گۆند چۆلکرن بابۆ! گۆند چۆلکرن ! کی زیانمەندە؟ بەلێ ئەڤ پرسیارەکە گەلەک مرۆڤ لدۆر ڤی بابەتی ژ خوە دکەن. ھەمی زیانمەندن ھەتاکۆ شارستانیەت ب تێکرایی. دیاردەیەک کەڤن و ل ھەمی وەلاتان دھێتە دیتن. لێ جیاوازییا وێ دگەل کوردستانێ بۆ ھندەک تشتان دزڤڕیتن. ل وان وەلاتان ب پلانە و حکومەت ژی چاڤدێرییا وێ دکەتن. بەلێ ل کوردستانێ بێ پلانە و یا ژەستێ حکومەتێ دەرکەفتی و بەلکۆ ژی نە ھند خەمەکا مەزن. ل وەلاتان بۆ باشترکرنا ژیارێ یە لێ ل کوردستانێ پشکەکا مەزن ژ ئەنجامێ چاڤلێکرنێیە وەکی گەلەک تشتێن دیتر و بەلکۆ ژی کەلتوورێ "مەتحەکرنێ" ژی ژێ بێبەھر نینە.
خەلک ل گۆندی تەماشەدکەتن فلان و فلان و فلان چۆنە باژێڕی، ڤێجا ئەندامێن خێزانێ ھەمی و ب جارەکێ بەر بنە گیانێ سەمیانێ مالباتێ و وی تووشی ھەلوێستەکێ دژوار کەن. " پێدڤیە ئەم ژی بچین! ئەم نە ژ وان کێمترین". بەلێ "بۆچی؟" و " کا خانی و جھێ ئاکنجیبوونێ؟" و " کا کار؟" و گەلەک پسیارێن ژ بابەتی ھێشتان نەھاتینە بەرسڤدان و لبەر خێزانێ نە د ڕۆھنن. ب ھزاران کەسێ گۆند و زەڤی و جۆت و کێل و ڕەزێ خۆ ھێلان و قەستا باژێڕان کرن، باژێڕێ تەژی ئاریشە. لدەمەکی کو نە کەسەک ژ وێ مالباتێ فەرمانبەرەکێ فەرمیە و نە کەسەک پیشە و ھۆنەرەکێ باژێڕی دزانیتن. دھێن و ل باژێڕ و باژێڕییان دبنە بارگرانی و " بەڵا"!ھەکەر ئەو ل گۆندی بەرھەمھێنەر بی ل باژێڕان دبنە بکاربەر(مستھلک). کرێ ل باژێڕی گران کرن، نرخێ تشتی و کەل و پەلان بلندکرن و قەرەبالغی ئێخستنە وان و قوتابخانە تەژی کرن.
ھەتاکۆ یێ ھەی ھاتیە باژێڕان و کەرەکێ زارۆکان یێن ھەی و ناڤڕێکەتە قوتابخانێ. بۆچی؟ چونکی شیان نینە خەرجییا وان بدەتن و ئەو بخۆ یێ د خانیێ ب کرێ دا و ژبلی ھەمی خەرجیێن مالێ، و چ داھات و چ مووچەیەک ژی نینە. حکومەت و لایەنێن پەیوەندار ژی ھیچ دویڤداچۆنەک و خەمەکێ ژ ڤی بابەتی ھلناگرن. خانیێن تۆزۆبا و ( تەجاوز) لناڤ پارک و جھێ باژێڕڤانیێ و خزمەتگۆزارییان دھێنە ئاڤاکرن و کەس نەشێتن وان تێکبدەتن و ھزاران ئاریشەیێن یاسایی و جڤاکی ژێ پەیدا دبن. ھەکەر جارەکا دیتر شۆڕەشەکا وەکی ئەیلول و گۆلانێ ل مە پەیدا ببیتن پێشمەرگە دێ زیانێن مەزن بینن. ھنگی پێشمەرگە ب گۆندیان بخۆدان بین.
نۆکە گۆندی ژ خۆ ناگریتن تشتی شین بکەتن و پەزی خۆدان بکەتن! ل باژێڕان و لبن گڤاشتن و فشارا خەلکێ گۆندان ھزاران ئاریشەیێن ئابووری، کۆمەلایەتی، کەلتووری و فەرھەنگی، سیاسی، پەروەردەیی، خزمەتگۆزاری و ژ ھەمیا مەزنتر و داخبارتر سایکۆلۆژی و دەروونی پەیدا بووینە. گڤاشتنێن بارێ ژیانێ لسەر خەلکێ ل باژێڕان و زێدەبوونا ئاستێ پێدڤیاتی و داخوازیێن مرۆڤان ھزاران مەترسی لسەر ھەمی لایەکی دروست کرینە. تاوانێن بچویک و مەزن د بەردەوامن. ئاسایشا سایکۆلۆژییا مرۆڤان یا کەفتیە بەر مەترسیێن گەلەک فاکتەران و ژ وان ژی ئەڤ کۆچکرنا بێ ڕامان و بێ وێنە و بێ بنەما و بێ پلان.
