خۆدێ ژێ ڕازی محەمەد شێخۆ، ھۆزانڤان و خەباتکەرێ کوردستانێ، د ئێک ژ شاھکارێن نەتەوەیی دا ھەوار دکەتن: "... ئەی فەلەک بۆ تە دنالم بۆچی .... بۆچی ئەم بێ دۆست و کەسین؟ ..." خۆزی ئەو ساخ با و دیتبا ئەڤرۆ پترتر ژ شێست وەلاتان ب حنێرا پێشمەرگەی و سەرۆکاتیا جەنابێ بارزانی یێ د ھەوارا مە کوردستانیان ھاتین و ل دژی تیرۆرێ ھاریکارییا مە دکەن.
بەلێ پا ژناڤ کوردستانیان یێت ھەین و وانە ( دەرس ) ژ دیرۆکێ و کارەساتێت ڤی ملەتی وەرنەگرتینە و تنێ ژبەر ئەقلیەتەکێ نەخۆشدەروون و ب ھێجەت و ناڤێ کەربێت مالباتا بارزان نەڤێتن بۆ کێمکرنا خەمێت ڤی ملەتی ملێ خۆ بدنە بەر دیوارێ ئاڤاکرنا دەولەتا وان دڤێتن ب خوینا سەدان ھزاران شەھید و بریندارا ئاڤا بکەن.
بێگۆمان ھەکەر محەمەد شێخۆی ئەو دیتبان و نۆکە د گۆڕێ خۆ یێ تژی نویرھە ژی نفرین و لەعنەتا ل وان دبارینیتن. چەوا دبیتن مرۆڤ ھەبن ئێک بکەڤیتە د ئاگری دا و ئەو بشێت دەستێ وی بگریت و وی ژ مرنێ ڕزگار بکەت، بەلێ وی کاری نەکەتن؟ ئایا ئەڤ مرۆڤە د پیڤەرێ زانستێ دەروونناسیدا چ بۆ دھێتە دگۆتن تنێ ئەو نەبیتن نەساخەکێ دەروونییە و جیاوازییا وی دگەل تاوانبارەکێ ژ ئەگەرێ نساخییا خۆ یا ( نەفسی ) چەند مرۆڤان بکۆژیتن نینە. ئەڤ مرۆڤە ژ لایەنێ ویژدانیڤە، وەکی ئێک ژ مەزنترین زانایێت سەردەم و ھەمی دەمەکی، فرۆید، دبێژیتن تووشی شەپرزەیی و پەریشانییەک مەزن ھاتیە و چارەسەرییا وان گەلەک بزحمەت و بەلکۆ چ ڕێک بۆ نینن.
وەرن د خەما ملەتێ خۆ بن. شۆڤییزما عەرەبی بۆ خۆ و باب و باریێت خۆ نابنە مال. خەلکا دیتر بۆ وە دێ چ ھەبت، تنێ ئەو نەبت گاڤا شۆلێ وان ب تە تەواو بی تە وەکی " پەڕۆکێ بێ نڤێژ " فیت کەن و ھاڤێژن سەر گویفکی و ناڤ گلێشی. وەرن ھیڤییا ھزاران محەمەد شێخۆیا بجە بینن دا ھوین بەر دۆعایێت وان بکەڤن.