ب درێژاھیا دیروکێ مرۆڤ ل دیڤ ئازادی و بەختەوەریێ گەریایە و ژ پێخەمەت وان خەبات کری و قوربانی داینە . کەس و مللەتێن بن دەست لسەر دەمێن گۆوێلەتداریێ ھەمی ھەول داینە ل کۆوێلەتداریێ رزگار ببیت ، جوتیار و کاسب کار ژی ژبووی بەختەوەریا خۆ و زارووێن خۆ ب شەڤ و رۆژ ، لبەر گەرمێ و سەرمایێ بەردەوام کار کریە . مللەتان ژی خەبات کریە و قوربانی داینە داکو ل داگیرکاریێ رزگار ببیت . گەلێ کورد ژپێخەمەت ئازادی و بەختەوەریێ خەباتەکا دوور و درێ ژکریە و مەزنترین قوربانی داینە داکو بگەھیتە ئازادیێ و ئەو و نفشێن داھاتی ب بەختەوەری بژین . دبن چارچۆڤێ پرنسیپێن ئەڤرۆ یێن جیھانی و دیموکراسیێ دا بریارا دووماھیێ یان یا ئازادیا مللەتان د دەستێ مللەتان بخۆ دایە د رێکا راپرسیێ را ، داکۆ سەرکردایەتیا سیاسی بێژیتە جیھانێ و سازیێن نیڤ دەولەتی ئەڤەر بریارا مللەتی یە و ئەم نەچارین ملکەچی ڤێ بریارێ ببین و ئەڤ بریارا مللەتی ژی کارتەکا بھێزە بۆ دەسھەلاتا سیاسی و ژلایێ سازیێن نیڤ دەولەتی و وەلاتێن جیاھانێ بتایبەت یێن دیموکراتخواز جھێ رێزگرتنێ یە . د سەد سالێن بووری دا مللەتێ کورد ژ ئەنجامێ خەباتا ژپێخەمەت ئازادیێ تووشی کوشتن و ئەنفال و کیمیاباران و وێرانکرنێ بوویە لسەر دەستێ رژێمێن عیراقێ , لێ سەرەرای ڤێ چەندێ گەلێ کورد ژبەر باوەریا وی یا موکوم ب دۆزا خو شیا بسەرکەڤیت و وان قوناغا دەرباز بکەت و گەھشتە قوناغا راپرسی و سەرخۆبوونێ . ئەڤرۆ دەمێ ب رێکێن ئاشتیانە و ب پرۆژەیەکێ نەتەوی و نشتیمانی سەرۆک بارزانی و پرانیا پارتیێن کوردستانی ھەولا دەربازبوونێ لڤێ قوناغێ ددەت ، بەرۆڤانی قوناغێن بەرێ دۆژمن و نەیارێن ئازادیا گەلان بتایبەت گەلێ کورد ھەولا درۆست کرنا ئاستەنگا ددەت درێکا ھندەک پارت و رێکخستن و کەسایەتیێن کوردستانێ کو کەفتینە دخزمەتا بجە ئینانا ئەجندایێن ھندەک وەلاتێن ھەرێمی و عیراقەکا فاشل ژلایێ سیاسی و ئیداری و ئابووری و لەشکری و جڤاکی ...! . لێ دڤان سالێن خۆ برێڤەبرنا ھەرێما کوردستانێ بتایبەت پشتی سالا (٢٠٠٣) و ب تایبەت تر پشتی سەرکەفتنێن بێ وێنە یێن پێشمەرگەھێن کوردستانێ بسەر گرۆپێ تیرۆرستیا داعش یا نیڤ دەولەتی بۆ جیھانێ خۆیا بوو کو گەلێ کورد گەھشتیە قۆناغا سەرخۆبوونێ و دیرۆکێ زۆرداری لێ کریە . راپرسی و سەرخۆبوون ژی ئازادی و بەختەوەریا خەلکێ کوردستانێ دێ دابین کەت ، ئەو خەلکێ کوردستانێ یێ کو ھەمی ژیانا خۆ ب ژێر دەستی و نەھامەتیان را دەرباز کری و ھەتا نھو خەون پێڤە ددیتن ، لەوما ئەز باوەرم دڤێ پرۆسێ دا خەلکێ کوردستانێ جارەکا دی ناکەڤیتە بن کاریگەریا وان حزب و لایەنێن نافخۆیی و دەرڤە یێن ب رژدی کار لسەر سەرنەکەفتنا وێ دکەن . چونکی مللەت دزانیت دەم ھاتیە و سەرۆک بارزانی رێکا سەرکەفتنا وێ ڤەوژارتی یە و ب سەرگرتنا وێ ئانکۆ ب دەولەتبوونا کوردستانێ شوونوارێن وان ھەمی نەھامەتیێن قوناغێن بەرێ ب ئێکجاری دێ ھێتە ژێ برن و قۆناغا ئاڤەدانی و خۆش گۆزەرانی و پێشڤەچوونێن ئابووری دێ دابین بن و ناسناما مە یا نەتەوی دێ ھێتە پاراستن و گیانێ سەدان ھزار شەھید و ئەنفالکریا دێ پێ شاد بیت . لەوما دبێژینە دژبەرێن راپرسی و سەرخۆبوونا کوردستانێ یێن نافخۆ یێن کوردستانێ و عیراقێ و ھەرێمی ئەگەر ھەبن ، چەوا گەلێ کورد ب خەبات و قوربانیدانێ ، راپرسی و سەرخۆبوون درست کر ، وەسا ب راپرسی وسەرخۆبوونێ دێ ئازادی و بەخەوەریێ بۆ نفشێ نھو و یێ داھاتیێ خەلکێ کوردستانێ دابین کەت و پیلانێن دژبەرا دێ ھێنە بن گۆر کرن .