گۆڤاری رزگاری کە لە ساڵی ١٩٦٩و بە مۆڵەتی رژێمی بەعس و بە رێنمایی و لەژێری چاودێری مخابەراتی عێراقی دەردەچوو، لە سەنگەری خیانەتەوە و بە ئێڵنجی شۆڤێنیزمی عەرەبی بەسەر شۆڕش و سەرکردایەتیەکەیدا دەڕشایەوە, زۆر رووقایمانە جوانکاری بۆ سیاسەتی دوژمنکاری رژێمی بەعس دەکرد و ئەوەی بەعس دەیویست وەریدەگێڕایە سەر زمانی کوردی و هەوڵیدەدا بە دەمامکی ئایدۆلۆژییەوە تاکی کوردی پێ لە راستەڕێی خەباتی رزگاری نیشتیمانی لابدات, پێشمەرگەی بە چەتە و جاشی بە شۆڕشگێڕ ناو دەبرد، تۆمەتی بەکرێگیراوی دەدایە پاڵ ئاڵا هەڵگرانی کوردایەتی و خەتاکار و خیانەتکارانیشی بە رەوتی نیشتیمانی ناوزەد دەکردن، رەنگە پێتانوابێ خاوەن ئیمتیازی ئەو گۆڤارە محەمەد سەعید سەحاف بووبێ، نەخێر، نەخێر خاوەنی ئەو گۆڤارە نەوشیروان مستەفای رێکخەری گشتی ئێستای بزووتنەوەى گۆڕان و دامەزرێنەری کەناڵی (KNN)ە.
دوای رێککەوتنی ١١ی ئازاری ساڵی ١٩٧٠ ئەو گۆڤارە پەکیخرا و خاوەنی ئیمیازەکەشی بەرەو هەندەران هەڵات و لە وڵاتی نەمسا گیرسایەوە، دواتر ستایلی گۆڤارەکەی گۆڕی و بەناوی بیرەوەری و نووسنەوەی مێژوو دەستی کردەوە بە هەمان سەمای چەواشەکاری و رشتنی رق و کینەی سیاسی، ئەوە کتێبی پەنجەکان یەکتری دەشکێنن، ئەوە کتێبی لە کەنارەکانی دانووبەوە تا خڕی ناوزەنگ، ئەوە کتێبی بەدەم رێگاوە گوڵ چنین، کە لە راستیدا بەدەم رێگاوە زی چاندنە، ئەوە جگە لە سەدان وتار.
ئەوەی لە هەموو کتێب و وتارەکانیدا بەرچاو دەکەوێ هەوڵیداوە چۆن ئەو گرێ دەرونیە بکاتەوە کە بەرئەنجامی شکستە سیاسیەکاننی، بۆ ئەو مەبەستەش لەسەر دوو تەوەر کاری کردووە.
یەکەم:ــ بە شێواندنی راستییەکان و پەلاماردانی پیرۆزیەکان و ناوزڕاندنی رەمزەکان، هەوڵیداوە میژووی خۆی لە خەتا و خیانەتە نیشتیمانیەکان پاک بکاتەوە.
دووەم:ــ بوون و هێز و مانەوەی خۆی لەوەدا بینیوە ناوماڵی کورد پەرتەوازە بێ و یەکێتی ناو حزبەکەشی پڕ کوتلە و باڵباڵێن و فەوزا و ناکۆکی بێ.
دوای ئەوەی گۆڤاری رزگاری و کتێب و وەتارە چەواشەکاریەکانی خەونەکەیان زڕاند و لە دامێنی مەرام و ئامانجە رقاویەکانی بەجێیان هێشت، وەک تەواوکار و درێژە پێدەری گۆڤار و کتێب و وتارەکانی و بۆ بەدیهێنانی خەونەکانی کەناڵی (KNN)ی دامەزراند، سەرەتا کۆمەڵێ میدیاکاری راهێنراو بە فەلسەفەی رق و کینەی خۆی هێنایە ناو کەناڵەکە و دواتر وەک ئەوەی دەیویست ئەرکە بەسەردا دابەش کردن.
ئێستا نەوشیروان مستەفا لە مینبەری ئەو کەنڵەوە و لە پەنای چاکسازی و گۆڕانکاری و بە دامەزراوە کردن، داوای سیستەمێکی هاوشێوەی سیستەمی (بەغا) دەکات، فراکسیۆنەکەی لە بەغدا داوا لە پەرلەمانی عێراق دەکات بەسەر کێشە سیاسیەکانی کوردستانەوە ببێتە دادوەر و وەک خۆیان دەڵێت: سزای ناسیۆنالیزمی توندڕەو و شەڕانی کورد بدات، سەربەخۆیی و دەوڵەتی کوردستان سەربەسەر بە مووچە دەگۆڕنەوە، تاکی کورد وا چەواشە دەکەن تەنها بە گەڕانەوە بۆ بەغدای عرووبە کێشەی مووچە و قووتی خەڵک چارەسەر دەبن، بەڵام دەبێ تاکی کورد ئەو راستییە بزانێ هەرکاتێ سەربەخۆیی و دەوڵەتی کوردستان بە مووچە بگۆڕدرێتەوە، دواتر دەوڵەتە شیعەگەریەکەی بەغدا دەڵێ: پێدانی مووچە بەرامبەر گەڕانەوە بۆ هەلیر و سلێمانی و دهۆک و هەڵەبجە و دوای ئەوەش کۆیلە کردنەوەی کورد و سەرهەڵدانەوەی کۆمەڵکوژی، ئەوەیە ئەرک و فەرمانی کەناڵی (KNN)ی کوڕی شەرعی کتێبەکانی نەوشیروان مستەفا و نەوەی راستەقینەی گۆڤاری رزگاری.