لدەمەکی کە لبن سیبەرا حکومەتا ھەرێما کوردستانێ و پێشکەفتنا سەردەم ئاستێ جیاوازییا باژێڕ گۆندان تاڕادەیەکێ گەلەک یا کێم بووی. قوتابخانە و نەخۆشخانە و گەلەک خزمەتگۆزاریێن فەر ل دویرترین گۆندێن کوردستانێ دھێنە دیتن. و ڕاستە ھندەک گۆندێن وێ یێن ژ لایەنێ ھندەک پارتێن نەیار ھاتینەداگیرکرن و تێکدان و ژیان تێدا نەمایە، بەلێ نە ھەمی گۆند وەسانە.
دەمێ بڤی ڕەنگی خەلک کاروان کاروان قەستا باژێڕان دکەتن ھزاران ئاریشەیێن جۆراوجۆر گەفان ل دەروون و جەستەیێ وان دکەتن. ژیان ل باژێڕان بارەکی گرانە و دێ ھێشتان گرانتر بیتن. تنێ چاڤلێکرن بەلگە نینە خەلک پێکڤە بقڕژتە ناڤ باژێڕان. ھەمی ئەڤ ئاریشە و کێماسییە ھێدی ھێدی دێ کارتێکرنەکا نەرێنی و خراب لسەر لایەنێ دەروونی و کۆمەلایەتیێ ئەندامێن خێزانێ کەتن. بەلگە ژی بۆ ڤێ گۆتنێ ھەمی ئەو ڕوویدانێن دلتەزینێن کۆشتن و خۆکۆشتن و تووشبوون ب نەساخیێن گرانێن دەروونی و ئەو تاوانێن دژی یاسایینە یێن ئەم ڕۆژانە ل کەنالێن ڕاگەھاندنێ دبھیستین و دبینین. ل وەلاتێن پێشکەفتی خەلک ژ باژێڕان تێرە و بزاڤێ دکەتن، ھەکەر بشێتن، ل گۆندەکی زەڤیەکێ بکڕیتن و تێدا ڕۆژانێن مای ژ ژیانا خۆ ب ئارامی و تەناھی و ل سەقایەکێ پاقژ و بژوین و سافی ببۆرینیتن لنک مە بەرۆڤاژییە!
حکومەتا ھەرێما کوردستانێ، سەرباری ھەمی قەیرانێن سیاسی و ئابووری و لەشکەری یێن ئەڤرۆ، پێدڤییە خەمەکێ ژ ڤی بابەتی بخۆتن و یاسایێن تووند دەینیتن و نەھێلیتن ئەڤ کارە ببیتە کەلتوورەکێ جێگیر، چونکی ل ئاییندەی دا دێ زیانێن مەزن گەھیننە تاکێ کوردی و کوردستانیان و یێن ژ ھەمیا مەزنتر زیانە بۆ ئاسایشا سایکۆلۆژی و لدویڤدا ژی ئاسایشا نەتەوەیی.
و بەری چارەسەرییا ڤێ ئاریشەییا مەزنا جڤاکی و ئابووری و سیاسی ژ لایەنی َدەستھەلاتدارییا کوردستانێ بلا تاکی کوردستانێ ژی ل ئاستی ئەرکێن خۆ بیتن. ڕاستە مە ھەمیان پێکڤە و ھەر کەسەکێ ب ھێجەتەکەێ و ژ ھندەک ئەگەرێن جیاوازێن دروست و نەدروست گۆندێن خۆ ل ڤێ کوردستانێ چۆلکرن یان ژی ھندەک زۆردارێن نەزان و ژپێخەمەت دلێ خەلکێ و نەیاران و بۆ خۆ خەلەتاندنێ ب مە چۆلکرن، بەلێ بلا ئەو ئەزموونا تەحل بۆ مە ببیتە وانەیەک و خرابی و زیانێن وێ ژ بیرامە نەچن و ئەم بزانین دبیتن جارەک دیتر ژی ئەم تووشی وی َشاشیێ ببین و ڤێ جارێ نەک تنێ گۆند، بەلکۆ باژێڕ و کوردستان ب ئێکجاری و ھەمی پێکڤە چۆل ببیتن. کەنگی؟ ھەکەر ئەم ژ ئەگەرێن جۆدا ھەمان ڕەفتار و شاشیێ لدەمێ دەنگدانێ و بسەرێ سندۆقێن دەنگدان بۆ ڕیفراندۆما سەربخۆییا کوردستانێ خەمساریێ بکەین و ئەز بێژم بۆچی وێ ھە ناچیتن و ئەز بچم.
باشە ما من چی ھەیە ئەز بچم دەنگی بدەم؟ یان ...؟ ....؟ ھەکەر ئەم ل ھیڤییا ھێجەتان بین و ب ڤان تشتۆکا خۆ خەلەت بکەین و وان سندۆقان چۆل بکەین دێ ڕۆژەک ھێتن گەزا ل تلێن خۆ بدەین و " خۆیێ بخۆین و ئاڤێ بسەردا بکەین" بەلێ ھنگێ درەنگ بیتن و پەشیمانیێ چ مفا نەبن. ئەوێن تو ژ کەربێن وان دبێژی دەنگی نادەی بخۆ یێن د ئازار و ( عەزابا) ویژدانا خۆ دا ماینە ئاسێ و حێبەتی و زیندانکری. ئەز و تو بەلکۆ جارەکێ بمرین و ئاسوودە ببین بەلێ ئەو کەس ڕۆژێ چەند جاران دمرن و ساخ دبن و من و تە ھای ژ وان نینە. تو ویژدانا خۆ ئاسوودە بکە، ئەوان و سزایێ وان بھێلە ب ھیڤییا خۆدایێ مەزن ڤە.