پشتی سەد سالێن دابەشبوونا کوردستانێ ل سەر هەر چار وەلاتێن دەڤەرێ ( تورکا ـ عیراق ـ ئیران و سوریا) ، هەرێما کوردستانێ پشتی بیست و شەش سالێن ئازادیەکا نیمچەیی و هەمی شێوازێن پێکڤە ژیانێ دگەل عیراقێ سەرنەگرتی ، هەرێما کوردستانێ بریارا ریفراندۆمێ لسەر دیارکرنا ئاییندێ خۆ دایە و ئەڤ پرسە ئانکۆ پرسا
سەرخۆبوونا کوردستانێ بویە مژارەکا گەرم لسەر ئاستێ جیهانی و هەرێمایەتی و دید و بۆچوونێن جودا لسەر ڤێ پرسێ هەنە . ب تایبەت دەربارەی وەلاتێن جیرانێن هەرێمێ نەخاسمە تورکیا . ئەگەر سەربووڕا هەرێما کوردستانێ یا ڤان سالان ژلایێ سیاسی و ئیداری و ئابووری بخوینین دیار دبیت ل سەر دەستی سەرۆک بارزانی سیاسەتەکا میانڕەو د چارچۆڤێ دیموکرسیەتێ و پێکڤە ژیانێ و رێزگرتن ل بەرامبەر هاتیە پەیڕەو کرن و ئەڤ سیاسەتە بوویە ئەگەرێ گۆڕینا سیاسەتا تورکیا بەرامبەر کوردان ل دژبەریێ بۆ دوستەکێ نێزیک ، پەیوەندیێن ڤان سالان یێن دناڤبەرا هەرێما کوردستانێ و تورکیا خزمەتەکا زۆرا هەردوو ئالیان کریە ژلایێ سیاسی و ئابووری و ئێمناهیێ . ئەگەر هەرێما کوردستانێ ببیتە دەولەت ب دەنگەکێ باشتر ل سەر وێ سیاسەتێ دێ سەرەدەریێ دگەل وەلاتێن جیهانێ کەت ب تایبەت تورکیا . چونکی هەرێما کوردستانێ ژلایی سامانێن سرۆشتی ب تایبەت نەفت و گازێ یا زەنگینە و چاڤێ جیهانێ لسەرە بۆ تورکیا دێ بیتە فاکتەرێ دابینکرنا پێتڤیێن وان ب مەزاختیەکێ کێم کو تورکیا زۆر پێتڤی پێ هەیە . ژلایی بازرگانی و بەرهەم ئینانێ ژی دەولەتەکا کوردستانی دێ بیتە ئەگەرێ ڤەژاندنا ئابوورێ تورکیا ، چونکی ئەڤ دەولەتا کوردیا نوی هەتا خۆ لسەر پێت خۆ بگریت ژلایێ ئابووری و پیشەسازی وئاڤەدانی و سێکتەرێن دی یێن خزمەت گوزاری پێتڤی ب هاوردەکرنەکا زۆر هەیە ، بۆ ڤێ چەندێ ژی دیسان بۆ هەردوو ئیالیان ب کێمترین بها و زوترین دەم ئالوگۆڕی دێ هێتە کرن و دەرفەتەکا مەن بۆ تورکیا دێ هێتە پێش کۆ کۆمپانیێن وان بەشداریێ ل ڤەژاندن و ئاڤەدانیا کوردستانێ بکەن . ژلایەکێ دیتر تورکیا دەرگەهێ پەیوەندیێن کوردستانێ و ئەورۆپایە ، هەڤەژی دێ مفایەکێ زۆر گەهینتە تورکیا ، ژلایێ سیاسی خورتبوونا پەیوەندیێن هەردوو ئالیان دێ خزمەتەکا مەزن بۆ تورکیا هەبیت ،چونکی دەولەتا کوردستانێ دێ ئاستەنگ بیت ل هەمبەر دەست درێژی و مایتێکرنێن ئیرانێ ل سوریا دڤی ئالیەی را کۆ مەترسی لسەر ئاسایشا نەتەویا تورکیا هەیە ، ژلایێ ئێمناهی ژی دەولەتا کوردستانی فاکتەرێ دابینکرنا ئێمناهیا سنوورێن دناڤبەرا هەردوو ئالیان دا یە کو چەندین سالە ئارامی ب خۆڤە نەدیتیە ، چونکی مایتێکرن و تێکدانا ڕەوشا خەلکی ب تایبەت جیرانان یا دویرە ل ڕەوشت و سیاسەتا کوردستانێ بتایبەت یا سەرۆک مەسعود بارزانی و پارتی دیموکراتی کوردستان ، ئەگەر ترسا تورکیا لسەر کوردێن باکوور بیت کۆ ب هەبوونا دەولەتەکا کوردستان مەترسیێ لسەر تورکیا دروست بکەت ، بۆچوونەکا چەوتە ، چونکی پڕانیا باکوورێ کوردستانێ دبن کاریگەریا پەکەکێ دایە و ، پەکەکە ژی هەلگرێ پەیامەکا دژی نەتەوا خۆیە و چ جاران خزمەتا کوردستانێ ناکەت ، هەردەم دژی دەسکەفتێن باشوورێ کوردستانێ بوویە و مەحالە دەولەتا کوردستانێ پشتەڤانیا وان بکەت و دژی تورکیا بکار بینیت . دویر نیە و فەرە پشتی سەرخۆبوونا کوردستانێ چەکدارێ پەکەکێ و هەڤبیرێن وان د کوردستانێ دا نەهێلن ، چونکی بووینە رێگر ل هەمبەر ئاڤەدانکرنەڤا ب هزاران گوند و دەڤەرێن کوردستانێ و زیانەکا زۆر گەهاندیە ئابوورێ کوردستانێ ، ئەڤەژی د بەرژەوەندا تورکیا دایە . دەربارەی عیراقێ ژی ب دیتنا من دەولەتەکا کوردستانی هەردەم بۆ تورکیا دێ باشتر بیت ل عیراقەکا عەرەبی بتایبەت پشتی عیراق ب تەمامی کەفتیە د خزمەتا ئەجندایێن ئیرانێ و سەروەریا خۆ ل دەست دایە . بۆ تورکیا کوردەکێ خراب باشترە ل عەرەبەکێ عیراقیێ باش ، ژبەرکو کورد چ جاران خیانەتێ ل دوست و جیرانا ناکەت ، بتایبەت کریارێن تیرۆرستی کۆ ئەڤرۆ مەترسی لسەر جیهانێ درۆست کریە . مەبەستا من تیرۆرا رێکخستی یە ، ب ڕەنگەکێ گشتی دامەزراندنا دەولەتەکا کوردستانی دڤان کاودانان دا دێ خزمەتەکا هەرە زۆرا مرۆڤایەتیێ کەت و فاکتەرێ ئارامیا دەڤەرێ یە و ئەز باوەرم تورکیا ژی دڤێ دڤێ راستیێ دگەهیت و دژایەتیا دەولەتەکا کوردستانی ناکەت چونکی سەرخۆبوونا کوردستانێ بوویە واقع و دێ هەر هەبیت .