پشتی سەرکردایەتیا سیاسی یا کوردستانێ بریار لسەر دیارکرنا رۆژا راپرسیێ لسەر ئاییندێ کوردستانێ دای و گاڤێن پراکتیکی بۆ ھاتینە دان ، دیارە ئەڤ بریارە ب کۆرەیی نەھاتیە دان و پێشوەخت ژلایێ سیاسی و دبلۆماسی و ئابووری رێک بۆ ھاتیە خۆشکرن ، چونکی سەرۆک بارزانی و سەرکردایەتیا کوردستانی گەھشتیە وێ باوەریێ مانەڤا کوردستانێ وەک ھەرێم دگەل عیراقێ بوویە مەحال و دەولەتا عیراقێ ھەمی رێک لھەمبە گرتینە بۆ پێکڤە ژیانا کورد و عەرەبان د عیراقەکا دیموکراسی و وەک ھەڤی دا ، دژایەتیا حکومەتا عیراقێ بەرامبەر ھەرێمێ گەھشتە ئاستێ لادان ل دەستوورێ ھەردەمیێ عیراقێ وەک مەرامۆش کرنا مادێ ١٤٠ ێ دەستووری و بڕینا بۆدجە و مۆچێ کوردستانێ و مەستەحەقاتێن چەندین سالان یێن پێشمەرگەھێن کوردستانێ ، سەرەرای کو پێشمەرگەھێن کوردستانێ ئێکەمین ھێز بوویە شیایە ئەفسانەیا داعشێ بشکێنیت و سەرکەفتنێن ھەرە مەزن تۆمار کرینە و بۆ رزگارکرنا پارێزگەھا نەینەوا ژی چەپەرێن تیرۆرستێن داعش بۆ لەشکرێ عیراقێ شکاندن . دڤان کاودانان دا پشتی ڤێ بریارا دیرۆکی لسەر راپرسیا سەرخۆبوونا کوردستانێ پێـڤی بوو ھەمی ئالی و کەسایەتیێن سیاسی ل کوردستانێ ب ئێک دەنگی و ئێک رێزی پالپشتیا ڤێ بریارا چارەنڤیس ساز بکەن بێ دوو دلی ، چونکی پرسەکا نشتیمانی یە و ھیڤی یا دێرینا خەلکێ کوردستانێ یە و ئاریشە و ناکۆکیێن حزبی بدەنە لایەکی و چونکی بریارەکا ئێکجارەکی یا خەلکێ کوردستانێ یە و جھێ موناقشێ نیە ، پێتڤی یە ھەمی ئالی و کەسایەتیێن سیاسی و رەوشەنبیری و سازیێن راگەھاندنێ و ھەمی تەخ و چینێن جڤاکی و رێکخراوێن جەماوەری و پیشەیی و جڤاکێ سڤیل کار لسەر دارشتنا بەرنامە و پرۆژێن پشتی راپرسیێ بکەن بۆ ئاڤاکرنا دەولەتەکا کوردستانی لسەر بنەمایێن سەردەمیانە و شارستانی و مفای ل ئەزمۆنێن وان وەلاتان وەربگرن یێن پشتی سەرخۆبوونێ بدەمەکێ کێم و پشتی وێرانکرنێ شیای وەلاتێ خۆ ئاڤا بکەن و ژێرخانەکا بهیزا ئابووری و پیشەسازی و جڤاکی بنیات بنێن وەک چاپان و کۆریا باشوور و ئەندەنۆسیا و ئیمارات و .....هتد و کار لسەر دووبارە نە کرنەڤا وان خەلتیین حکومەتا هەرێما کوردستانێ بکەن ژلایێ کارگێری و دارایی و سەروەریا یاسایێ و دادوەریا جڤاکی . نەک هەر زوی سازیێن راگەندنێن هندەک پارتیا بکەڤنە کاری بۆ کێمکرنا رۆل و بها و گرنگیا راپرسیی و بۆ وەرگرتنا داخۆیانیا نڤیسەرەکی یان رۆژنامەڤاکێ دیرۆک و خەبات و قوربانیێن خەلکێ کوردستانێ نەزانیت یان بەرژەوەند دگەل عیراقێ هەبن ل دۆرترین جهـ وەربگرن داکۆ ترس و دوودلی لای خەلکێ کوردستانێ درۆست ببیت و بەشداری راپرسیێ نەکەن و ئەگەر بەشدار ببن ژی ب دەنگێ نەخێر بیت . ئەڤ جورە سازیین راگەهاندنێ و لایەنێن ل پشت وان دڤێت گەلێ کورد و خەلکێ کوردستانێ ب مافێن خۆ یێ نەتەوی و نشتیمانی شاد ببیت کو خودایێ مەزن ب هەر نەتەوەیەکی بەخشی و خەلکێ کوردستانێ ژی چەندین سالە خەباتێ بۆ دکەت و ب سەدان هزارا قوربانی ژپێخەمەت داینە .دبێژینە هەمی ئالی و کەسایەتی و سازیێن راگەهاندنێ یێن بڤی رەنگی هزر و سەرەدەریێ دکەن و دڤێت پرسا راپرسیێ و سەرخۆبوونا کوردستانێ بۆ خەلکی بکەنە مەترسی ، دەست لڤان رەفتارێن بێ بەهەم و بنەما بەردەن و بریارا راپرسی و سەرخۆبوونا کوردستانێ ب خوینا شەهیدا هاتیە واژووکرن و ب پروپاکندێن وە یێن بێ بنەماو و دوور ژ هەستا نەتەوی و نشتیمانی ناهێتە ژێبرن و لڤێ بریارێ پاشگەز نابینەڤە . چونکی مە بوەرە سەرۆکێ هەرێمێ و سەرکردایەتیا سیاسی یا کوردستانێ ئاستەنگ ل هەمبەر سەرخۆبوونا کوردستانێ نەهێلاینە . ئەگە وە گەل و وەلاتێ خۆ بڤێت نهو دەمێ دارشتنا بەنامە و پلانێن شێوازێ دەمەزراندن و رێڤەربرنا دەولەتا کوردستانێ و ئاڤەدانی و بسازیکرنێ یە نەک دژایەتیێ .