گۆڕان چی ده‌وێت
سەنگەر مستەفا
له به‌یاننامه‌که‌ی گۆڕان و قسه‌که‌ره‌کانی ئه‌و بزووتنه‌وه، داوای گۆڕینی سیستەمی حوكمڕانی له ڕێگه‌ی په‌ڕله‌مانه‌وه ده‌که‌ن، ئه‌مه له کاتێکدا گۆڕینی سیسته‌می حوکمڕانی كاری په‌ڕله‌مان نییە. هه‌روه‌ها پێداگیری هه‌مواركردنه‌وه‌ی یاسای سه‌رۆكایه‌تی هه‌رێم ده‌که‌ن، له کاتێکدا سەرۆك بارزانی لە ٢٠ی ١١ـی ٢٠١٧ دەستپێشخەری بۆ چارەسەری هه‌ر سێ سه‌رۆکایه‌تی په‌ڕله‌مان و حكوومەت و سەرۆكایەتی هه‌رێم هەبووە و هه‌ر ئه‌و کات و چه‌ندجارێکی تریش به‌هه‌موو لایه‌نه‌کان گوتراوه و ئێستاش بە مەرسومێك ئاڕاسته‌ی كۆمسیۆنی باڵای هه‌ڵبژاردنه‌کانی کردووه و داوای هەڵبژاردنی هه‌ر سێ سه‌رۆکایه‌تییه‌‌که‌ی هه‌رێمی كردووە، كەواتە ئالیەتی هەڵبژاردنی سەرۆكی هه‌رێم كە ڕاستەوخۆیە و له‌لایه‌ن خه‌ڵکه‌وه هه‌ڵده‌بژێرێت چارەسەر كراوە و پێویست بە قسەكردن ناکات، هەروەكچۆن یوسف محه‌مه‌د بە نامەیه‌ک داوای لە كۆمسیۆن كردووە كە ئاماده‌کاری بۆ هەڵبژاردنی په‌ڕله‌مان و سەرۆكایەتی هه‌رێم بکات و هه‌ندێ له هه‌ڵسوڕاوانیشیان ده‌ڵێن کاندیدمان بۆ هه‌ڵبژاردنی ڕاسته‌وخۆی سه‌رۆکی هه‌رێم ده‌بێت!
له ده‌رئه‌نجامی به‌یاننامه و قسه‌ی قسه‌که‌ران و ڕاگه‌یاندنه‌که‌ی گۆڕان ئه‌وه به دیار ده‌که‌وێت که ئه‌و ده‌رفه‌ته‌ی به گۆڕان درابوو بێته‌وه ناو کۆده‌نگی لایه‌نه‌کان، خۆی له‌باری برد و ئامانجی ئەو جەماعەتە چارەسەركردن نییە بەڵكو فەوزا و قوڵكردنەوەی كێشەكانە و هەڵوێستەكانیان خێرا و جیاوازن و خۆشیان نازانن چییان ده‌وێت.
