پڕوپووچ و بێ گوێدانە گەورەیی پڕۆسەكە كە هەموو جیهان چاوەڕوانی گەورەترین گۆڕانكاری لە ناوچەكەدا تەبەنی دەكەن و ئاسۆی میللەتێكی ستەمدیدە بین بەر لە سەد ساڵە هەوڵیان بۆ سەربەخۆیی و ئازادی داوە، پەیمانیان بە خوێنی شەهیدان داوە، چیتر نووسین وتاری نەزۆك و بێ بنەما جێگای نابێتەوە گەرچی زۆر هەن (بەغدا) بە رووگەی خۆیان دەزانن، بەڵام بینیمان بەغداو دەستەڵاتدارانی تۆزی خێری لێ هەڵنەوەرێ، دەبا بەوپەڕی هیواو ئاواتەوە بەرەو ریفراندۆم بڕۆین و رۆژی (25/9/2017) بكەینە چەپكێ گوڵی بۆنداری یەكێتیی كورد بۆ كوردستانێكی ئازادو سەربەخۆ و بانگەوازێكی هۆشیاری پچڕاندنی كۆت و زنجیری پێكەوە لكانی ناشەرعی بكەین و كۆتایی بەو غەدرە بێنین و ئەو تەلیسمە بشكێنین كە قەدو قەد (كورد نابێ بەهیچ) و لە گۆڕی بنێین. دەبێت هەوڵبدەین ئەو ترس و تۆقاندنە لە وڵاتانی دراوسێ بڕەوێنینەوە و ئەو ساتانە لە ناخەوە بنێژین، پەلامارمان دەدەن.. ئای لەبرسا دەمرین، تیا دەچین.. ئەم وتانە هیچی لە بەرژەوەندی گەلی كوردا نییە، بەڵكو لە خزمەتی نەیاراندایە و سوودی بۆ خۆمان نییە.
دەبێ هەمووان بزانین كە رەوشی ئەمڕۆی كوردو ناوچەكەو گۆڕانكارییەكان گەورەترین فرسەتی بە كورد داوە، بۆ ئەوەی بە رەوایەتی داوای مافی خۆی بكات و بە پێەوانە ئیتر جێی شك و گومانە كە دۆش دابمێنێ و هەڵوێستێكی پڕگیری نەبێت.. بۆیە كورد یان دەبێ كۆیلایەتی قبووڵ بكات و بەپەلە رابكاتەوە بۆ بەغدا، یان دەبێ دوابڕیاری جەسوورانەو قارەمانانە بدات، بە هیچ جۆرێ سڵ لە ساتە ناوەخت و گرێكوێرەكان نەكاتەوە، گوێ بە سنوور و جوگرافیا و دەنگە نامۆكان نەدا، رێگای شكست و سڵەمینەوە نەگرێتە بەر چۆكدادان لە هزریدا بسڕێتەوە و سەركەوتن بخاتە پێش هەموو پێشهاتەكان، چونكە ئێمە میللەتێكی خاوەن قوربانیین، بۆ سەربەخۆییش هەر قوربانی و لەخۆبردوویی دەوێت. هەنگاوی بەرگری و كوردایەتی و دەنگی ئازادی پێویست بە پاشەكشە ناكات، مەترسن و دوودڵ و راڕا مەبن و گوێ بۆ یەك قسەی ناحەزان رامەگرن، ئەو قەڵەمانە بشكێنن كە دژی سەربەخۆیی و ئازادی دەنووسن. ئەودەنگانە خامۆش بكەن كە بە فیتی داگیركەران و نەیاران زوڕنای ناحەزان لێ دەدەن. كوردستان لە رۆژی (25/9/2017) بە هەموو جیهان دەڵێت: بەڵێ.. بەڵێ بۆ سەربەخۆیی و ئازادی لە ژێر ئاڵای كوردستاندا. هەربژین بۆ كورد.