مشتومڕێكی زۆر دەربارەی پەیوەندیی هەرێم و بەغدا دەكرێ، ئەو مەسەلەیە بۆ بەرژەوەندیی حزبی هەڵگێڕدراوەتەوە، لە جیاتی دروستكردنی تێڕوانینێكی واقیعی بە پشتبەستن بە رووداو و قەوماوەكانی كوردستان، حزبەكان گوتاری بەغدا وەك خۆی وەردەگرن، لە كاتێكدا ئاشكرایە ئەو گوتارە لە چ ژینگەیەكەوە ئاراستە دەكرێت و چ مەبەستێكی هەیە، گوتاری بەغدا گوتارێكی درۆزنانەیە، بەڵام بەدرێژایی مێژوو یەك ناوەرۆك و مەغزای هەیە، ئەویش كات كوشتن و راگرتنی هەوڵی كوردە، لێ ئەوەی جێی پرسیارە، ئەو ژینگەیەیە كە گوتارەكەی ئاراستە دەكرێت.
لە جیاتی ئەوەی خوێندنەوەی ورد بۆ گوتاری بەغدا بكرێت، گوتارێكی یەكگرتووی لە بەرامبەردا قیت بكرێتەوە، گوتاری بەغدا دەخرێتە خزمەت ململانێی حزبی، حزبایەتیی تەسكبین كار لەسەر ئەوە دەكات، سەبەبكاری ئەو قەیرانانەی رووی لە كوردستان كردووە هەولێرە نەك بەغدا، هەربۆیە دەنگی گوتاری بەغدا بەرزتردەبێت، هێشتا بە پێوەری كوردی باش و كوردی خراپ مامەڵە دەكات، بێگومان كوردی باش بەلای بەغدا ئەوەیە باسی مافی زەوتكراوی نەكات، ئەو مافەی ئەگەر بێتەدی، چیدی خوێن ناڕژێ و عێراقیش جێگیری بەخۆیەوە دەبینێ، ئاخر ئەو گوتارەی بەغدا پشت لە دەستوور دەكات، چۆن قسەی سەرپێیی ئەم و ئەو سەركردەی بەغدا دەبێتە گرەنتی؟
كێشەی گەورە ئەوەیە، حزبایەتیی تەسكبین وێنەی بەغدای لە شەقامی كوردی تەڵخ كردووە، بەجۆرێك كە خەڵك لێی تێكبچێت و نەتوانێ بەغدا وەك خۆی ببینێ، نەك وێنەكە تەڵخ دەكات، بەڵكو هەوڵ دەدات وێنەیەكی دیكە پیشانی خەڵكی كوردستان بدات، رێك ئەو وێنەیەی بەغدا مەبەستییەتی، راستییەكەش ئەوەیە بەغدا نەگۆڕاوە، لەسەر راستگۆیی كارناكات، لە كوێ هەستی كرد راستگۆیی كوردستان بە زیانی خۆی دەبینێ، دەست بۆ سزای جۆراوجۆر دەبات، دەنا لەوە گرنگتر هەیە كەسێك نەیەوێ خوێن بڕژێ، كەچی لەو پێناوەدا بخرێتە كونجی زیندانەوە؟
چیڕۆكی مام برایم لای من نموونەیەكی زیندووە، ناتوانم لەبیری بكەم، ئەو پیاوە خەڵكی گوندی (شیوەڵۆك) ی ناوچەی باڵەكایەتی بوو، دوای ئەوەی لە ساڵی 1977 گوندەكەیان خاپوور دەكرێ و خەڵكەكەی رادەگوێزرێنە ئۆردوگا زۆرەملێكان، مام برایم كە پیاوێكی سادە و ساكار و پاك بوو خەریكی بەخێوكردنی هەنگ بوو، بۆ ئەو مەبەستە دەچێتەوە گوندە وێرانەكەی، هێزێكی سوپای عێراق لە گوندەكە دەبن، مام برایم بەر لەوەی دەست بە نوێژ بكات، ژمارەیەك پێشمەرگە دەبینێ بەرەو ئەو دێن و نازانن هێزێكی سوپا لەو ناوەیە، بۆیە مام برام بە دەست ئیشارەتیان بۆ دەكات و ئاگاداریان دەكاتەوە كە دووربكەونەوە، چەند سەرباز و ئەفسەرێك دەبینن مام برایم پێشمەرگە ئاگادار دەكاتەوە، دەچنە لای و پێی دەڵێن بۆ لێنەگەڕای ئەو تێكدەر (مخرب)ـانە بێن و بیانكوژین، مام برایم راستگۆیانە وەڵامیان دەداتەوە و دەڵێ:" هەردوولا موسڵمانن نەمویست خوێن بڕژێ"، كەچی مام برایم گیرا و لە دادگای بە ناو شۆڕش لە بەغداش وەڵامی هەر ئەوەبوو، بۆیە سزای بیست ساڵ بەندكردنی بەسەردا سەپێندرا و ساڵی 1979 بەهۆی لێبوردنی گشتی ئازادكرا.
ئێ مام برایم خێریشی بۆ عێراق ویست و نەیهێشت خوێن بڕژێ كەچی سزادرا، ئەو عەقڵیەتەی مام برایمی لەبری چاكەیەك سزادا، كە لەوانەیە لە شوێنێكی دیكەی جیهان بوایە خەڵاتكرابا، هێشتا بەردەوامە، ئێستا ئەو عەقڵییەتە هەموو خەڵكی كوردستان سزا دەدات و قوتی دەبڕێت، حزبایەتیی سەقەتیش سواری سەری خۆی بووە و ئامادە نییە گوێ لە چیڕۆكی مام برایم و قوتبڕینی خەڵك بگرێت كە پڕە لە پەند و وانە.