فرەنسا وەک وەلاتەک کەڤنار و زلھێز و نموونا دیمۆکراسیەتێ ل سەد سالێن بۆری و پشتی جەنگێ جیھانیێ دووھەم ژ بەر ھەبوونا ھژمارەکا خەلکێ بیانی و نەخاسمە ئەفریقی تووشی چەندین خۆنیشاندان و گرژی و ئالۆزی و لدویڤدا ژی ڤان سالێن دۆماھیکێ چەند کریارێن تیرۆریستی تێدا ھاتنە ئەنجامدان و قۆربانی ھەبین. بەلێ پا زیان تنێ سۆتنا چەند مارکێت و ترۆمبێل و کۆشتنا چەند کەسان بی کە ھژمارا وان ھندی ھژمارا دەستان و ھندەک پتر بی و ل چاڤ قۆربانیێن گەلێ کوردستانێ ب چ ناھێتە ھژمارتن. بەلێ پا وان چ کر؟ ئەوان لڤێ ھەلبژارتنا دۆماھیکێ ژناڤ دوو کەس و پارتێن میانەڕۆ و تووندھاژۆ کیژ ھەلبژارت؟ بۆچی؟ ئەڤێ ھەلبژارتنێ دیسانێ نیشان دا مرۆڤ ب تێکرا و نەخاسمە فرەنسی حەز ژ بەڵاڕۆیشیێ و کێشمەکێش و نەخۆشی و ئاژاوەی ناکەن و نەڤێتن کە ببنە پێتڕانکێن لایەنەکێ تێر ئاریشە، لەوما دەنگێن لۆ پێن (Le Pen) لچاڤ ماکرۆنی (Macron) نێزیکی ( ٣٣% ) بەرامبەر ( ٦٥%) بین. ئەڤە وەکی ھەرجار مەزنترین دەستکەفتێ مرۆڤایەتیێ یە و دسەلمینیتن کە مرۆڤ حەز ناکەن بندەست بن و دخوازن ئازاد بن ژ دەمارگیری و ھشکباوەریێ و کەسێن مەژی ھشک و سەر ڕەق یێن بەرێ وان بدەنە کێشە و ئالۆزیان. ئەڤە سروشتی َمرۆڤییە حەز ژ تەناھیێ و ئاسوودەیێ و دویرکەفتن ژ کۆشت و کۆشتارێ دکەتن. چونکی تنێ تەناھی تام و چێژێ دگەھینیتە مرۆڤی، و تووندھاژۆتن و نەخاسمە ھەکەر چ بنەمایەک بۆ نەبیتن و ژبەر گێول و بۆ دل و بەرژەوەندی و تژیکرنا بەریکێن چەند کەس و لایەن و وەلاتێن دەمارگیر و نەحەز و نەیار بیتن، ھیچ ڕامانەکێ نادەتن و لنک وی نەتەوەی ھیچ نائینیتن. خەلکێ فرەنسا جارەکا دیتر نیشان دا کە وەکی چەوا زەردەشتێ ئاریایی دبێژیتن " مرۆڤ بخۆ نڤیسەر و ئافرینەرێ چارەنڤیسی َخۆیە"، سەلماند کە ئەو بدەستێن خۆ ئاسایێشا ئابووری و جڤاکی و سایکۆلۆژی و سیاسییا وەلاتێ خۆ و تەناھییا خۆ بدەستێن خۆ دێ نڤێسن دا نەبنە قۆربانیێ حنێرا بێشۆلا ھندەکان. بەلێ ئایا کوردستانی ژی پشتی ھەمی کارەساتێن ڤان چەند سەد سالێن بۆری و نۆکە گەھشتنە ھندێ وەکی وان ھزر بکەن و بڕیارێ بدەن یان نە؟ ئایا دێ ئەم وانە و پەندێ ژ وان وەرگرین یان نە؟ *پسپۆری زانستەکانی پێداگۆگی و پەروەردەیی/فاکۆلتیی پەروەردە/ زانینگەی زاخۆ