دووبەرەکیێ و سێ بەرەکیێ و ... چەند بەرەکیێ ھەر ل سەردەمێ میرگەھێن کوردی ھەتا سەرھەلدانا بزاڤا رزگاریخوازیا نەتەوی یا کوردی ب ئەڤرۆ ژی ڤە بەرفرەھترین پانتایی د دیرۆکا دا ڤەگرتیە و داگیر کریە ، ڤێ چەند بەرەکیێ ئەگەر زێدەتر ل دەژمنان رزار و زیان نەگەھاندبنە بزاڤا نەتەوی و جڤاکی ل کوردستانێ کێمتر نەبوویە . ئەگەر لسەر دەمێ میرگەھان لاوازیا ئاستێ رەوشەنبیری و ھەستا نەتەوی یا خەلکی و نەبوونا سەرکردێن کاریزما بکەینە بەھانە بۆ لناڤ چوونا دەسھەلاتداریێن کوردی و زڤراندنەڤا دەسھەلاتداریێن داگیرکەران ئەڤرۆ گەلێ کورد و بزاڤا رزگاریخوازیا کوردستانی ل باشوورێ کوردستانێ ئەڤ قوناغە دەرباز کرینە ، نەتنێ ئەڤ قوناغە دەرباز کرینە ، بەلکی سازی و بنەمایێن دەولەتبوونێ ب مۆکۆمی دانانە و ژلایێ رەوشەنبیری ژی چەند سەد جاران ئاستێ خەلکی ل سەردەمێ میرگەھان زێدەترە و خودان چەندین زانینگەە و سەنتەر و بنگەە و رێکخراوێن رەوشەنبیری نە و خودان پایتەختێ رەوشەنبیری نە ژی . ژلایێ سەرکردێ کاریزما ، ئەڤرۆ کەسایەتیا مەسعود بارزانی سەرۆکێ ھەرێما کوردستانێ لسەر ئاستێ جیھانێ خودان پێگەھەکا ھەری مەزن و کاریگەرە د نەخشتێ سیاسی و لەشکری و دبلۆماسی نە تنێ یێ کوردستانێ بەلکی لسەر ئاستێ عیراقێ و زۆربەری وەلاتێن جیھانێ وەک سەرۆک دەولەت سەرەدەریێ دگەل دکەن و پێشوازیێ لێ دکەن ، ژلایێ لەشکری ژی ب سەرکەفتن و خۆراگریا پێشمەرگەھێن کوردستانێ دژی ھۆڤانەترین و بھێزترین رێکخستنا تیرۆرستیا داعش جیھان مەندەھۆش کریە ، دوارێن دیتر ژی دا وەک ئابووری و پرنسیپێن دیموکراسی و ڤەحەواندنا نێزیکی دوو ملیون ئاوارە و پەنابەران جوانترین و مرۆڤ دووستانەترین سەرەدەریا خەلکێ کوردستانێ و سەرکردایەتی و حکومەتا ھەرێما کوردستانێ نیشا جیھانێ دا ، ئەڤ فاکتەرە و چەندین فاکتەرێن دیتر بووینە ئەگەرێن دابینکرنا پشتەڤانیا نیڤ دەولەتی بۆ ھەرێما کوردستانێ بۆ گەھشتن ب مافێن خۆ یێن ڕەوا و سەرخۆبوونا کوردستانێ . لەوما سەرۆک بارزانی ب پشتەڤانیا خەلکێ کوردستانێ و پڕانیا پارتیێن کوردستانی بریار لسەر دیارکرنا ئەنجامدانا رۆژا راپرسیێ لسەر سەرخۆبوونا کوردستانێ دا کو ٢٥ێ ئیلۆنا ئەڤ سالەیە ، پشتەڤان و ھاریکارێن سەرکەفتنا ڤێ پرۆسا دیرووکی کو پاشەرۆژا ھیڤیا نەتەوا کورد و خەلکێ کوردستانێ دیار دکەت ب بەرەیێ راست دھێتە ھژماردن چونکی دیار دبیت ئەڤ بەرەیە داکۆکیکارێن دابینکرن و پارێزەرێن ماف و ئارمانجێن خەلکێ کوردستانێ نە ، ئەو مافێ ب درێژاھیا دیرووکێ لێ ھاتە زەفتکرن و خەلکێ کوردستانێ لسەر زڤراندنا ڤی مافەی ب سەدان ھزارا شەھید داینە و تووشی ئەنفال و کیمیارانکرنێ و جینۆسایدێ و زۆر دەردەسەریێن دیتر بووینە . بەرەیێ دیتر کو بزاڤا گوڕان و کۆمەلا ئیسلامی نە ب بەھانەیێن بێ بنەما دژی بدەستڤەئینانا ماف و ئارمانجێن گەلێ کورد راوەستانە ب رەیێ دژە راست دھێتە ھژمارکرن ، چونکی ئەڤ بەرەیە دژی راستیێ راوەستانە و کەفتینە بن ئەجندایێن وەلاتێن دژبەرێن مافێن گەلێ کورد مینا عیراقێ و ئیرانێ . ئەڤەژی جھێ پسیارێ و حیبەتیێ یە ..؟! ، حزبێن کوردستانی دژی مافێن گەلێ خۆ راوەستن و بچنە دناڤ بەرەیێن دژبەر ئەگەر بۆ بەرژەوەندێن بەرتەسکێن حزبی و کەسیی نەبن و پەروەردەیێن بەردەستێن دارێژەر و ئەندازیارێن دوو بەرەکی و کەرب و کینا دیرووکیا دناڤبەرا سەرکردایەیتا بزاڤا رزگاریخوازیا گەلێ کورد نەبن و کو جڤاکێ کوردستانێ ل سەردەمەکی پارچە پارچە کری . ئەگەر بەرەیێ دژە راست بخۆدا نەچیتەڤە و بۆ بەرەیێ راست نەزڤریتەڤە کو بەرەیێ مللەتی یە ، دێ روو رەش و شەرمزارێن دیرووکێ بن ، چونکی ئاستێ ھشیاریا خەلکی ل پیلانێن وان مەزنترن و ل رۆژا ٢٥/٩/٢٠١٧ خەلکێ کوردستانێ ب دەنگێن بەلێ بۆ سەرخۆبوونا کوردستانێ دێ دیرووکا وان ھاڤێتە دزبلخانێ دا و نفشێن داھاتی ژی دێ نفرینا لێ کەن .