ئەجن، ئەو ئافریدەیێ ناڤێ وێ د پەرتووکێن ئەسمانی و قۆرئانێ دا ھاتی، ئەڤە بیست ھزار سالە، د مەژیێ مرۆڤان ب ئەگەرێ نساخیێن دەروونی(نەفسی) ھاتیەزانین، لدەمەکی زانایێن دەروونناسییا نۆژداری سەلماندنی ڤان نساخییان چ پەیوەندی ب ئەجنانڤە نینە. ئەو نساخی ژ ئەگەرێ تێکچۆنا کار و ھندەک مادە و ھۆرمۆناتانە د مەژیێ مرۆڤی و لایەنێ بایۆلۆژیکیێ وی دا، بۆ نموونە ( ئێستیل کوولین و مۆنۆئامین و نۆراپی نێفرێن و دۆپامین و سیرۆتۆنین و ...ھتد).
گرێدانا ڤان نساخیا و ئەجنا وەکی چۆنا ئاسنی دناڤ پەڕۆکی و تێکلبوونا ئاڤێ و زەیتێ یە. ھەر ئێک ژ وان مادا جۆدانە و چ جارا تێکل نابن. ئەڤ تێگەھشتنا شاش تنێ ئاستێ ئەقلێ وان کەسان نیشان ددەتن، کو وەکی کەسێن بەری ھزاران سالا ن ھزر دکر.
ڕاستە یەزدانێ مەزن و خۆدای حکمەتەک ژ خەلقکرنا وان یا ھەی و دبیتن وان ژی وەکی مە گەلەک کار و ئاریشە ھەبن. دبیتن ھندەک ژ وانا وەکی مە داخازا دەولەتێ دکەن و ھندەکا ھەبت. بەلێ یاکۆ ئەو ڕابن ب نساخکرنا مرۆڤان، نە تشتەک بەرئاقلە و دویرە ژ ڕاستیێ و نە کارێ وانە. ئەوێت پشتا خۆ بۆ ڤێ گۆتنێ ب قۆرئانێ ڤە گرێددەن، دویرن ژ واقعی، چونکی قۆرئانا پیرۆز تنێ ھەبوونا وان نیشانددەتن نەک تشتەک دیتر و تووشکرنا مرۆڤا ب نساخیێن دەروونی ژ لایێ ئەجناڤە.
ئەوێن ڤی کاری دکەن و پێش پزیشکێت دەروونی کارێ چارەسەرییا وان نساخان و بڕێکێت جۆداجۆدا دکەن، وەکی وی کەسییە یێ نە ھۆستا بیت و خانیەکی ئاڤا دکەت. دێ کێ باوەری ھەبت بچتە د وی خانی دا؟
کارێ وان کەسێت نەشەھرەزا وەکی وان نەزانانە یێت پێش زانایێت ئایینی ڤە کارێ ئایینی و فێرکرنا ئایینی دکەن و بەرھەمێ وان ژی ئەم دبینین ئەو گەنجێت ڤێ جیھانێ نە ئەوێت ژ ئیسلاما پیرۆز و ئایینی تنێ تیرۆرێ فێر بووین و ئەڤ کارەساتێت مەزن چێکرین و داعش نموونا ڤی کاری یە.
ئەڤ مامۆستایێت ئایینی ل شوینا کارێ خەلکێ و پاشئێخستنا چارەسەرییا نساخێت دەروونی بۆ ھندەک پارەی و ھەر مەبەستەک دیتر، بلا بێت خێرەک دیتر و مەزنتر بکن. ڕاستە نڤشتی چارەسەرا ھەمی نساخێت دەروونی ناکت و ھەکەر کەسەک پێ چێبتن ژی تنێ ژ ئەگەرێ بلندبوونا مۆرال(مەعنەویات) و شیانێت دەروونی و جەستەییا وی نەساخێیە یان ژی ھێشتا نساخییا وی سڤکە و ل دەستپێکێیە. نڤشتی نە دەرمانەک کێمیاویە و نەدشێتن وەسا بت.
ئەو مامۆستا دشێن ب بلندکرنا مۆرالا خەلکێ، پشتەڤانەک مەزن و بھێز بن بۆ سەرکەفتنا ڕیفراندۆما سەربخۆبوونا کوردستانێ، دا پشتی ئاڤابوونا وێ دەولەتێ ڕێک لبەر ھزاران جۆرێت وان تاوانا بھێتەگرتن کە پشکەک مەزن ژ بناس و ئەگەرێت سەرھلدانا نساخیێت دەروونی ل کوردستانێ ئەڤە سەرێ چەند سالانە ئەو کارەساتن نەک ئەجن. بلا بەس بیتن ئەم بێبەختیا ل ئەجنا بکین. ئێشێت مە ژ نەبینا دەولەتێ و ھەبینا کارەساتانە نەک چۆنا ئەجنا بۆ ناڤ لەشێ کەسێ. بلا ئەو کەسێت نزانن بناڤێ ئایینی وێ چەندێ نەکن و ئایینی ژی لبەر خەلکێ نەشێوینن و ڕەش نەکن. ئەڤە نەسۆپاسییە بۆ خۆدایێ مەزن.