گۆتنێن پێشیان نە تنێ ھندەک ئاخقتنێن بەلافش و سەرپێیینە، بەلکۆ بەرھەمێ ئەزموونەکا چەند ھزار سالییا نەتەوەکی و سەبۆرێن ژیانێ و دیرۆکا وی نە، کە ھێدی ھێدی یێن بووینە بھا و پشکەک ژ پێکھاتییا کەساتی و ستراکتوورێ سایکۆلۆژییا تاک تاکێن وێ. بابۆکالێن مە یێن میدی- ئاریایی د گۆتنەکا خۆ دا دبێژن:"نوی ھاتن کەڤنی خەلاتن"!
دیارە ئەڤێ گۆتنێ ب سەدان جاران ئەم ڕۆژانە و د سەرەدەریکرنا دگەل کاودانێن بچویک و مەزنێن ژیانێ دبینین. زارۆکەکی یاریکەک ھەبیتن و چەند ڕۆژا لبەر وەکی شەکر و ھنگڤینی شرین بیتن، گاڤا تشتەک و یاری و ترۆمبێلکەکا دیتر دیت دی یا کەڤن ژبەرچاڤا کەڤیتن و یا نوی لبەر شرین بیتن.
لسەر ئاستێن مەزن ژی ھزاران نموونەیێن ھەین. ئەڤرۆکە ڕیفراندۆما سەربخۆییا کوردستانێ یا ھاتیەگۆڕێ. ھزاران جۆرێن مرۆڤان و لایەنان خۆ ل ھزاران تشتان و کار و کریاران جەڕباندن. ھندەک ژ ھندەکا تێر بین و خۆ ھاڤێتە تشتەک دیتر. دیارە ھەکەر مرۆڤی بڤێتن کەربێن خۆ ژ تشتەکی و کەس و لایەنەکی ڤەکەتن سایکۆلۆژیایا وی وەسانە دێ گەلەک ھاریکارییا وی کەتن و ھەێجەتێن مەزن بۆ پەیدا کەتن.
ھەرچەندە یێن ھەین ژی ڤان ھەمی سالان شیا خۆ نەگھۆڕیتن چونکی وەسا ڤیا، بەلێ پا ھەبی وەنەکر. گەلەک جۆرێن وان مرۆڤان لڤان چەند سالێن خەباتا کوردستانیان زیانەک مەزنا دەروونی و جڤاکی ل ڤی ملەتی دان و ژانەک مەزن دا بەر ڕحا مە. ئەڤرۆکە ئەو ھند کەس و لایەن، یێ خۆ ل تشتەک دیتر دجەڕبینن. وان دڤێتن بزانن کا ئایا چ تام تێدا ھەیە ھەکەر ئەو بەرۆڤاژی پێلێن ئاڤێ مەلەڤانییا بکەن؟ بڤێ چەندێ بزاڤەکێ دکەن وەکی گەلەک کەسان نەبن و ھەردەم جیاواز و دژ و بەرۆڤاژی بن. ئەوان یا کرییە د سەرێ خۆ دا و دڤێن ب ھەمی ڕنگەکی و بھایەکی لبەر پێلەکا نیشتمانی بسەکنن و بەرێ خۆ بدەنێ کا ھەکەر دژاتییا ڕیفراندۆما سەربخۆییا کوردستانێ کر دێ چ پێڤە ھێتن و کی کەڤیتە بن ( ئەمرێ ) وان و کی دێ چاڤ ل وان کەت و کی نە.
ڕاستی مخابنی ! ملەتەکێ ئەڤ دۆستە ھەبن نە پێدڤی ب دوژمنانە. خۆزیکا وان ھەما ڤێ جارێ بتنێ ژی وەکی زارۆکەکی بڕەنگەک تەماشەی " نوی ھاتن و کەڤنی خەلاتن" کربایە و بڕێکەک ئەرێنی دەربڕین ژێ کربایە. نەکۆ ھەکەر وەنەکەن برینێن مە کویرتر و ژان و ئێش و ئازارێن مە پتر ببن. بەلێ ئەو ھندی زارۆکەکی ژی د وان ژان و تامێ ناگەھن. مانە مخابن !؟
*بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