راستە پەلەمان سازیەکا نشتیمانی یە و نوونەرایەتیا خەلکی دکەت و پێتڤی یە ب پیرۆزی بھێتە راگرتن ، بێ رێزیکرن بەرامبەر پەرلەمانی بێ رێزیکرنە بەرامبەر وی خەلکێ دەنگ پێ دای . پەرلەمانێ کوردستانێ ژی ژبلی ئەرکێ خۆ یێ یاسا دانانێ و چاڤدێریێ نوونەرایەتیا خەلکێ کوردستانێ دکەت . پشتی ( یوسف محمد ) سەرۆک پەرلەمانێ گوڕان ل رێکەفتنێن سیاسی دگەل پارتی دەرچووی و پەرلەمان بۆ مەبەستێن بزاڤا گوڕان بکار ئینای و ھەولێن وان کۆدەتایا سپی دژی پارتی سەرنەگرتی ، پارتی دیموکراتی کوردستان ب نەچاری و بۆ مەزنتر نەکرنا ئاریشێ بژاردا رێگریکرن ل سەرۆک پەرلەمانی ھەلبژارت ، پشتی ڤێ چەندێ بزاڤا گوڕان و کۆمەلا ئیسلامی دەنگێ دول و زرنایێن خۆ لسەر بلندگۆیا دانان و پارتی تاوانبار دکەن لسەر رێگریکرنێ لسەر سەرۆکێ پەرلەمانی ، لێ ژبیرا خۆ نائینن مەزنتر بێ رێزی بەرامبەر خەلکێ کوردستانێ و پەرلەمانێ کوردستانێ ھاتەکرن دەمێ د ئێکەمین کۆمبوونا ڤێ گەرا پەرلەمانێ کوردستانێ دا عەلی باپیرێ ئەمیرێ کۆمەلا ئیسلامی بێ شەرمانە و ب شانازی ڤە ژبەر سرۆدا نشتیمانیا ئەی رەقیب رانەبوویەڤە ، ھەر وەسا ئەندامێن بزڤا گوڕان ژی پشتی عەلی باپیری بێ رێزی بەرامبەر پەرلەمانێ کوردستانێ کرن و بێ ھەیبەت کر . دەمێ ب نھێنی لەفێن فیتفیتۆکا ( سافیرا) بریە دناڤ ھۆڵا پەرلەمانی و مینا زارووکان کەفتینە فیتک لێدانێ . دیسان دەمێ پەلەمانتارێن گوڕان دەمێ دناڤ ھۆلا پەرلەمانی کەفتینە چەپلە لێدانێ و قێژ قێژەکا ژنانە ، چ ھەیبەت بۆ پەرلەمانی نەھێلا . ئەڤ رەفتار و سەرەدەریێن بزاڤا گوڕان و کۆمەلا ئیسلامی یێن دارشتی و ب پلان مەزنترین بێ رێزی یە بەرامبەر پەرلەمانێ کوردستانێ و خەلکێ کوردستانێ چونکی سرۆدا نشتیمانیا ( ئەی رەقیب ) جھێ رێزا ھەمی خەلکێ کوردستانێ یە و ب شانازی ڤە ژبەر رادبنەڤە و ھەمی ھیڤیێن خەلکی ئەوە د مەحافلێن نیڤ دەولەتا دا گوە ل ئاوازێن ڤێ سرۆدێ ببیت ، دیسان د رێو رەسمێن فەرمی دا خەلک و نوونەرێن وەلاتان چ ئیسلامی یان بیانی وەک رێزگرتن بۆ خەلکێ کوردستانێ ژبەر سرۆدا ئەی رەقیب رادبنەڤە , خێرە عەلی باپیر رێزگرتن لڤێ سرۆدا نشتیمانیا خەلکێ کوردستانێ ب تاوان ھژمار دکەت ..! ئەگەر یێ ڤالا نەبیت ل ھەستا نشتیمانی . ھەر وەسا وان رفتارێن پەرلەمانتارێن زاڤا گوڕان یێن ( لەفێن فیتفیتۆک و چەپلە لێدان ) دناڤ ھۆلا پەرلەمانی چ رامان ددەت ئەرێ بێ رێزی نیە ... ! ئەگەر رێگریکرن ل سەرۆکێ وی دەمی یێ پەرلەمانێ کوردستانێ بێ رێزی بیت ، بێ رێزی یە بەرامبەر کەسەکی چونکی مەزنترین فراکسیۆنا پەرلەمانی ب سەرۆک پەرلەمان نەدانایە و ل دەرڤەی ھۆلا پەرلەمانی رێگری لێ ھاتیە کرن ، بەڵام رەفتارێن وە یێن مە دیارکری دناڤ ھۆڵا پەرلەمانی بوونە و پەرلەمان وەکی یانەیەکا شەڤانە کریە جھێ قەرقەشێ و قیژە قیژێ کۆ ئەڤە مەزنترین بێ رێزی یە بەرامبەر خەلک و پەرلەمانێ کوردستانێ . لسەر ڤێ چەندێ ژی ئەڤ ھەردوو حزبە رازی نەبوون و بەردەوامی دا بێ رێزیکرنێ بەرامبەر خەلکێ کوردستانێ ب ھەمی تەخ و چین و ئۆل و مەزھەبڤە دەمێ نھو دژی راپرسی و سەرخۆبوونا کوردستانێ رادوەستن کو ئارمانجا ھەرە دێرینا خەلکێ کوردستانێ یە و بۆ ڤێ مە ئارمانجێ ب سەدان ھزار شەھید دانە و تووشی ئەنفال و کیمیا باران و وێرانکرنآ بوونە . لەوما دبێژین ژمێژەیە وە پەرلەمانێ کوردستانێ بێ رێز کری ، نەک رێگریکرن ل یوسف محەمەدی . ئەگەر وە شکۆیا پەلەمانی و خەلکێ کوردستانێ بڤێت بێ دوو دلی و ب ھەستەکا نشتیمانی ب دەنگێن بەلێ دێ پشکداریێ ل راپرسیا سەرخۆبوونا کوردستانێ نەک دژی ڤێ پرسێ راوستن .