نەوشیروان مستەفا لە ٢٤ی ئەیلولی ساڵی ٢٠١٥و لە گەشتێکی دوور و درێژدا وڵاتی جێهێشت و هەڵسووڕاو و گۆڕانخوازانی خستەنە چاوەڕوانییەکی درێژخایەنەوە، هەر هەڵسووڕاو و گۆڕانخوازێک بە پێی ئەقڵ بڕینی خۆی فاڵی سیاسی بۆ گەشتەکە و گەڕانەوەی دەگرتەوە، بەڵام هەموویان فاڵەکەیان بەوە کۆتایی پێدێنا کە کاک نەوشیروان بە پرۆژەیەکی پەرجوو خوڵقێن دەگەڕێتەوە، بەڵێ.. لە ٢٨ی نیسانی ساڵی ٢٠١٦و دوای (٧) مانگ و (٧) رۆژ گەڕایەوە، هەموو پرۆژە پەرجوو خوڵقێنەکەشی رێککەوتن بوو لەگەڵ ئەو حزبەی کە بە گوتەی خۆی لەبەر گەندەڵی و بۆ دادگایی کردنی ئەو بەرپرسانەی لەناو یەکێتیدا مابوونەوە.
دوای ئەو رێککەوتنە و سەرقاڵ کردنی هەڵسووڕاو و گۆڕانخوازانی لە ٣ی ئەیلولی ساڵی ٢٠١٦ جارێکیتر وڵاتی جێهێشتەوە و دووبارە هەڵسووڕاو و گۆڕانخوازانی خستنەوە چاوەڕوانی و فاڵ گرتنەوە، بەڵام چاوەڕوانی و فاڵ گرتنەوەی ئەمجارەی هەڵسووڕاو و گۆڕانخوازان لە چاوەڕوانی و فاڵ گرتنەوەی پێشوویان جیاواز بوو، هیچ هەڵسووڕاو و گۆڕانخوازێک نەیدەزانی چی دەکا و کەی دەگەڕێتەوە.
لەو هەڵاتن و وڵات جێهێشتنەشدا دوا (٨) مانگ و (١٠) رۆژ و لە (١٣)ی ئایاری ساڵی ٢٠١٧ بە دزی و بێ ئاگاداری هەڵسووڕاو و گۆڕانخوازانی لە بێدەنگی شەودا خۆی کردەوە بە شاری سلێمانیدا، ئێستا کە (٦) رۆژ بەسەر گەڕانەوەیدا تێدەپەڕێ هیچ لێدوانێکی نەداوە و تەنانەت هەڵسووڕاو و گۆڕانخوازانیش بە دیداری شاد نەبوون، ئەوەی جێی سەرنجە هەڵسووڕاو و گۆڕانخوازان پەندیان لە هەڵاتن و خۆ شاردنەوەکانی نەوشیروان مستەفا وەرنەگرتووە و هێشتا سوورن لەسەر ئەوەی کاک نەوشیروان بە پرۆژەوە گەڕاوەتەوە.
بەڵێ.. بە پرۆژەوە گەڕاوەتەوە، بەڵام پرۆژەکەی هەڵوەشانەوەی پرۆژەکەی پێشوویەتی کە رێککەوتن بوو لەگەڵ یەکێتی و گەڕانەوەیە بۆ خاڵی سفر، ئەوەش رابردووی پڕ لە تاوان و خەتاکاری نەوشیروان مستەفایە و بە دریژایی مێژووی سیاسی بە پرۆژەیەک پەردەی پێلانگێڕی لەسەر پرۆژەیەکی تری خۆی لاداوە، بۆیە دەبێ هەڵوسووڕاو و گۆڕانخواز و خەڵکی کوردستانیش ئەو راستییە بزانن، کە پرۆژە و پرۆژەکاری نەوشیروان مستەفا بۆ دژایەتی کردنی ئەو رەوتە نەتەوەیی و نیشتیمانیەیە کە بارزانی نەمر نەخشەی بۆ کێشاوە و زنجیرە پرۆژەکانی رابردووشی لەو پێناوەدا بوون، هەر بۆیەش هەر پرۆژەک دەیخاتە روو گرێیەکی تر دەخاتە سەر گرێ دەروونیەکانی.